ກອງປະຊຸມສະພາປະຊາຊົນ ນະຄອນຫລວງວຽງຈັນ ຈະດຳເນີນໄປແຕ່ວັນທີ 31 ກໍລະກົດ – 4 ສິງຫາ 2023 ເພື່ອສຸມໃສ່ພິຈາລະນາ ແລະ ຮັບຮອງເອົາບັນຫາສຳຄັນພື້ນຖານ
ວັນທີ 26 ກໍລະກົດ 2023, ທ່ານ ນະຄະເສນ ສີຫາລາດ ຄະນະປະຈຳ ເລຂາທິການສະພາປະຊາຊົນ ນະຄອນຫລວງວຽງຈັນ ຖະແຫລງຂ່າວຕໍ່ສື່ມວນຊົນ ກ່ຽວກັບການກະກຽມຄວາມພ້ອມໃນການດຳ ເນີນກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນ ນະຄອນຫລວງວຽງຈັນ ຊຸດທີ II ວ່າ: ກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນ ນະຄອນຫລວງວຽງຈັນ ຊຸດທີ II ຈະໄຂຂຶ້ນ ໃນວັນທີ 31 ກໍລະກົດ – 4 ສິງຫາ 2023 ຢູ່ທີ່ຫ້ອງປະຊຸມສຳນັກງານອົງການປົກຄອງນະຄອນຫລວງ ເພື່ອຈະສຸມໃສ່ພິຈາລະນາ ແລະ ຮັບຮອງເອົາບັນຫາສຳຄັນພື້ນຖານ ຂອງນະຄອນຫລວງວຽງຈັນເຊັ່ນ:
– ພິຈາລະນາ ແລະ ຮັບຮອງເອົາບົດລາຍງານຂອງທ່ານເຈົ້າຄອງ ນະຄອນຫລວງ ກ່ຽວກັບການຈັດ ຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ໄລຍະກາງສະໄໝຂອງແຜນການ 5 ປີ ຄັ້ງທີ IX (2021-2025) ຕິດພັນກັບບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ 6 ເດືອນ ຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ຂອງນະຄອນຫລວງ.
– ຟັງການລາຍງານການຈັດຕັ້ງປະຕິບັດ 02 ວາລະແຫ່ງຊາດ ຄື:ວາລະແຫ່ງຊາດ ວ່າດ້ວຍການແກ້ໄຂບັນຫາຄວາມຫຍຸ້ງຍາກ ທາງດ້ານເສດຖະກິດ-ການເງິນປະຈໍາ 6 ເດືອນຕົ້ນປີ ແລະ ແຜນວຽກຈຸດສຸມ 06 ເດືອນທ້າຍປີ 2023 ຢູ່ນະຄອນຫລວງ; ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ 6 ເດືອນຕົ້ນປີ ແລະ ແຜນວຽກຈຸດສຸມ 6 ເດືອນທ້າຍປີ 2023.
– ຟັງການລາຍງານ ການປະເມີນຜົນການຈັດຕັ້ງປະຕິບັດບັນດານິຕິກໍາໃຕ້ກົດໝາຍທີ່ສະພາປະຊາຊົນ ນະ ຄອນຫລວງ ໄດ້ຮັບຮອງເອົາ ຈໍານວນ 3 ສະບັບ ຄື: ຂໍ້ຕົກລົງວ່າດ້ວຍ ການຄວບຄຸ້ມສຽງເນືອງນັນ ; ຂໍ້ຕົກລົງວ່າດ້ວຍ ການກໍານົດ ແລະ ຄຸ້ມຄອງທີ່ດິນກະສິກໍາ ແລະ ປ່າໄມ້; ຂໍ້ຕົກລົງວ່າດ້ວຍ ການຈັດສັນຄວາມບໍ່ເປັນລະບຽບຮຽບຮ້ອຍໃນຕົວເມືອງ ແລະ ຊານເມືອງ ຢູ່ນະຄອນຫລວງວຽງຈັນ,
– ຟັງການລາຍງານຂອງອົງການໄອຍະການປະຊາຊົນ ນະຄອນຫລວງ ກ່ຽວກັບການຕິດຕາມກວດກາການ ປະຕິບັດກົດໝາຍຂອງອົງການສືບສວນ-ສອບສວນ; ການຕິດຕາມກວດກາ ການປະຕິບັດກົດ ໝາຍ ໃນສະຖານທີ່ກັກຕົວ, ສະຖານທີ່ກັກຂັງ, ສູນດັດສ້າງ, ຄ້າຍດັດສ້າງ ແລະ ສະຖານທີ່ປະຕິບັດມາດຕະການບັງຄັບອື່ນໆຂອງສານ.
– ຟັງການລາຍງານ ຂອງສານປະຊາຊົນ ນະຄອນຫລວງ ກ່ຽວກັບການຍົກສູງຄຸນນະພາບໃນການຕັດສິນຄະ ດີແພ່ງ ແລະ ຄະດີອາຍາ ເປັນຂັ້ນຕົ້ນ ຢູ່ສານປະຊາຊົນ ນະຄອນຫລວງ.
– ຟັງການລາຍງານຂອງພະແນກຍຸຕິທຳ ນະຄອນຫລວງ ກ່ຽວກັບສາເຫດຂອງການປະຕິບັດຄຳຕັດສິນຊັກຊ້າ ແລະ ມາດຕະການ, ວິທີການແກ້ໄຂຂໍ້ຄົງຄ້າງ ຮອດທ້າຍປີ 2023 ຕິດພັນກັບການລາຍງານການທ້ອນໂຮມຊັບ, ວັດຖຸສິ່ງຂອງ ແລະ ຄ່າປັບໃໝຕາມຄຳຕັດສິນຂອງສານ.
– ພິຈາລະນາ ແລະ ຮັບຮອງເອົາບົດລາຍງານ ການຈັດຕັ້ງປະຕິບັດແຜນການເຄື່ອນໄຫວວຽກງານ 6 ເດືອນ ຕົ້ນປີ ແລະ ທິດທາງແຜນການ 06 ເດືອນທ້າຍປີ 2023 ຂອງສະພາປະຊາຊົນ ນະຄອນຫລວງວຽງຈັນ ຊຸດທີ II,
– ດຳເນີນການປະເມີນກາງສະໄໝ ການປະຕິບັດໜ້າທີ່ຂອງບຸກຄະລາກອນ ທີ່ສະພາປະຊາຊົນ ນະຄອນຫລວງ ເລືອກຕັ້ງ ແລະ ຮັບຮອງເອົາການແຕ່ງຕັ້ງ.
– ຟັງການລາຍງານ ແລະ ຊີ້ແຈງຂອງອົງການປົກຄອງ ຕໍ່ບາງບັນຫາສຳຄັນສຳຄັນ ແລະ ພົ້ນເດັ່ນ ຂອງນະຄອນຫລວງ ຈຳນວນໜຶ່ງ ເປັນຕົ້ນແມ່ນ: ການຈັດຕັ້ງປະຕິບັດໂຄງການສໍາປະທານ ແລະ ລາຍຮັບຈາກການສໍາປະທານທີ່ດິນ ຢູ່ນະຄອນຫລວງ, ການຄຸ້ມຄອງທີ່ດິນ, ການປ່ຽນແປງສິດນໍາໃຊ້ທີ່ດິນ ຫຼື ການຫັ່ນປ່ຽນທີ່ດິນ ໃນນະຄອນຫລວງ,ການຕິດຕາມກວດກາ ແລະ ການແກ້ໄຂບັນຫາການຈັດສັນ, ບຸກລຸກ ແລະ ບຽດຍຶດທີ່ດິນ ທີ່ບໍ່ສອດ ຄ່ອງກັບກົດໝາຍທີ່ດິນ ໃນຂອບເຂດໃນນະຄອນຫລວງ. ການແກ້ໄຂໜີ້ສິນ ການຄຸ້ມຄອງການຂຸດຄົ້ນແຮ່ທາດ ການແກ້ໄຂບັນຫາໄຟໄໝ້ລາມປ່າ ວິທີການ ແລະ ມາດຕະການໃນການຕ້ານແລ້ງ-ຕ້ານຖ້ວມ ຢູ່ ນະຄອນຫລວງ ການຄຸ້ມຄອງຫົວໜ່ວຍທຸລະກິດ ແລະ ຜູ້ປະກອບການ ທີ່ເປັນຊາວຕ່າງປະເທດ ໃນນະຄອນຫລວງ.
ການດໍາເນີນກອງປະຊຸມຄັ້ງນີ້ ແມ່ນການປະຕິບັດພາລະບົດບາດຂອງສະພາປະຊາຊົນ ໃນຖານະເປັນອົງການອໍານາດລັດຂັ້ນນະຄອນຫລວງ ທີ່ເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນ ຊາວນະຄອນຫລວງວຽງຈັນ. ດັ່ງນັ້ນ,ທຸກພາກສ່ວນທົ່ວສັງຄົມສາມາດມີຄຳຄິດຄຳເຫັນ ຫຼື ຄຳສະເໜີເຂົ້າໃນກອງປະຊຸມ ຜ່ານທາງໂທລະສັບສາຍດ່ວນ ໝາຍເລກ 1156 ຫລື ໝາຍເລກໂທລະສັບ 021 260242 ໃນໂມງລັດຖະການ ເຊິ່ງເລີ່ມເປີດຮັບຄຳສະເໜີ, ຄຳຄິດຄຳເຫັນຕໍ່ກອງປະຊຸມ ແຕ່ມື້ນີ້ເປັນຕົ້ນໄປ.
