ລັດຖະມົນຕີກະຊວງການເງິນ ເນັ້ນໃຫ້ການເງິນຈຳປາສັກ ເອົາໃຈໃສ່ຊຸກຍູ້ເປັນເຈົ້າການຈັດຕັ້ງປະຕິບັດແຜນງົບປະມານແຫ່ງລັດໃຫ້ມີຄວາມຮັບຜິດຊອບສູງ
ວັນທີ 24 ກໍລະກົດ, ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ, ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ຊຸກຍູ້ວຽກງານການເງິນຮອບດ້ານ ຢູ່ແຂວງຈຳປາສັກ.
ທ່ານ ສຸກກະເສີມ ສີຫານຸວົງ ລາຍງານວ່າ: ໃນການຈັດຕັ້ງປະຕິບັດແຜນງົບປະມານແຫ່ງລັດ 6 ເດືອນຕົ້ນປີ 2023, ທີ່ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ແລະ ວາລະຂອງແຂວງ. ສຳລັບວຽກງານຈຸດສຸມ ແລະ ມາດຕະການຈັດຕັ້ງປະຕິບັດໃນ 6 ເດືອນທ້າຍ ປີ 2023, ສຶບຕໍ່ສຸມໃສ່ ການຈັດຕັ້ງປະຕິບັດວາລະແຫ່ງຊາດ, ວາລະຂອງແຂວງ ວ່າດ້ວຍການແກ້ໄຂບັນຫາທາງດ້ານ ເສດຖະກິດ-ການເງີນ ໂດຍສະເພາະຄໍາສັ່ງຂອງນາຍົກລັດຖະມົນຕີ ສະບັບເລກທີ 18/ນຍ, ລົງວັນທີ 16 ກັນຍາ 2021 ວ່າດ້ວຍການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼຂອງລາຍຮັບງົບປະມານ ໃຫ້ປະກົດຜົນເປັນຈິງ ແລະ ສູ້ຊົນຈັດຕັ້ງປະຕິບັດລາຍຮັບງົບປະມານໃຫ້ບັນລຸຕາມແຜນການ ຫຼື ເກີນແຜນ; ປະສານສົມທົບກັບກົມສ່ວຍສາອາກອນ ເພື່ອຕິດຕັ້ງ ແລະ ນໍາໃຊ້ລະບົບຄຸ້ມຄອງການຈັດເກັບຄ່າທໍານຽມ ແລະ ຄ່າບໍລິການ ແບບອີເລັກໂທນິກ ຢູ່ບັນດາຫົວຫນ່ວຍງົບປະມານລັດ ເຊື່ອມຕໍ່ກັບລະບົບ TaxRis ເປັນຕົ້ນແມ່ນ: ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ, ກອງຄຸ້ມຄອງພາຫະນະພະແນກ ຍທຂ, ພະແນກແຮງງານສະຫວັດດີການ-ສັງຄົມ, ຕໍາຫຼວດກວດຄົນເຂົ້າເມືອງ, ມະຫາວິທະຍາໄລຈໍາປາສັກ, ດ່ານສາກົນວັງເຕົ່າ, ດ່ານສາກົນໜອງນົກຂຽນ, ດ່ານສາກົນສະໜາມບິນປາກເຊ ແລະ ອື່ນໆບ່ອນທີ່ມີຄວາມເໝາະສົມ; ສືບຕໍ່ສົມທົບກັບສ່ວຍສາອາກອນເມືອງ ໃນການກວດກາຄຸ້ມຄອງຫົວໜ່ວຍທຸລະກິດ ທີ່ຍັງຄ້າງມອບໃນ ລະບົບ TaxRis, ຫົວໜ່ວຍ (IRC), ໜີ້ຄ້າງມອບໃນລະບົບ, ກວດຄືນຖານລາຍຮັບ, ໃຫ້ປະເມີນຄືນຫົວໜ່ວຍຈຸນລະວິສາຫະກິດ ເພື່ອຍົກອາກອນຂື້ນໃຫ້ແທດເໝາະກັບລາຍຮັບ, ວຽກງານຄຸ້ມຄອງການແຈ້ງມອບອາກອນ, ວຽກງານການອອກໃບຢັ້ງຢືນການມອບອາກອນປະຈໍາປີ ແລະ ການແບ່ງຄວາມຮັບຜິດຊອບໃຫ້ບຸກຄົນ ເພື່ອໃຫ້ມີມາດຕະການໃນການຈັດຕັ້ງປະຕິບັດ.
ໂອກາດດຽວກັນ, ທ່ານລັດຖະມົນຕີກະຊວງການເງິນໄດ້ມີຄຳເຫັນໂອ້ລົມຕໍ່ກອງປະຊຸມ ແລະ ສະແດງຄວາມຊົມເຊີຍ ຄະນະພັກ-ຄະນະນຳຂອງແຂວງ ທີ່ໄດ້ເອົາໃຈໃສ່ນຳພາ-ຊີ້ນຳ ຕໍ່ກັບການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງມີຜົນສຳເລັດ, ໂດຍສະເພາະພະແນກການເງິນແຂວງ ຈຳປາສັກ, ພະນັກງານຫຼັກແຫຼ່ງ ຂະແໜງການເງິນທົ່ວແຂວງ ຕະຫຼອດຮອດເຖິງບັນດາຂະແໜງການຂົງເຂດເສດຖະກິດອື່ນໆ, ເອົາໃຈໃສ່ຊ່ວຍຊຸກຍູ້ ແລະ ເປັນເຈົ້າການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2023 ໃຫ້ມີຄວາມຮັບຜິດຊອບສູງ ແລະ ເປັນເຈົ້າການອີກດ້ວຍ.
