ປີ 2023 ນີ້ຈະມີຝົນລິນຫຼາຍກວ່າປົກກະຕິໃນຂອບເຂດທົ່ວປະເທດ ແລະ ພາຍຸຈະເຄື່ອນຜ່ານ ສປປ ລາວ 2-4 ຫົວ ໄລຍະເດືອນກໍລະກົດ-ເດືອນຕຸລາ

ວັນທີ 3 ສິງຫາ 2023, ກອງປະຊຸມຄະນະກຳມະການຄຸ້ມຄອງໄພພິບັດຂັ້ນສູນກາງ ຈັດຂຶ້ນທີ່ກະຊວງປ້ອງກັນປະເທດ ໂດຍເປັນປະທານຂອງ ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ປະທານ ຄພສ, ມີທ່ານ ນາງ ໃບຄໍາ ຂັດຕິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ) ຮອງປະທານຜູ້ປະຈໍາການ ຄະນະກຳມະການຄຸ້ມຄອງໄພພິິບັດຂັ້ນສູນກາງ (ຄພສ).
ທ່ານ ພົນຕີ ຈັນທອງ ສອນຕະອາດ ຮອງລັດຖະມົນຕີ ກະຊວງປ້ອງກັນປະເທດ ໄດ້ລາຍງານຫຍໍ້ການກະກຽມພ້ອມຕອບໂຕ້ໄພພິບັດປີ 2023 ໂດຍສະເພາະໃນໄລຍະ 6 ເດືອນຕົ້ນປີ 2023,ທົ່ວປະເທດ ມີໄພພິບັດ ເຊັ່ນ: ຟ້າຜ່າ, ລົມພາຍຸພັດ, ໄຟໄໝ້ ແລະ ແຜ່ນດິນໄຫວ ເກີດຂື້ນ ທັງໝົດ 31 ຄັ້ງ, ສົ່ງຜົນກະທົບໂດຍກົງໃນ10 ແຂວງ, ມີ 25 ເມືອງ, 54 ບ້ານ, 371 ຄອບຄົວ, 114 ຄົນ,ຍິງ 55 ຄົນ (ນະຄອນຫຼວງວຽງຈັນ, ແຂວງຜົ້ງສາລີ, ແຂວງວຽງຈັນ, ແຂວງຫຼວງນ້ຳທາ, ແຂວງອຸດົມໄຊ, ແຂວງຫຼວງພະບາງ, ແຂວງຫົວພັນ, ແຂວງໄຊຍະບູລີ, ແຂວງຈຳ ປາສັກ ແລະ ແຂວງອັດຕະປື), ມີໂຮງຮຽນ, ວັດ, ຂົວ ແນວລະ 1 ແຫ່ງ, ຕະຫຼາດ 2 ແຫ່ງ, ລວມມູນຄ່າເສຍຫາຍ ຫຼາຍກວ່າ 1ຕື້469 ລ້ານກີບ, ຄາດຄະເນວ່າ: ແຕ່ເດືອນ ມິຖຸນາ ຫາ ເດືອນ ກັນຍາ ປີ 2023 ຈະມີຝົນຕົກຫຼາຍກວ່າເກນປົກກະຕິ ເເລະ ໃນໄລຍະເດືອນ ກໍລະກົດ ຫາ ເດືອນ ຕຸລາ ຈະມີລົມພາຍຸຈະເຄື່ອນຜ່ານ 2-4 ຫົວ.
ກອງປະຊຸມຍັງໄດ້ຄົ້ນຄວ້າປຶກສາຫາລື ແລະ ເອກະພາບ ແບ່ງຄວາມຮັບຜິດຊອບຂອງຄະນະກໍາມະການຄຸ້ມຄອງໄພພິບັດ ຂັ້ນສູນກາງ, ນໍາສະເໜີແລກປ່ຽນຂໍ້ມູນກ່ຽວກັບການກຽມຄວາມພ້ອມຮັບມືກັບໄພພິບັດໃນລະດູຝົນ ປີ 2023, ລວມທັງກົນໄກການປະສານງານ ແລະ ການລາຍງານສະພາບໄພພິບັດ ແລະ ການຊ່ວຍເຫຼືອໄພພິບັດ ທັງໄລຍະສຸກເສີນ ແລະ ການຟື້ນຟູຄືນຫຼັງໄພພິບັດ.
ໂອກາດນີ້, ປະທານກອງປະຊຸມກໍໄດ້ໂອ້ລົມ ແລະ ປຶກສາຫາລື ກັບບັນດາຄະນະກໍາມະການຄຸ້ມຄອງໄພພິບັດຂັ້ນສູນກາງ ແລະ ຮຽກຮ້ອງໃຫ້ທຸກຄົນສືບຕໍ່ປະຕິບັດໜ້າທີ່ຢ່າງຕັ້ງໜ້າ ແລະ ກຽມພ້ອມ ຢູ່ຕະຫຼອດເວລາ ເພາະພວກເຮົາ ຄາດກະບໍ່ໄດ້ວ່າມັນຈະເກີດຂຶ້ນຢູ່ໃສເວລາໃດ, ສະນັ້ນພວກເຮົາ ທຸກຄົນຕ້ອງເປັນເຈົ້າການນໍາກັນ ແລະ ພ້ອມກັນສຸມໃສ່ແກ້ໄຂຈຸດທີ່ມັນເກີດໃຫ້ທັນການ.