10 ຫົວຂໍ້ ນະໂຍບາຍຈຸດສຸມວຽກງານລັດຖະບານ ປະຈຳເດືອນສິງຫາ 2023 ຈະນຳເອົາຜົນປະໂຫຍດ ແລະ ຄວາມຢູ່ດີກິນດີມາສູ່ປະຊາຊົນຢ່າງແທ້ຈິງ

ໂດຍ: ແດນຜາຕຸງ 

ໃນກອງປະຊຸມລັດຖະບານສະໄໝສາມັນປະຈຳເດືອນກໍລກົດ 2023 ທີ່ດຳເນີນໄປໃນວັນທີ 24 – 25 ກໍລະກົດ2023, ໄດ້ກຳນົດແຜນວຽກທີຈະປະຕິບັດໃນເດືອນສິງຫາໄວ້ 10 ຫົວຂໍ້ໃຫຍ່ທີ່ສຳຄັນເພື່ອຈັດຕັ້ງປະຕິບັດໃນການແກ້ໄຂຄວາມຫຍຸ້ງຍາກໃນການພັດທະນາເສດຖະກິດ-ສັງຄົມ ຂອງປະເທດ ທີ່ທຸກພາກສ່ວນຕ້ອງສຸມໃສ່ປະຕິບັດໃຫ້ເປັນຈິງ ເຊັ່ນ: ວຽກງານປ່ອງກັນຊາດ, ວຽກງານປ້ອງກັນຄວາມສະຫງົບ, ການແກ້ໄຂຄວາມເຄັ່ງຮ້ອນຈຳນວນໜຶ່ງ, ຂົງເຂດພະລັງງານ ແລະ ບໍ່ແຮ່, ຂົງເຂດທະນາຄາານ, ຂົງເຂດອຸດສາຫະກຳ ແລະ ການຄ້າ, ຂົງເຂດໂຍທາທິການ ແລະຂົນສົ່ງ, ຂົງເຂດກະສິກຳ ແລະ ປ່າໄມ້, ຂົງເຂດວຽກງານ ວັດທະນະທຳ-ສັງຄົມ ແລະ ຂົງເຂດວຽກງາານການຕ່າງປະເທດ,
ສຳລັບວຽກງານການແກ້ໄຂບັນຫາທີ່ເຄັ່ງຮ້ອນຈຳນວນນຶ່ງທີ່ເປັນຜົນກະທົບຕໍ່ການດຳລົງຊີວິດຂອງສັງຄົມໃນປັດຈຸບັນນີ້ ລັດຖະບານຈະສຸມໃສ່ປະຕິບັດໃນເດືອນສິງຫາ2023ນີ້ ແມ່ນສຸມໃສ່ແກ້ໄຂບັນຫາເງິນເຟີ້,ອັດຕາແລກປ່ຽນເງິນຕາ, ລາຄາສິນຄ້າທີ່ເພີ່ມສູງຂຶ້ນ ແລະ ໜີ້ສິນຕ່າງປະເທດ ຕາມມະຕິຕົກລົງຂອງ ກົມການເມືອງສູນກາງພັກ ສບັບເລກທີ19/ກມສພ, ລົງວັນທີ 30 ມິຖຸນາ 2023 ໂດຍສະເພາແມ່ນເອົາໃຈໃສ່ຈັດຕັ້ງປະຕິບັດຄຳສັ່ງຂອງນາຍົກລັດຖະມົນຕີ ວ່າດ້ວຍການຈັດຕັ້ງປະຕິບັດການຄຸ້ມຄອງເງິນຕາຕ່າງປະເທດສະບັບເລກທີ10/ນຍ, ລົງວັນທີ 14 ກໍລະກົດ 2023 ໃຫ້ເຂັ້ມງວດ ແລະ ສຸມໃສ່ປະຕິບັດມາດຕະການຂອງແຕ່ລະວຽກງານຈຸດສຸມ ໃນແຜນເຄື່ອນໄຫວວຽກງານຈຸດສຸມຂອງຄະນພສະເພາະກິດ, ຈາກນັ້ນແມ່ນສືບຕໍ່ສຸມໃສ່ເກັບລາຍຮັບງົບປະມານບັນລຸຕາມແຜນ ທີ່ສະພາແຫ່ງຊາດຮັບຮອງ, ໃນນັ້ນໃຫ້ສຸມໃສ່ເລັ່ງຂະຫຍາຍຖານຈັດເກັບລາບຮັບຜ່ານລະບົບ ແລະ ເຄື່ອງມືທັນສະໄໝໃຫ້ຫຼາຍກວ່າເກົ່າ ແລະ ເລັ່ງເຊື່ອມຖານຂໍ້ມູນກັບຂະແໜງການເສດຖະກິດ ເພື່ອຄຸ້ມຄອງແຫຼ່ງລາຍຮັບໃຫ້ສຳເລັດ.

ຄຽງຄູ່ກັນນີ້, ລັດຖະບານຈະເລັ່ງໃສ່ປັບປຸງກົນໄກ ແລະ ສ້າງເງື່ອນໄຂໃນການເກັບຖານລາຍຮັບທີ່ໝັ້ນຄົງ ເຊັ່ນ: ອາກອນທີ່ດິນ, ອາກອນຊັບສິນ, ສືບຕໍ່ສຸມໃສ່ປະຕິບັດນິຕິກຳກ່ຽວກັບການເພີ່ມທະວີ ແລະ ຕ້ານການຮົ່ວໄຫຼຂອງລາຍຮັບງົບປະມານລັດ, ການປະຢັດ ແລະ ຕ້ານການຟຸມເຟືອຍ, ການນຳໃຊ້ລົດຂອງລັດ ໂດຍສະເພາະດຳລັດ ວ່າດ້ວຍການປະຢັດ ແລະຕ້ານການຟຸມເຟືອຍ ສະບັບເລກທີ 205/ລບ ແລະ ສະບັບເລກທີ 599/ລບ ແລະນິຕິກຳອື່ນໆ ທີ່ລັດຖະບານວາງອອກໃຫ້ເຂັ້ມງວດ, ໄປຄຽງຄູ່ກັບການຈັດຕັ້ງປະຕິບັດຄຳສັ່ງຂອງນາຍົກລັດຖະມົນ ສະບັບເລກທີ 10/ນຍ ວ່າດ້ວຍການຄຸ້ມຄອງເງິນຕາຕ່າງປະເທດ ແລະ ຂໍ້ຕົກລົງສະບັບເລກທີ93/ນຍ ວ່າດ້ວຍການຈັດຕັ້ງປະຕິບັດນະໂຍບາຍສິນເຊື່ອ ເພື່ອກະຕຸ້ນເສດຖະກິດ ແລະ ນະໂຍບາຍສິນເຊື່ອ ເພື່ອກະຈາຍແຫຼ່ງທຶນສູ່ທ້ອງຖິ່ນ ໂດຍສະເພາະການຄັດເລືອກເອົາໂຄງການບູລິມະສິດທີ່ມີຕະຫຼາດຮອງຮັບ ແລະ ມີໜໍ່ແໜງການຜະລິດທີ່ດີແລ້ວ.

ເມື່ອເຮົາຕິດຕາມເບິ່ງທິດທາງຈຸດສຸມວຽກງານຂອງລັດຖະບານປະຈຳເດືອນສິງຫາ 2023 ກໍເຫັນວ່າເປັນຄວາມປາຖະໜາຂອງສັງຄົມ ແລະ ກໍເປັນສິ່ງດີຍິ່ງ ທີ່ຈະຊ່ວຍຊຸກຍູ້ເຮັດໃຫ້ການດຳລົງຊີວິດຂອງປະຊາຊົນບັນດາເຜົ່າທີ່ກຳລັງອ່ອນເພຍໃນສະພາບເສດຖະກິດປັດຈຸບັນ ກັບມາຟື້ນຕົວຄືນໃໝ່ຈາກນະໂຍບາຍເຫຼົ່ານີ້, ແຕ່ມັນກໍເປັນການຢາກທີ່ຈະເຮັດໃຫ້ນະໂຍບາຍທັງໝົດມີຜົນສຳເລັດ ຖ້າຫາກພວກເຮົາທຸກຄົນໃນສັງຄົມ ໂດຍສະເພາະແມ່ນ ບັນດາກະຊວງ ແລະ ທຸກພາກສ່ວນທີ່ກ່ຽວຂ້ອງທັງພາກລັດ ແລະ ເອກະຊົນ, ທັງພາກທຸລະກິດ ວິສາຫະກິດ ກໍຄືປະຊາຊົນບັນດາເຜົ່າ ຫາກບໍ່ເຮັດແທ້ທຳຈິງ ເຮັດພໍແລ້ວຮີດ ບໍ່ສຸດກົກສຸດປາຍ ເຮັດບໍ່ເຖິງກົກເຖິງຮາກ ຍັງຫວັງແຕ່ຜົນປະໂຫຍດສ່ວນຕົວຫຼາຍກວ່າຜົນປະໂຫຍດຂອງປະຊາຊົນ,ຜົນປະໂຫຍດສ່ວນລວມແລະຂອງປະເທດຊາດແລ້ວ ກໍ່ຈະເປັນການຢາກທີ່ຈະເຮັດໃຫ້ສຳເລັດໄດ້.

ແນວໃດກໍດີ ເມື່ອມີນະໂຍບາຍອັນຖືກຕ້ອງກຳນົດອອກມາເພື່ອເປັນບ່ອນອີງໃນທາງປະຕິບັດແລ້ວ ກໍມີແຕ່ ພ້ອມກັນເອົາໃຈໃສ່ຈັດຕັ້ງປະຕິໃຫ້ເປັນຈິງ ຢ່າປະປ່ອຍໃຫ້ຄວາມຫວັງ ແລະ ຄວາມຄອງຄອຍຂອງປະຊາຊົນ ກາຍເປັນໝັນ, ແລະ ກໍ່ຍັງເຊື່ອວ່າໝັ້ນວ່າ ນະໂຍບາຍເຫຼົ່ານີ້ ຈະຖືກຈັດຕັ້ງປະຕິບັດໃຫ້ເປັນຈິງ ເພື່ອນຳເອົາເອົາຄວາມຈະເລີນຮັ່ງມີເຂັ້ມແຂງ, ຄວາມຢູ່ດີກິນດີມາສູ່ປະຊາຊົນບັນດາເຜົ່າ ໃນອານາຄົດອັນມໍ່ໆນີ້.