ຝຶກອົບຮົມສ້າງຄວາມເຂັ້ມແຂງ ທາງດ້ານວຽກງານກວດກາ

ໃນລະຫວ່າງ ວັນທີ 4 ຫາ 7 ກັນຍາ 2023, ກອງປະຊຸມຝຶກອົບຮົມສ້າງຄວາມເຂັ້ມແຂງ ທາງດ້ານວຽກງານກວດກາ ໃຫ້ພະນັກງານ ສານປະຊາຊົນສູງສຸດ ສານປະຊາຊົນພາກກາງ ສານປະຊາຊົນນະຄອນຫຼວງ ແລະ ສານປະຊາຊົນ 4 ທັງເຂດນະຄອນຫຼວງວຽງຈັນ ໄດ້ຈັດຂຶ້ນ ທີ່ສະຖາບັນຄົ້ນຄວ້າ ແລະ ຝຶກອົບຮົມ ສານປະຊາຊົນສູງສຸດ, ເປັນປະທານ ໂດຍທ່ານ ວາດສະໜາ ວົງປັນຍາ ຫົວໜ້າກົມກວດກາ ສານປະຊາຊົນສູງສຸດ ແລະ  ເຂົ້າຮ່ວມໂອ້ລົມໂດຍ ທ່ານ ນາງ ວຽງທອງ ສີພັນດອນ ຄະນະ ປະທານສານປະຊາຊົນສູງສຸດ.

ໃນການຝຶກອົບຮົມໃນຄັ້ງນີ້ປະກອບມີຫຼາຍຫົວຂໍ້ຄື: ຄວາມຮູ້ທົ່ວໄປກ່ຽວກັບຈັນຍາບັນ-ຈັນຍາທຳ ຂອງຜູ້ພິພາກສາ ແລະ ຂັ້ນຕອນການກວດກາ ຜູ້ພິພາກສາໃນການປະຕິບັດໜ້າທີ່, ຄວາມຮູ້ພື້ນຖານກ່ຽວກັບວຽກງານກວດກາພັກ, ຄວາມຮູ້ພື້ນຖານກ່ຽວກັບວຽກງານກວດກາລັດ, ການແກ້ໄຂຜົນການກວດກາ ແລະ ການຕິດຕາມກວດກາ ການຈັດຕັ້ງປະຕິບັດຜົນການກວດກາ.

ໂອກາດດັ່ງກ່າວ, ທ່ານ ນາງ ວຽງທອງ ສີພັນດອນ ໄດ້ກ່າວຕໍ່ກອງປະຊຸມວ່າ: ຄືດັ່ງພວກເຮົາຮັບຮູ້ນໍາກັນແລ້ວວ່າ, ພັກ-ລັດຖະບານ ຍາມໃດກໍຖືເອົາການກວດກາເປັນວຽກງານທີ່ສຳຄັນ ຊຶ່ງກອງປະຊຸມໃຫຍ່ ຄັ້ງທີ XI ຂອງພັກ ໄດ້ກຳນົດວ່າ: ວຽກງານກວດກາ ແມ່ນ ໜຶ່ງໃນພາລະບົດບາດ ແລະ ແບບແຜນນຳພາທີ່ສຳຄັນຂອງພັກບໍ່ມີການກວດກາກໍໝາຍຄວາມວ່າບໍ່ມີການນຳພາ. ໃນເງື່ອນໄຂປັດຈຸບັນ ກົນໄກເສດຖະກິດຕະຫຼາດ ຄະນະພັກແຕ່ລະຂັ້ນຕ້ອງເພີ່ມທະວີການນໍາພາ-ຊີ້ນໍາການຕິດຕາມກວດກາ ຕໍ່ການຈັດຕັ້ງຂັ້ນລຸ່ມ ແລະ ບຸກຄົນ ຕາມຫຼັກການຂອງພັກ ແລະ ກົດໝາຍຂອງລັດ. ໂດຍສະເພາະໃນເງື່ອນໄຂທີ່ປະເທດພວກເຮົາພວມປະເຊີນໜ້າກັບຄວາມຫຍຸ້ງຍາກ ແລະ ສິ່ງທ້າທາຍ ຕໍ່ການພັດທະນາເສດຖະກິດ-ສັງຄັມແຫ່ງຊາດ, ຍິ່ງຕ້ອງໄດ້ເພີ່ມທະວີ ແລະ ຍົກສູງຄຸນນະພາບຂອງວຽກງານກວດກາ ຄືດັ່ງກອງປະຊຸມວຽກງານກວດກາທົ່ວປະເທດ ປະຈໍາປີ 2022 ໄດ້

ເນັ້ນໜັກຫຼາຍບັນຫາ ຊຶ່ງໃນນັ້ນໄດ້ຕີລາຄາວ່າ ບັນຫາທີ່ສັງຄົມເປັນຫ່ວງຫຼາຍທີ່ສຸດໃນປັດຈຸບັນນີ້ແມ່ນປະກົດການສວຍໃຊ້ໜ້າທີ່ຕຳແໜ່ງ ເພື່ອຫາຜົນປະໂຫຍດສ່ວນຕົວດ້ວຍຫຼາຍຮູບຫຼາຍແບບ, ອັນນຳໄປສູ່ການລະເມີດກົດໝາຍ ແລະ ລະເມີດສິດເປັນເຈົ້າຂອງປະຊາຊົນທີ່ເກີດຂຶ້ນຢ່າງແຜ່ຫຼາຍໃນຖັນແຖວສະມາຊິກພັກ, ພະນັກງານ, ຫຼາຍກໍລະນີກ່ຽວຂ້ອງໂດຍກົງກັບຂະບວນການຄ້າຂາຍເຖື່ອນ, ການບຸກລຸກດິນ ແລະ ປ່າໄມ້, ການຂຸດຄົ້ນແຮ່ທາດຊະຊາຍ ຫຼື ກ່ຽວຂ້ອງກັບບັນຫາຢາເສບຕິດ, ຖັນແຖວພະນັກງານ-ສະມາຊິກພັກ, ທີ່ເສຍທາດຂາດຄຸນຈຳນວນບໍ່ໜ້ອຍກໍບໍ່ໄດ້ຮັບການກວດກາແກ້ໄຂຕາມກົດລະບຽບ ຢ່າງເດັດຂາດ, ທັນການ ແລະ ທົ່ວເຖິງ ຊຶ່ງຍັງສືບຕໍ່ເປັນສິ່ງທ້າທາຍ, ເປັນໄພອັນຕະລາຍຕໍ່ບົດບາດອິດທິພົນ ກໍຄືຄວາມສາມາດນຳພາ ແລະ ລັກສະນະນໍາໜ້າຂອງພັກເຮົາ.

ທ່ານກ່າວຕື່ມວ່າ: ຜ່ານການສະຫຼຸບຕີລາຄາການເຄື່ອນໄຫວວຽກງານກວດກາໃນໄລຍະກາງສະໄໝທີ່ຜ່ານມາ ເຖິງວ່າພວກເຮົາຈະສາມາດຍາດໄດ້ຜົນສຳເລັດໃນຫຼາຍດ້ານກໍຕາມ, ແຕ່ຍັງມີດ້ານອ່ອນ-ຂໍ້ຄົງຄ້າງ ຈຳນວນໜຶ່ງທີ່ຈະຕ້ອງໄດ້ຮັບການແກ້ໄຂ ເພື່ອຮັບປະກັນໃຫ້ແກ່ການປະຕິບັດແຜນງານ-ໂຄງການ ທີ່ໄດ້ກໍານົດໄວ້ໃນແຜນພັດທະນາລະບົບສານປະຊາຊົນ 5 ປີ ຄັ້ງທີ IV (2021-2025) ໃຫ້ມີຜົນສໍາເລັດຕາມລະດັບຄາດໝາຍທີ່ວາງໄວ້. ສະນັ້ນ, ການຈັດຝຶກອົບຮົມວຽກງານກວດກາໃນຄັ້ງນີ້ ສຸດທີ່ມີຄວາມໝາຍສໍາຄັນ ຊຶ່ງພວກສະຫາຍຈະໄດ້ຮັບຟັງການນຳສະເໜີຂອງສະຫາຍຮອງປະທານສານປະຊາຊົນສູງສຸດ ກ່ຽວກັບຄວາມຮູ້ທົ່ວໄປກ່ຽວກັບຈັນຍາບັນ-ຈັນຍາທໍາຂອງຜູ້ພິພາກສາ ແລະ ຂັ້ນຕອນການກວດກາຜູ້ພິພາກສາ ໃນການປະຕິບັດໜ້າທີ່; ນອກນັ້ນ ຈະໄດ້ແລກປ່ຽນຄວາມຮູ້ພື້ນຖານໃນການສືບສວນ-ສອບສວນ; ການແກ້ໄຂຜົນການກວດກາ ແລະ ຕິດຕາມການກວດກາ, ການຈັດຕັ້ງປະຕິບັດຜົນການກວດກາ; ການຄົ້ນຄວ້າແກ້ໄຂຄໍາຮ້ອງຟ້ອງ, ຮ້ອງທຸກ ແລະ ຄໍາສະເໜີ.

ສະນັ້ນ, ເພື່ອເຮັດໃຫ້ການຝຶກອົບຮົມໃນຄັ້ງນີ້ ໄດ້ຮັບຜົນດີ, ຂ້າພະເຈົ້າຮຽກຮ້ອງມາຍັງຄະນະຮັບຜິດຊອບ, ອາຈານ ແລະ ບັນດາທ່ານທີ່ເຂົ້າຮ່ວມຝຶກອົບຮົມໃນຄັ້ງນີ້ ຈົ່ງພ້ອມກັນເປັນເຈົ້າການໃນການປະຕິບັດຕາມລະບຽບ ແລະ ວາລະກອງປະຊຸມໃຫ້ເຂັ້ມງວດ; ສຸມທຸກສະຕິປັນຍາເຂົ້າໃນການຖ່າຍທອດຄວາມຮູ້, ແລກປ່ຽນ ແລະ ສົນທະນາ ໃຫ້ເປັນຂະບວນຟົດຟື້ນແຂງແຮງ, ມີບັນຍາກາດທີ່ສ້າງສັນ, ເຕັມໄປດ້ວຍເນື້ອໃນທີ່ອຸດົມສົມບູນ ທີ່ຈະເປັນຄວາມຮູ້ ແລະ ບົດຮຽນໃຫ້ແກ່ວຽກງານກວດກາໃນລະບົບສານປະຊາຊົນ ໃຫ້ໄດ້ຮັບການຈັດຕັ້ງປະຕິບັດຢ່າງມີປະສິດທິພາບ, ປະສິດທິຜົນດີຍິ່ງຂຶ້ນ.