ລາວ-ອັງກິດ ຮ່ວມລົງນາມການຮ່ວມມື ໂດຍເນັ້ນໃສ່ການຄຸ້ມຄອງປ່າສະຫງວນ ປັບປຸງຊີວິດການເປັນຢູ່ ແລະ ພັດທະນາເສດຖະກິດ

ວັນທີ 28 ກໍລະກົດ 2023, ພິທີເຊັນບົດບັນທຶກຄວາມເຂົ້າໃຈ ວ່າດ້ວຍ ການຮ່ວມມື ພາຍໃຕ້ ກອງທຶນຄວາມຫຼາກຫຼາຍທາງດ້ານຊີວະນາໆພັນຕາມພູມີທັດ ລະຫວ່າງ ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຕາງໜ້າໂດຍ ກະຊວງກະສິກໍາ ແລະ ປ່າໄມ້ ແລະ ລັດຖະບານ ແຫ່ງ ສະຫະຣາຊະອານາຈັກອັງກິດ ແລະ ອຽກລັງເໜືອ ຕາງໜ້າໂດຍ ກະຊວງ ສິ່ງແວດລ້ອມ, ອາຫານ ແລະ ວຽກງານຊົນນະບົດ, ການເຊັນບົດບັນທຶກຄວາມເຂົ້າໃຈສະບັບນີ້ ແມ່ນຈະຈັດຕັ້ງປະຕິບັດໄລຍະເວລາ 8 ປີ (2023-2030) ກອງທຶນດັ່ງກ່າວຈະສະໜອງທຶນຊ່ວຍເຫຼືອລ້າ 15 ລ້ານ ເອີໂຣ ໃຫ້ບັນດາປະເທດລຸ່ມແມ່ນໍ້າຂອງ ຊຶ່ງປະກອບ ມີ ສປປ ລາວ,​ ສສ ​ຫວຽດນາມ ແລະ ຣາຊະອານະຈັກ ກໍາປູເຈຍ ໃນນັ້ນ ສປປ ລາວ ຈະໄດ້ຮັບ 5 ລ້ານ ເອີໂຣ, ເປົ້າໝາຍຫຼັກແມ່ນຈະເລັ່ງໃສ່ ການຄຸ້ມຄອງປ່າສະຫງວນ,​ ການປັບປຸງ ຊີວິດການເປັນຢູ່ ແລະ ການພັດທະນາເສດຖະກິດ ໂດຍຮ່ວມງານກັບພາກສ່ວນເອກະຊົນ ເພື່ອກໍໃຫ້ເກີດຕະຫຼາດການຜະລິດແບບຍືນຍົງ ໂດຍການຍົກສູງການບັງຄັບໃຊ້ກົດໝາຍ ແລະ ການວາງແຜນການນໍາໃຊ້ທີ່ດິນ ແລະ ການກໍານົດກົນໄກການສະໜອງເງິນຍືນຍົງ ສະໜັບສະໜູນການພັດທະນາໃນໄລຍະຍາວ, ຕາງໜ້າເຊັນບົດບັນທຶກດັ່ງກ່າວໃນຄັ້ງນີ້ໂດຍ ທ່ານ ກິແກ້ວ ສິງນາວົງ ຮອງລັດຖະມົນຕີກະຊວງກະສິກໍາ ແລະ ປ່າໄມ້ ແລະ ທ່ານ ຄາສແຊວ ກຣີຊອນ ອຸປະທູດຊົ່ວຄາວ ອັງກິດ ປະຈໍາລາວ ໂດຍເປັນກຽດເຂົ້າຮ່ວມເປັນສັກຂີພະຍານຂອງ ທ່ານ ປອ. ເພັດ ພົມພີພັກ ລັດຖະມົນຕີກະຊວງກະສິກໍາ ແລະ ປ່າໄມ້, ພ້ອມດ້ວຍຫົວໜ້າຮອງຫົວໜ້າຫ້ອງການ, ກົມ ອ້ອມຂ້າງກະຊວງກະສິກໍາ ແລະ ປ່າໄມ້, ຕາງໜ້າຈາກກະຊວງການຕ່າງປະເທດ, ກະຊວງແຜນການ ແລະ ການລົງທຶນ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ຄູ່ຮ່ວມພັດທະນາ ແລະ ພາກສ່ວນກ່ຽວຂ້ອງເຂົ້າຮ່ວມ.