ມອບ-ໂອນ ວຽກງານຄະນະກໍາມະການຄຸ້ມຄອງແຫ່ງຊາດ ເພື່ອການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ລາວ ໄປຂຶ້ນກັບກະຊວງການຕ່າງປະເທດ
ພິທີມອບ-ໂອນ ວຽກງານຂອງຄະນະກໍາມະການຄຸ້ມຄອງແຫ່ງຊາດ ເພື່ອການແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງຢູ່ ສປປ ລາວ ຈາກກະຊວງແຮງງານ ແລະ ສະຫວັດດີການສັງຄົມ ໄປຂຶ້ນກັບ ກະຊວງການຕ່າງປະເທດ ຢ່າງເປັນທາງການ ໄດ້ຈັດຂຶ້ນວັນທີ 1 ກັນຍາ 2023, ທີ່ກະຊວງການຕ່າງປະເທດ, ໂດຍທ່ານ ນາງ ໃບຄຳ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ແລະ ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີ ກະຊວງການຕ່າງປະເທດ.
ວຽກງານການແກ້ໄຂບັນຫາລະເບີດບໍ່ທັນແຕກ ແມ່ນໜຶ່ງໃນບຸລິມະສິດຂອງລັດຖະບານ ສປປ ລາວ ແລະ ໄດ້ຖືກກຳນົດເຂົ້າໃນວາລະແຫ່ງຊາດສະເໝີມາ. ຄວາມພະຍາຍາມຂອງລັດຖະບານ ສປປ ລາວ ໃນການແກ້ບັນຫາລະເບີດບໍ່ທັນແຕກ (ລບຕ) ໄດ້ລິເລີ່ມນັບແຕ່ຫລັງປະເທດຊາດຖືກປົດປ່ອຍ. ຈົນມາຮອດປີ 2004 ລັດຖະບານຈຶ່ງໄດ້ສ້າງຕັ້ງ ຄະນະກຳມະການຄຸ້ມຄອງແຫ່ງຊາດວ່າດ້ວຍການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ (ຄຊກລ) ທີ່ປະກອບມີກະຊວງຂະແໜງການກ່ຽວຂ້ອງ ເພື່ອເປັນກົນໄກສູນກາງໃນການຄຸ້ມຄອງ, ຊີ້ນຳວຽກງານດັ່ງກ່າວໃຫ້ເປັນໄປຕາມເປົ້າໝາຍ ໂດຍໄດ້ມີການປັບປຸງກົນໄກດັ່ງກ່າວຢ່າງເປັນປະຈຳຄືທີ່ຜ່ານມາ ຄຊກລ ແມ່ນເຄີຍຂື້ນກັບກະຊວງແຮງງານ ແລະ ສະຫວັດດີການສັງຄົມ, ຫ້ອງການສຳນັກງານນາຍົກລັດຖະມົນຕີ ເປັນຕົ້ນ. ເຊິ່ງການປັບປຸງໂຄງຮ່າງການຈັດຕັ້ງຂອງວຽກງານ ລບຕ ດັ່ງກ່າວແມ່ນສິ່ງທີ່ຈຳເປັນ ທີ່ລັດຖະບານຕ້ອງໄດ້ທົບທວນການປະຕິບັດ ແລະ ປັບປຸງພັດທະນາໃຫ້ດີຂື້ນເລື່ອຍໆເພື່ອໃຫ້ແທດເໝາະກັບສະພາບການຕົວຈິງນແຕ່ລະໄລຍະ.
