ສ.ເກົາຫຼີ ອະນຸມັດແຜນຊ່ວຍ ສປປ ເກົາຫຼີ ມູນຄ່າ 8 ລ້ານໂດລາ
ສຳນັກຂ່າວຢອນຮັບຂອງ ສ.ເກົາຫຼີ ລາຍງານວ່າ: ລັດຖະບານ ສ.ເກົາຫຼີ ອະນຸມັດແຜນຊ່ວຍເຫຼືອດ້ານມະນຸດສະທຳມູນຄ່າ 8 ລ້ານໂດລາສະຫະລັດ ໃຫ້ແກ່ ສປປ ເກົາຫຼີ ແລະ ກ່າວວ່າ: ຄວາມເຄັ່ງຕຶງຢູ່ແຫຼມເກົາຫຼີບໍ່ກະທົບຕໍ່ການສົ່ງການຊ່ວຍເຫຼືອດັ່ງກ່າວ.
ການອະນຸມັດແຜນຊ່ວຍເຫຼືອດ້ານມະນຸດສະທຳຂອງ ສ.ເກົາຫຼີ ມີຂຶ້ນພາຍຫຼັງກອງປະຊຸມລະຫວ່າງເຈົ້າໜ້າທີ່ລັດຖະບານທີ່ມີທ່ານ ໂຊ ມາຢອງຢອນ ລັດຖະມົນຕີວ່າການກະຊວງລວມຊາດເປັນປະທານ. ລັດຖະບານ ສ.ເກົາຫຼີ ອອກຖະແຫຼງການລະບຸວ່າ: ສ.ເກົາຫຼີ ມຸ່ງຫວັງຈະຈັດສົ່ງການຊ່ວຍເຫຼືອດ້ານຜະລິດຕະພັນໃຫ້ແກ່ເດັກ ແລະ ແມ່ຍິງຖືພາຢູ່ ສປປ ເກົາຫຼີ ຜ່ານໂຄງການອາຫານໂລກມູນຄ່າ 4,5 ລ້ານໂດລາສະຫະລັດ ແລະ ໃຫ້ການຊ່ວຍເຫຼືອດ້ານວັກແຊງ ແລະ ຢາປິ່ນປົວຜ່ານອົງການທຶນເພື່ອເດັກແຫ່ງສະຫະປະຊາຊາດ (ອຸຍນີເຊບ) ອີກມູນຄ່າ 3,5 ລ້ານໂດລາສະຫະລັດ. ເຖິງຢ່າງໃດກໍດີ, ຈະມີການຢືນຢັນເວລາຈັດສົ່ງການຊ່ວຍເຫຼືອ ແລະ ຈຳນວນສິ່ງຂອງທີ່ຈະສົ່ງອີກເທື່ອໜຶ່ງ.
ທ່ານ ໂຊ ກ່າວຕໍ່ກອງປະຊຸມວ່າ: ລັດຖະບານເນັ້ນມາໂດຍຕະຫຼອດກ່ຽວກັບການຈັດສົ່ງການຊ່ວຍເຫຼືອດ້ານມະນຸດສະທຳໃຫ້ແກ່ເດັກ ແລະ ແມ່ຍິງຖືພາທີ່ພວມຜະເຊີນກັບຄວາມຍາກລຳບາກຢູ່ ສປປ ເກົາຫຼີ ໂດຍບໍ່ຄຳນຶງເຖິງບັນຫາຄວາມຂັດແຍ່ງທາງການເມືອງ. ສ່ວນທ່ານນາງ ຄາຣິນ ຮຸລຊອບ ຜູ້ອຳນວຍການສຳນັກງານອຸຍນີເຊບປະຈຳພາກພື້ນອາຊີຕາເວັນອອກ ແລະ ປາຊີຟິກ ຖະແຫຼງວ່າ: ເດັກນ້ອຍຢູ່ ສປປ ເກົາຫຼີ ປະມານ 200.000 ຄົນພວມປະສົບບັນຫາຂາດສານອາຫານຮຸນແຮງຈາກສະພາບຂາດເຂີນອາຫານ ແລະ ຢາ ສົ່ງຜົນກະທົບຕໍ່ການຈະເລີນເຕີບໃຫຍ່ ແລະ ເປັນອັນຕະລາຍເຖິງຊີວິດ. ສິ່ງເຫຼົ່ານີ້ຄືບັນຫາທີ່ເກີດຂຶ້ນຢູ່ ສປປ ເກົາຫຼີ.
