ຈູດທໍາລາຍ ສິນຄ້າໝົດອາຍຸບໍລິໂພກ ທີ່ສັ່ງຊື້ມາຈາກ ສປ ຈີນ ຫລາຍລາຍການ

ວັນທີ 24 ສິງຫາ 2023 ຜ່ານມານີ້ ປກສ ແຂວງອຸດົມໄຊ ໄດ້ມີການຈູດທຳລາຍສິນຄ້ານຳເຂົ້າຜິດກົດໝາຍ ແລະ ໝົດອາຍຸບໍລິໂພກ ຫລາຍລາຍການ ທີ່ຊື້ມາຈາກ ສປ ຈີນ.

ທ່ານ ພັທ ບຸນທ່ຽງ ເມກທະນົງໄຊ ຫົວໜ້າພະແນກຕໍາຫລວດສະກັດກັ້ນ-ຕ້ານອາຊະຍາກໍາຊັບພະຍາກອນທໍາມະຊາດ ແລະ ສິ່ງແວດລ້ອມ ປກສ ແຂວງອຸດົມ ລາຍງານວ່າ: ສິນຄ້າສໍາເລັດຮູບໝົດອາຍຸບໍລິໂພກຈໍານວນດັ່ງກ່າວທີ່ກວດພົບ ວັນທີ 13 ສິງຫາ 2023 ຜ່ານມາຈາກນັກທຸລະກິດຈໍານວນໜຶ່ງນໍາເອົາສິນຄ້າສໍາເລັດຮູບທີ່ໝົດອາຍຸ ບໍລິໂພກມາວາງຂາຍຢູ່ຕະຫລາດນັດ ( ເດີ່ນກິລາແຂວງອຸດົມໄຊ ) ປະກອບມີ ຊີ້ນໄກ່ອົບ, ຂາໄກ່ອົບ ຈໍານວນ 694 ກັບ, ຕີນໄກ່ດອງຈໍານວນ 307 ຖົງໃຫຍ່, ປີກເປັດອົບ, ປີກໄກ່ອົບ 306 ກັບ ແລະ 280 ຖົງນ້ອຍ, ຫົວບົວ 80 ຖົງ, ເຕົາຮູ້ກາກຸ້ງ 274 ຖົງໃຫຍ່, ຖົ່ວຂຽວຈໍານວນ 369 ຖົງໃຫຍ່ ແລະ 60 ຖົງນ້ອຍ, ເຂົ້າໜົມມັນຝຣັ່ງ 290 ຖົງໃຫຍ່, ປະເພດໝີ່ປ໋ອງ 356 ປ໋ອງ, ໝີ່ຖົງ 323 ຖົງ, ເຂົ້າໜົມຖົ່ວດິນທອດຈໍານວນ 5 ແກັດ, ນໍ້າຫວານຈໍານວນ 14 ກັບ ແລະ ສິນຄ້າບໍລິໂພກອື່ນໆອີກຈໍານວນໜຶ່ງ.

ນອກຈາກນີ້ ເຈົ້າໜ້າທີ່ຍັງໄດ້ມີການສືບສວນ-ສອບສວນ ທ້າວ ຢວນເວີຍຈົ່ງ ອາຍຸ 36 ປີ, ເຈົ້າຂອງສິນຄ້າ ໄດ້ໃຫ້ສາລະພາບວ່າ: ສິນຄ້າ ທີ່ເຈົ້າໜ້າທີ່ກວດກາພົບເຫັນແມ່ນຂອງຕົນແທ້ເຊິ່ງໄດ້ສັ່ງຊື້ສິນຄ້າມາຈາກ ສປ ຈີນ. ເຊິ່ງເປັນການກະທໍາຜິດໃນມາດຕາ 275 ແລະ 283 ປະມວນກົດໝາຍອາຍາຕໍ່ບັນຫາດັ່ງກ່າວທາງເຈົ້າໜ້າທີ່ໄດ້ດໍາເນີນການສຶກສາອົບຮົມ-ກ່າວເຕືອນ ແລະ ດໍາເນີນຄະດີຕາມລະບຽບກົດໝາຍ.