ໂຮງໝໍສູນກາງ 103 ກອງທັບ ລາວ-ຫວຽດນາມ ຜ່າຕັດປ່ຽນຖ່າຍໄຂ່ຫຼັງສຳເລັດ

ໃນລະຫວ່າງວັນທີ 26-27 ກໍລະກົດ 2023 ໂຮງໝໍສູນກາງ 103 ກອງທັບປະຊາຊົນລາວ ຮ່ວມມືກັບ ໂຮງໝໍ 103 ກອງທັບປະຊາຊົນຫວຽດນາມ ສຳເລັດການຜ່າຕັດປ່ຽນຖ່າຍໄຂ່ຫຼັງ 2 ກໍລະນີ (ກໍລະນີທີ 5 ແລະ ທີ 6) ທັງ 2 ກໍລະນີຄົນເຈັບນີ້ ມີເພດຊາຍ 1, ເພດຍິງ 1 ເປັນພະຍາດໄຂ່ຫຼັງຊຸດໂຊມມາຫຼາຍປີ ແລະ ຟອກເລືອດມາເປັນປະຈໍາ. ພິເສດຄົນເຈັບເພດຍິງ ເຄີຍໄດ້ປ່ຽນຖ່າຍໄຂ່ຫຼັງມາກ່ອນແຕ່ປີ 2014, ແຕ່ຍ້ອນສະພາບການແຜ່ລະບາດຂອງພະຍາດໂຄວິດ-19 ຢ່າງຮ້າຍແຮງໃນທົ່ວໂລກ ຈຶ່ງບໍ່ສາມາດເຂົ້າຮັບການປິ່ນປົວໄດ້ຕໍ່ເນື່ອງ ເຮັດໃຫ້ໄຂ່ຫຼັງທີ່ໄດ້ປ່ຽນຖ່າຍເສຍໜ້າທີ່ການ.

ການຜ່າຕັດທັງ 2 ກໍລະນີ ໃຊ້ເວລາຜ່າຕັດຄົນລະປະມານ 3 ຊົ່ວໂມງຈິ່ງສໍາເລັດ. ພາຍຫຼັງການຜ່າຕັດໄດ້ຕິດຕາມຢ່າງໃກ້ຊິດໄລຍະໜຶ່ງ ປັດຈຸບັນສະພາບຮ່າງກາຍຄົນເຈັບທັງ 2 ກໍລະນີດີຂຶ້ນຮູ້ສຶກມີເຫື່ອແຮງຫຼາຍຂຶ້ນ, ອາການອິດເມື່ອຍຫຼຸດລົງຈະແຈ້ງ, ກິນອາຫານແຊບ ແລະ ໄດ້ຫຼາຍຂຶ້ນ, ຖ່າຍເບົາໄດ້ນໍ້າປັດສະວະຈໍານວນຫຼາຍ, ບັນດາຜົນກວດຕີລາຄາສະພາບຮ່າງກາຍລວມ ແລະ ສະພາບໜ້າທີ່ການໄຂ່ຫຼັງ ແມ່ນດີຂຶ້ນເລື້ອຍໆ, ປັດຈຸບັນແມ່ນໄດ້ກັບຄືນພາວະປົກກະຕິ ຄືຄົນທໍາມະດາທົ່ວໄປ.

ມາຮອດປັດຈຸບັນການຮ່ວມມືລະຫວ່າງໂຮງໝໍສູນກາງ 103 ກອງທັບປະຊາຊົນລາວ ແລະ ໂຮງໝໍສູນກາງ 103 ກອງທັບປະຊາຊົນຫວຽດນາມ ໄດ້ສໍາເລັດການຜ່າຕັດປ່ຽນຖ່າຍໃຂ່ຫຼັງທັງໝົດ 6 ກໍລະນີ, ຄົນເຈັບ ທັງ 6 ຄົນມີສຸຂະພາບດີສາມາດໃຊ້ຊີວິດໄດ້ຄືຄົນປົກກະຕິທົ່ວໄປ.