6 ເດືອນຕົ້ນປີ 2023 ເສດຖະກິດແຂວງຄໍາມ່ວນ ຂະຫຍາຍຕົວໃນລະດັບ 5,34% ຄິດເປັນມູນຄ່າຕາມລາຄາໃນປີ ເທົ່າກັບ 14.891 ຕື້ກີບ

ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນໄດ້ລາຍງານກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານໄລຍະກາງສະໄໝ ປີ 2021-2023, ທິດທາງແຜນການທ້າຍສະໄໝ ປີ 2023-2025 ແລະ ໄລຍະ 6 ເດືອນຕົ້ນປີ, ທິດທາງ 6 ເດືອນທ້າຍປີ 2023 ຕໍ່ກອງປະຊຸມສະໄໝສາມັນ ເທື່ອທີ່ 5 ຂອງສະພາປະຊາຊົນແຂວງຄໍາມ່ວນ ຊຸດທີ II ໃນວັນທີ 22 ສິງຫາ 2023 ວ່າ: ໃນໄລຍະ 2 ປີເຄິ່ງຜ່ານມາ ແຂວງຄຳມ່ວນ ປະເຊີນກັບຄວາມຫຍຸ້ງຍາກທາງດ້ານເສດຖະກິດ-ການເງິນ, ເງິນກີບອ່ອນຄ່າ, ລາຄານໍ້າມັນເຊື້ອໄຟ-ລາຄາສິນຄ້າເໜັງຕີງສູງຂຶ້ນ, ບັນຫາຢາເສບຕິດ, ບັນຫາປະກົດການຫຍໍ້ທໍ້ໃນສັງຄົມ, ຜົນກະທົບຈາກການລະບາດຂອງພະຍາດ ໂຄວິດ-19 ຊຶ່ງໄດ້ສົ່ງຜົນກະທົບທາງກົງ ແລະ ທາງອ້ອມ ຕໍ່ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມຂອງແຂວງ. ຜ່ານການຈັດຕັ້ງປະຕິບັດເສດຖະກິດຂອງແຂວງຍັງສືບຕໍ່ຂະຫຍາຍຕົວຢ່າງຕໍ່ເນື່ອງ, ໃນປີ 2021 ເສດຖະກິດຂະຫຍາຍຕົວຢູ່ໃນລະດັບ 5,73%, ປີ 2022 ຂະຫຍາຍຕົວ 5,85%, ໄລຍະ 6 ເດືອນຕົ້ນປີ 2023 ຂະຫຍາຍຕົວຢູ່ໃນລະດັບ 5,34% ຄິດເປັນມູນຄ່າຕາມລາຄາໃນປີ ເທົ່າກັບ 14.891 ຕື້ກີບ.

ແຕ່ເຖິງວ່າເສດຖະກິດຂອງແຂວງ ຈະມີການຂະຫຍາຍຕົວຢ່າງຕໍ່ເນື່ອງ ແຕ່ຍັງມີບາງວຽກງານຈຸດສຸມຈຳນວນໜຶ່ງ ທີ່ອົງການປົກຄອງແຂວງຈະຕ້ອງໄດ້ສຸມໃສ່ໃນຕໍ່ໜ້າເປັນຕົ້ນ: ເພີ່ມທະວີປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານໃນທົ່ວແຂວງໃຫ້ແຂງແຮງຂຶ້ນກວ່າເກົ່າ, ປັບປຸງແກ້ໄຂສິ່ງທີ່ຍັງອຸດຕັນ, ກີດຂວາງ ໃຫ້ແກ່ການລົງທຶນຂອງເອກະຊົນ ທັງພາຍໃນ ແລະ ຕ່າງປະເທດ, ສຸມໃສ່ການຈັດເກັບລາຍຮັບເຂົ້າງົບປະມານໃຫ້ບັນລຸ ແລະ ລື່ນແຜນການ, ຊຸກຍູ້, ສົ່ງເສີມການຜະລິດພາຍໃນ ເພື່ອທົດແທນການນຳເຂົ້າໃຫ້ແຂງແຮງ ແລະ ແທດເຖິງ, ຕິດຕາມ, ເຝົ້າລະວັງການປ່ຽນແປງຂອງດິນຟ້າອາກາດ, ລະດັບນໍ້າ ໃຫ້ທັນກັບສະພາບການ ເພື່ອກຽມຄວາມພ້ອມຮັບມືຕ້ານແລ້ງ, ຕ້ານຖ້ວມທີ່ອາດຈະເກີດຂຶ້ນ, ເພີ່ມທະວີການຄຸ້ມຄອງລາຄາສິນຄ້າ ທີ່ສົ່ງຜົນກະທົບໂດຍກົງຕໍ່ການດຳລົງຊີວິດຂອງປະຊາຊົນ, ເພີ່ມທະວີການຄຸ້ມຄອງ, ຕິດຕາມ, ກວດກາ ການຂຸດຄົ້ນ-ສົ່ງອອກແຮ່ທາດຕ່າງໆ ໃຫ້ປະຕິບັດຕາມສັນຍາ ແລະ ລະບຽບກົດໝາຍຢ່າງເຂັ້ມງວດ.