ຈີນແຕ່ງຕັ້ງທ່ານ ຫວັງອີ້ ເປັນລັດຖະມົນຕີຕ່າງປະເທດແທນທ່ານ ສິນກັງ

ວັນທີ 25 ກໍລະກົດ, ສະພາປະຊາຊົນແຫ່ງຊາດຂອງຈີນມີມະຕິຮັບຮອງທ່ານ ຫວັງອີ້ ນັກການທູດລະດັບສູງຂອງຈີນ ໃຫ້ດຳລົງຕຳແໜ່ງລັດຖະມົນຕີວ່າການກະຊວງການຕ່າງປະເທດຈີນອີກເທື່ອໜຶ່ງ ແທນທ່ານ ສິນກັງ ທີ່ຫາກໍຮັບຕຳແໜ່ງໃນທ້າຍປີ 2022 ທ່າມກາງການຕັ້ງຄຳຖາມຈາກຫລາຍຝ່າຍເຖິງການຕັດສິນໃຈຄັ້ງນີ້ ຫລັງຈາກທ່ານ ສິນກັງ ບໍ່ປາກົດຕົວຕໍ່ສາທາລະນະມາເກືອບ 1 ເດືອນ.

ການເຄື່ອນໄຫວດັ່ງກ່າວມີຂຶ້ນໃນກອງປະຊຸມຄະນະກຳມະການປະຈຳສະພາປະຊາຊົນແຫ່ງຊາດ ເຊິ່ງໄຂກອງປະຊຸມໃນຕອນເຊົ້າ ໂດຍມີທ່ານ ຈ້າວເລີຈີ້ ເປັນປະທານ ເຊິ່ງໃນຕອນທ້າຍມີການລົງມະຕິແຕ່ງຕັ້ງບຸກຄົນໃນຕຳແໜ່ງສຳຄັນທາງການເມືອງ. ຂະນະທີ່ປະທານປະເທດ ສີຈິ້ນຜິງ ໄດ້ລົງນາມເພື່ອໃຫ້ມີຜົນບັງຄັບໃຊ້ທັນທີ.

ໂດຍທ່ານ ສິນກັງ ຫາຍໄປຈາກໜ້າສື່ນັບແຕ່ວັນທີ 25 ມິຖຸນາຜ່ານມາ ຫລັງຈາກທ່ານຕ້ອນຮັບຄະນະຜູ້ແທນສີລັງກາ, ຫວຽດນາມ ແລະ ຣັດເຊຍ ທີ່ເດີນທາງມາຢ້ຽມຢາມຈີນໃນໄລຍະເວລານັ້ນ.

ການປ່ຽນຕຳແໜ່ງສຳຄັນໃນລັດຖະບານຈີນ ຄືຕຳແໜ່ງລັດຖະມົນຕີຕ່າງປະເທດນັ້ນສ້າງຄວາມຮືຮາໃຫ້ຈີນ ແລະ ເຮັດໃຫ້ຫລາຍຝ່າຍຕ່າງຄາດເດົາເຖິງຊະຕາກຳຂອງທ່ານ ສິນກັງ ວ່າ: ເປັນຍ້ອນສາເຫດໃດເສັ້ນທາງໃນວົງການການເມືອງລະດັບປະເທດຂອງທ່ານຈຶ່ງຈົບລົງຢ່າງວ່ອງໄວແບບນີ້.

ໂດຍທ່ານ ສິນກັງ ຖືເປັນໜຶ່ງໃນນັກການເມືອງແຖວໜ້າຂອງຈີນທີ່ໄດ້ຮັບຄວາມໄວ້ວາງໃຈຈາກປະທານປະເທດ ສີຈິ້ນຜິງ ຂອງຈີນ, ທ່ານໄດ້ຮັບການແຕ່ງຕັ້ງໃຫ້ດຳລົງຕຳແໜ່ງລັດຖະມົນຕີຕ່າງປະເທດຈີນ ຫລັງຈາກເຄີຍດຳລົງຕຳແໜ່ງເອກອັກຄະລັດຖະທູດຈີນປະຈຳສະຫະລັດອາເມລິກາໃນໄລຍະເວລາສັ້ນໆ.

ທ່ານ ສິນກັງ ມີບົດບາດສຳຄັນໃນການສ້າງສະຖຽນລະພາບ ແລະ ຟື້ນຟູການພົວພັນລະຫວ່າງຈີນ ແລະ ອາເມລິກາ ໂດຍໄດ້ປະຕິບັດພາລະກິດເປັນຜູ້ແທນລະດັບສູງຂອງຈີນຕ້ອນຮັບທ່ານ ແອນໂທນີ ບລິງເຄນ ລັດຖະມົນຕີຕ່າງປະເທດອາເມລິກາ ທີ່ເດີນທາງຢ້ຽມຢາມຈີນໃນກາງເດືອນມິຖຸນາຜ່ານມາ.

ຂະນະທີ່ທ່ານ ຫວັງອີ້ ເຄີຍດຳລົງຕຳແໜ່ງລັດຖະມົນຕີຕ່າງປະເທດຈີນໃນໄລຍະປີ 2013-2022 ກ່ອນຈະໄປຮັບຕຳແໜ່ງຜູ້ອຳນວຍການຝ່າຍກິດຈະການຕ່າງປະເທດຂອງພັກກອມມູນິດຈີນ ແລະ ໄດ້ຮັບການແຕ່ງຕັ້ງໃຫ້ກັບມາດຳລົງຕຳແໜ່ງລັດຖະມົນຕີຕ່າງປະເທດຈີນອີກໃນເທື່ອນີ້.

ອ້າງອີງ:

• https://edition.cnn.com/2023/07/25/china/china-foreign-minister-qin-gang-replaced-wang-yi-intl-hnk/index.html
• https://www.washingtonpost.com/world/2023/07/25/china-foreign-minister-qin-gang/

·  https://www.aljazeera.com/news/2023/7/25/chinas-foreign-minister-qin-gang-removed-from-office