ປກສ ນະຄອນປາກເຊ ຈັບຕົວກຸ່ມຊາຍໜຸ່ມ ລັກລົດຈັກ 17 ຄັນມາດຳເນີນຄະດີ
ວັນທີ 30 ສິງຫາ 2023 ເຈົ້າໜ້າທີ່ກອງບັນຊາການ ປກສ ນະຄອນປາກເຊ ແຂວງຈຳປາສັກໄດ້ມອບລົດຈັກທີ່ຢຶດຄືນມາໄດ້ພ້ອມກັກຕົວເປົ້າໝາຍໄດ້ 4 ຄົນ.
ທ່ານ ພັນໂທ ແກ້ວວຽງໄຊ ອ່ອນໄຊວຽງ ຮອງຫົວໜ້າກອງບັນຊາການ ປກສ ນະຄອນປາກເຊ ໄດ້ລາຍງານໃຫ້ຮູ້ວ່າ: ເວລາ 23:00 ໂມງ ຂອງວັນທີ 9 ສິງຫາ 2023 ເຈົ້າໜ້າທີ່ວິຊາສະເພາະ ປກສ ນະຄອນປາກເຊ ໄດ້ຮັບແຈ້ງຈາກຜູ້ເສຍຫາຍຢູ່ ບ້ານໂພນສີໄຄ ນະຄອນປາກເຊວ່າ: ໄດ້ມີຄົນຮ້າຍຈໍານວນ 3 ຄົນ, ຮ່ວມກັນມາລັກລົດຈັກທີ່ຕິດເປັນຊາເລັງ ຂອງຕົນ ຊຶ່ງຈອດໄວ້ໜ້າຮ້ານຂາຍເຄື່ອງ. ມາຮອດ ວັນທີ 17 ສິງຫາ 2023 ເຈົ້າໜ້າທີ່ສາມາດກັກຕົວເປົ້າໝາຍໄດ້ທັງ 3 ຄົນ, ທີ່ຮ່ວມກັນກໍ່ເຫດ ຄື: ທ້າວ ຫວ່າງ ອາຍຸ 25 ປີ, ທ້າວ ວິໄຊ ອາຍຸ 30 ປີ, ທ້າວ ສົມພອນ ອາຍຸ 26 ປີ ແລະ ທ້າວ ສີພັນດອນ ອາຍຸ 40 ປີ.
ຜ່ານການສືບສວນ-ສອບສວນ ມາຮອດປັດຈຸບັນພວກກ່ຽວໄດ້ເຄື່ອນໄຫວລັກຊັບມາແລ້ວເປັນລົດຈັກຈໍານວນ 17 ຄັນ, ເຊິ່ງທາງເຈົ້າໜ້າທີ່ສາມາດ ເກັບກູ້ພາຫະນະຄືນມາໄດ້ທັງ 17 ຄັນ.
#ຂ່າວພາຍໃນລາວພັດທະນາ #ປກສນະຄອນປາກເຊ #ຈັບຕົວກຸ່ມຊາຍໜຸ່ມລັກລົດຈັກ
