ລັດຖະສະພາອິດສະລາແອນລົງມະຕິຜ່ານຮ່າງກົດໝາຍຈຳກັດອຳນາດສານສູງສຸດ ເຖິງວ່າປະຊາຊົນຕໍ່ຕ້ານໜັກ
ສະມາຊິກລັດຖະສະພາອິດສະລາແອນ ເຊິ່ງເປັນສະພາດຽວ ລົງມະຕິຜ່ານໜຶ່ງໃນຮ່າງກົດໝາຍສຳຄັນທີ່ຈະຈຳກັດອຳນາດສານສູງສຸດອິດສະລາແອນ ໃນວັນທີ 24 ກໍລະກົດ ດ້ວຍມະຕິເຫັນພ້ອມ 64 ຕໍ່ 0 ສຽງ ຈາກທັງໝົດ 120 ສຽງ ຫລັງສະມາຊິກພັກຝ່າຍຄ້າຍບໍ່ຮ່ວມລົງມະຕິຮ່າງກົດໝາຍດັ່ງກ່າວ, ຂະນະທີ່ປະຊາຊົນຈຳນວນຫລາຍປັກຫລັກຊຸກນຸມຄັດຄ້ານຮ່າງກົດໝາຍຢູ່ນອກສະພາ.
ຮ່າງກົດໝາຍສະບັບນີ້ ເປັນໜຶ່ງໃນຮ່າງກົດໝາຍສະບັບເພີ່ມຕື່ມທີ່ຈະຈຳກັດອຳນາດຂອງສານສູງສຸດອິດສະລາແອນ ໃຫ້ບໍ່ສາມາດລຶບລ້າງມະຕິ ຫລື ການກະທຳຂອງລັດຖະສະພາໄດ້ໃນກໍລະນີທີ່ທ່ານພິຈາລະນາແລ້ວວ່າ: ສິ່ງນັ້ນເປັນການກະທຳທີ່ບໍ່ສົມເຫດສົມຜົນ.
ການລົງມະຕິຜ່ານຮ່າງກົດໝາຍສະບັບນີ້ມີຂຶ້ນທ່າມກາງສຽງຄັດຄ້ານຈາກປະຊາຊົນຊາວອິດສະລາແອນນັບແສນຄົນທີ່ໄດ້ຮັບການສະໜັບສະໜູນຈາກຫລາຍພາກສ່ວນ ທັງບັນດາສະມາຊິກພັກຝ່າຍຄ້ານ, ທະຫານກອງໝຸນ, ບຸກຄະລາກອນທາງການແພດ ເຊິ່ງພວກເຂົາຕ່າງສະແດງຄວາມກັງວົນວ່າ: ການກະທຳນີ້ອາດຈະທຳລາຍປະຊາທິປະໄຕຂອງປະເທດ ອີກທັງເປັນການມອບອຳນາດໃຫ້ຄົນກຸ່ມນ້ອຍ ແທນທີ່ຈະເປັນສຽງສ່ວນຫລາຍຂອງປະຊາຊົນຜູ້ເປັນເຈົ້າຂອງປະເທດ.
ຂະນະທີ່ລັດຖະບານອິດສະລາແອນ ພາຍໃຕ້ການນຳຂອງນາຍົກລັດຖະມົນຕີ ເບນຈາມິນ ເນທັນຢາຮູ ໃຫ້ຄວາມເຫັນວ່າ: ການປະຕິຮູບລະບົບຕຸລາການໃນອິດສະລາແອນຖືເປັນສິ່ງຈຳເປັນຫລາຍ ເພື່ອແກ້ໄຂຄວາມບໍ່ສົມດູນທາງອຳນາດ ຫລັງຈາກລັດຖະບານເບິ່ງວ່າສານສູງສຸດເຂົ້າມາແຊກແຊງການເມືອງອິດສະລາແອນຫລາຍເກີນໄປ ອີກທັງພວກເຂົາມີອຳນາດຫລາຍເກີນໄປ ທັງທີ່ບໍ່ໄດ້ມາຈາກການເລືອກຕັ້ງຂອງປະຊາຊົນໂດຍກົງຄືສະມາຊິກລັດຖະສະພາ.
ຫລາຍຝ່າຍສະແດງຄວາມກັງວົນໃຈ ຖ້າແຜນປະຕິຮູບສານອິດສະລາແອນໄດ້ຮັບມະຕິເຫັນພ້ອມ ແລະ ປະກາດບັງຄັບໃຊ້ ອາດຍິ່ງເຮັດໃຫ້ສະຖານະການຄວາມບໍ່ສະຫງົບທາງການເມືອງຢູ່ອິດສະລາແອນຮຸນແຮງຂຶ້ນໄປອີກ ຖືເປັນວິກິດຊ້ຳເຮື້ອທີ່ກຳລັງເຂົ້າສູ່ອາທິດທີ 30 ແລ້ວ.
ອ້າງອີງ:
- www.bbc.com/news/world-middle-east-66258416
- www.vox.com/2023/7/24/23805532/israel-judicial-overhaul-reasonableness
- edition.cnn.com/middleeast/live-news/israel-judicial-reforms-vote-intl/index.html
