ແຈ້ງເຕືອນນ້ຳຖ້ວມ ໂດຍສະເພາະລະດັບນໍ້າຢູ່ສະຖານີວັງວຽງ ແລະ ຜູ້ອາໄສຢູ່ລຽບຕາມແຄມນໍ້າຊ່ອງຈົ່ງມີສະຕິລະວັງ

ກົມອຸຕຸນິຍົມ ແລະ ອຸທົກກະສາດ ແຈ້ງເຕືອນນ້ຳຖ້ວມ ປະຈຳວັນທີ 27 ສິງຫາ 2023 ວ່າ: ເນື່ອງຈາກວ່າຝົນຍັງຈະສືບຕໍ່ຕົກໃນລະດັບປານກາງຢູ່ແຂວງພາກກາງຕື່ມອີກ, ເຊິ່ງຍັງຈະເຮັດໃຫ້ລະດັບແມ່ນໍ້າສາຂາຍັງຈະສືບຕໍ່ເພີ່ມຂຶ້ນ ໂດຍສະເພາະລະດັບນໍ້າຢູ່ສະຖານີວັງວຽງ (ນໍ້າຊ່ອງ) ເມືອງວັງວຽງ ແຂວງ ວຽງຈັນ, ຍັງຈະສືບຕໍ່ສູງກ່ວາເຂດລະດັບເຕືອນໄພ (ລະດັບນໍ້າເຂດເຕືອນໄພ 3.50 ແມັດ; ເຂດອັນຕະລາຍ 4.50 ແມັດ).

ດັ່ງນັ້ນ, ຈຶ່ງແຈ້ງເຕືອນເຖິງປະຊາຊົນບັນດາເຜົ່າ ແລະ ອໍານາດການປົກຄອງທຸກພາກສ່ວນ ທີ່ອາໄສຢູ່ລຽບຕາມແຄມນໍ້າຊ່ອງລົງໄປຫາປາກແມ່ນໍ້າຊ່ອງ ໂດຍສະເພາະເມືອງວັງວຽງ ແຂວງວຽງຈັນ, ຈົ່ງມີສະຕິລະວັງຕໍ່ສະພາບຝົນຕົກທີ່ຈະເຮັດໃຫ້ເກີດ ມີນໍ້າຖ້ວມຊຸ ແລະ ນໍ້າຖ້ວມອັ່ງ ເກີດຂຶ້ນໄດ້ໃນໄລຍະ 1-2 ວັນຕໍ່ໜ້ານີ້.

ຂໍໃຫ້ຕິດຕາມການລາຍງານຂ່າວພະຍາກອນອາກາດ ແລະ ລະດັບນ້ຳຈາກກົມອຸຕຸນິຍົມ ແລະ ອຸທົກກະສາດຢ່າງຕໍ່ເນື່ອງ.