ສານແຂວງຫົວພັນ ຕັດສິນປ່ອຍນັກຕົວໂທດຄະດີລັກຊັບ, ລັກພາຕົວ ແລະ ຢາເສບຕິດ ກ່ອນກຳນົດ 11 ຄົນ ທີ່ປະຕິບັດຕົນດີ ມີຄວາມກິນແໜງແຄງໃຈ
ສານປະຊາຊົນຂັ້ນຕົ້ນ ແຂວງຫົວພັນ ໄດ້ຕັດສິນປ່ອຍຕົວນັກໂທດກ່ອນກໍານົດໂດຍມີເງື່ອນໄຂ 11 ຄົນ ໃນວັນທີ 18 ກໍລະກົດ 2023, ໃນນີ້, ມີຄະດີລັກຊັບ, ລັກພາຕົວ ແລະ ຢາເສບຕິດ ເພື່ອໃຫ້ເຂົາເຈົ້າກັບຄືນສູ່ຄອບຄົວ.
ນັກໂທດຈໍານວນດັ່ງກ່າວ ມີນັກໂທດຄະດີລັກຊັບ 4 ຄົນ, ຄະດີລັກພາຕົວ 1 ຄົນ ແລະ ຄະດີຢາເສບຕິດຈຳນວນ 6 ຄົນ ໂດຍພວກກ່ຽວໄດ້ຖືກສານຕັດສິນລົງໂທດຕາມລະບຽບກົດໝາຍ ແລະ ຖືກປະຕິບັດໂທດຢູ່ຄ້າຍຄຸມຂັງ-ດັດສ້າງ ກອງບັນຊາການ ປກສ ແຂວງຫົວພັນ, ເຊິ່ງແຕ່ລະຄົນລ້ວນແຕ່ ມີຄວາມຕື່ນຕົວ ມີຄວາມກ້າວໜ້າ ໃນການຝືກຝົນຫຼໍ່ຫຼອມຕົນເອງ, ມີຄວາມຮູ້ສຶກກິນແໜງແຄງໃຈ ທີ່ເຄີຍໄດ້ກະທຳຜິດມາກ່ອນ, ມີຄວາມຫ້າວຫັນໃນການອອກແຮງງານ ແລະ ປະຕິບັດກົດລະບຽບຂອງຄ້າຍຄຸມຂັງ-ດັດສ້າງໄດ້ຢ່າງດີ.
ການຕັດສິນປ່ອຍຕົວໃນຄັ້ງນີ້, ຖ້າຫາກວ່າພາຍໃນກຳນົດ 5 ປີ ນັກໂທດທີ່ຖືກປ່ອຍຕົວ ບໍ່ໄປກະທຳຜິດອີກ ໂທດທີ່ຍັງເຫຼືອກໍຈະໝົດໄປ, ແຕ່ຖ້າຫາກໄປກະທຳຜິດອີກ ກໍຈະປະຕິບັດໂທດໃໝ່ລວມທັງໂທດເກົ່າທີ່ຍັງເຫຼືອ ເຊິ່ງນັບແຕ່ມື້ປ່ອຍຕົວເປັນຕົ້ນໄປ.
