ນອນໜ້ອຍສົ່ງຜົນໃຫ້ຄວາມຈື່ຈຳບໍ່ດີ

ປະຈຸບັນນີ້ຫລາຍຄົນເຮັດວຽກໜັກແຕ່ເຊົ້າຈົນຄໍ່າ ຈົນເກືອບບໍ່ມີເວລາໄດ້ພັກຜ່ອນ ເຮັດໃຫ້ເກີດອາການອິດເມື່ອຍອ່ອນເພຍ, ງ່ວງເຫງົາຫາວນອນໃນຕອນກາງເວັນ ແລະ ອີກກຸ່ມໜຶ່ງແມ່ນຄົນມັກທ່ຽວກາງຄືນ ກໍເປັນສາເຫດໃຫ້ຮ່າງກາຍພັກຜ່ອນບໍ່ພຽງພໍ ເຖິງວ່າຈະນອນເທົ່າໃດກໍຍັງຮູ້ສຶກບໍ່ເຕັມອີ່ມ, ແຕ່ສິ່ງທີ່ຮ້າຍແຮງຫລາຍກ່ວາອາການອິດເມື່ອຍອ່ອນເພຍ ແລະ ຮູ້ສຶກເຫງົານອນຕະຫລອດເວລາກໍ ແມ່ນອາການສະໝອງເສື່ອມສະມັດຕະພາບໃນດ້ານການຈື່ຈຳ.

ວາລະສານສະຖາບັນປະສາດວິທະຍາອາເມລິກາ ຕີພິມຜົນການສຶກສາລະບຸວ່າ : ບັນຫາການນອນບໍ່ຫລັບກ່ຽວຂ້ອງກັບການເກີດອາການສະໝອງເສື່ອມປະສິດທິພາບດ້ານການຈື່ຈຳ ຫລື ປະລິມານຊີ້ນສະໝອງຫລຸດໜ້ອຍລົງ ຫລັງຈາກທີມວິໄຈຈາກມະຫາວິທະຍາໄລ ອັອກຟອດ ປະເທດອັງກິດ ວິໄຈພົບຄວາມກ່ຽວຂ້ອງດັ່ງກ່າວ.

ກຸ່ມວິໄຈທົດລອງໂດຍນຳກຸ່ມໂຕຢ່າງທີ່ເປັນຜູ້ໃຫຍ່ 147 ຄົນ ອາຍຸ 20 ປີ ແລະ 84 ປີ ມາເຂົ້າຮັບການກວດສະໝອງຜ່ານເຄື່ອງສະແກນເອັມອາໄອ 2 ເທື່ອ ເຊິ່ງການສະແກນສະໝອງແຕ່ລະເທື່ອຈະມີຄວາມຫ່າງສະເລ່ຍ 3,5 ປີ. ຈາກນັ້ນ, ນັກວິໄຈໄດ້ໃຫ້ກຸ່ມໂຕຢ່າງຕອບແບບສອບຖາມກ່ຽວກັບພຶດຕິກຳການນອນ ເຊັ່ນ : ນອນດົນປານໃດ, ໃຊ້ເວລາດົນປານໃດກ່ວາຈະນອນຫລັບ ຫລື ຈຳເປັນຕ້ອງໃຊ້ຢາຊ່ວຍໃຫ້ນອນຫລັບຫລືບໍ່. ຫລັງຈາກຂະບວນການຄົ້ນຄ້ວາພົບວ່າ : ກຸ່ມໂຕຢ່າງ 35% ຈາກຈຳນວນທັງໝົດນັ້ນມີຄຸນນະພາບການນອນຫລັບບໍ່ດີ ແລະ ຍັງພົບຕື່ມວ່າບຸກຄົນທີ່ມີບັນຫາການນອນບໍ່ຫລັບ ມີຂະໜາດສະໝອງຫົດນ້ອຍລົງເປັນວົງກ້ວາງອອກໃນຫລາຍພາກສ່ວນ ເຊັ່ນ : ສະໝອງບໍລິເວນໜ້າຜາກ, ສະໝອງບໍລິເວນຂະໝັບ ຫລື ຊີ້ນສະໝອງບ່ອນຜິວໜັງຫຸ້ມ ເຊິ່ງກໍລະນີນີ້ເຫັນໄດ້ແຈ້ງໃນຄົນທີ່ມີອາຍຸສູງກ່ວາ 60 ປີຂຶ້ນໄປ.

ແນວໃດກໍຕາມ, ທ່ານ ແຄລ ອີ ແຊັກຕັນ ຈາກມະຫາວິທະຍາໄລ ອັອກຟອດ ປະເທດອັງກິດ ຜູ້ຂຽນລາຍງານນີ້ກ່າວວ່າຍັງບໍ່ຈະແຈ້ງວ່າຄຸນນະພາບຂອງການນອນຫລັບເປັນສາເຫດ ຫລື ເປັນຜົນມາຈາກການປ່ຽນແປງໂຄງສ້າງສະໝອງກັນແທ້ ເຊິ່ງຈຳເປັນຕ້ອງມີການສຶກສາຕໍ່ເນື່ອງຕໍ່ໄປໃນອະນາຄົດ ເພາະຫາກການສຶກສາໃນອະນາຄົດລະບຸວ່າການປັບປຸງຄຸນນະພາບການນອນຊ່ວຍຫລຸດຄວາມສ່ຽງສະໝອງພາກສ່ວນຄວາມຈື່ຈຳເສື່ອມລົງໄດ້. ດັ່ງນັ້ນ, ການແກ້ໄຂພຶດຕິກຳການນອນ ເຊິ່ງມີວິທີ ປິ່ນປົວຢູ່ຫລາຍຫົນທາງກໍອາດຈະເປັນແນວທາງສຳຄັນທີ່ຈະຊ່ວຍຮັກສາສຸຂະພາບຂອງສະໝອງໄວ້ໄດ້. ຕໍ່ໄປນີ້ທຸກຄົນກໍຄວນຕ້ອງແບ່ງເວລາໃນການໃຊ້ຊີວິດໃຫ້ດີຫລາຍຂຶ້ນກ່ວາເກົ່າແລ້ວ ຢ່າຫັກໂຫມເຮັດວຽກແຕ່ເຊົ້າຈົນຄໍ່າ ແລະ ຢ່າທ່ຽວສັງສັນກາງຄືນເລື້ອຍໆ, ນອນຫລັບພັກຜ່ອນໃຫ້ພຽງພໍ ເພື່ອສຸຂະພາບທີ່ແຂງແຮງສົມບູນ.