ເມືອງບົວລະພາ ປັບຂຶ້ນລາຄາສິນຄ້າປະເພດ ຊີ້ນງົວ ຊີ້ນຄວາຍ ແລະ ຊີ້ນໝູ

ຫ້ອງການອຸດສາຫະກຳ ແລະ ການຄ້າເມືອງບົວລະພາ ແຂວງຄຳມ່ວນ ຈັດກອງປະຊຸມຮ່ວມກັບຂະແໜງການທີ່ກ່ຽວຂ້ອງພາຍໃນເມືອງ ເພື່ອປຶກສາຫາລືກ່ຽວກັບການຂຶ້ນລາຄາສິນຄ້າປະເພດ ( ຊີ້ນງົວ, ຊີ້ນຄວາຍ ແລະ ຊີ້ນໝູ)  ໃນວັນທີ 26 ກໍລະກົດ 2023 ຜ່ານມາ,

ກອງປະຊຸມ ພ້ອມກັນຄົ້ນຄວ້າ ແລະ ເຫັນດີເປັນເອກະພາບກັນດັ່ງນີ້: ເຫັນດີປັບລາຄາຊີ້ນງົວ, ຄວາຍ ຂຶ້ນຈາກປົກກະຕິ 80.000 ກີບ/ໂລ ປັບຂຶ້ນເປັນ 90.000 ກີບ/ໂລ, ເຫັນດີ ປັບລາຄາ ຊີ້ນໝູ ຈາກລາຄາປົກກະຕິ 65.000 ກີບ/ໂລ ປັບຂຶ້ນເປັນ 70.000 ກີບ /ໂລ.

ໃນຕອນທ້າຍ ຍັງໄດ້ຮັບຟັງການໂອ້ລົມ ຂອງທ່ານ ພູວຽງ ສີສູນທອນ ຮອງເຈົ້າເມືອງ ເມືອງບົວລະພາ ໃນນັ້ນ ທ່ານຍັງໄດ້ເນັ້ນໜັກຕື່ມ ທາງດ້ານຄຸນນະພາບຂອງສັດ ກໍຄື ງົວ, ຄວາຍ ແລະ ໝູ ກ່ອນຈະນຳເຂົ້າໂຮງຂ້າສັດເພື່ອນຳໄປຈຳໜ່າຍ ເພື່ອເຮັດໃຫ້ຊີ້ນດັ່ງກ່າວ ມີຄຸນນະພາບ ແລະ ຖືກຫລັກອະນາໄມ  ພ້ອມກັນນັ້ນ ທ່ານຍັງໄດ້ເນັ້ນໜັກຕື່ມ ກ່ຽວກັບການຈັດບຸກຄະລາກອນເຂົ້າໃນວຽກງານດັ່ງກ່າວຕ້ອງໃຫ້ຖືກຕ້ອງ ແລະ ສອດຄ່ອງກັບຄວາມເປັນຈິງ ເພື່ອເຮັດໃຫ້ວຽກງານດັ່ງກ່າວໄດ້ຮັບຜົນສຳເລັດຕາມຄາດໝາຍ.