ຮອງປະທານປະເທດ ເນັ້ນໃຫ້ເມືອງຕະໂອ້ຍເພີ່ມທະວີສ້າງເສດຖະກິດຊີວິດການເປັນຢູ່ຂອງປະຊາຊົນໃຫ້ດີຂຶ້ນ

ທ່ານ ບຸນທອງ ຈິດມະນີ ຮອງປະທານປະເທດ ພ້ອມດ້ວຍຄະນະ ເຄື່ອນໄຫວພົບປະໂອ້ລົມຄະນະນຳເມືອງຕະໂອ້ຍ ແຂວງສາລະວັນ ວັນທີ 23 ກໍລະກົດ 2023, ທ່ານໄດ້ເນັ້ນໃຫ້ເອົາໃຈໃສ່ສຶກສາອົບຮົມການເມືອງແນວຄິດ, ໂຄສະນາເຜີຍແຜ່ໃຫ້ປະຊາຊົນໄດ້ຮັບຮູ້ເຂົ້າໃຈຕໍ່ແນວທາງນະໂຍບາຍຂອງພັກ, ມີສະຕິເຄົາລົບລະບຽບກົດໝາຍ, ເປັນເຈົ້າການຕ້ານປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມ, ຕອບຕ້ານທຸກກົນອຸບາຍ ຫັນປ່ຽນຂອງກໍາລັງປໍລະປັກ, ຮັກສາມູນເຊື້ອເມືອງວິລະຊົນ, ເພີ່ມທະວີໃນການສ້າງເສດຖະກິດຊີວິດການເປັນຢູ່ຂອງປະຊາຊົນໃຫ້ນັບມື້ດີຂຶ້ນ.

ພ້ອມທັງຂະຫຍາຍມູນເຊື້ອດຸໜັ່ນ ແລະ ອາຊີບທີ່ໝັ້ນຄົງບົນພື້ນຖານຂອງແຕ່ລະບ້ານ, ມີຈຸດສຸມໃນການປູກ-ການລ້ຽງ ເຮັດໃຫ້ຫາຍກາຍເປັນສິນຄ້າ, ພັດທະນາດ້ານສັງຄົມຕ້ອງເລັງໃສ່ພັດທະນາດ້ານການສຶກສາ ໂດຍເນັ້ນດ້ານຄຸນນະພາບ, ດ້ານສຸຂະພາບ, ພັດທະນາສີມືແຮງງານສ້າງວຽກເຮັດງານທໍາ, ປັບປຸງລະບົບການຈັກການຈັດຕັ້ງແຕ່ລະຂັ້ນຂອງເມືອງໃຫ້ມີຄວາມເຂັ້ມແຂງຮອບດ້ານ, ຖືກຕ້ອງສອດຄ່ອງຕາມຄວາມຮູ້, ຄວາມສາມາດ, ປະຕິບັດກົດລະບຽບຂອງພັກຢ່າງເຄັ່ງຄັດ ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ໂດຍເນັ້ນເອົາຄຸນນະພາບເປັນກົກ, ຕິດຕາມກວດກາ ເພື່ອໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ຕ້ານສະກັດກັ້ນການສໍ້ລາດບັງຫລວງໃນຖັນແຖວພະນັກງານ, ຄະນະບໍລິຫານງານພັກເມືອງ ຕ້ອງໄດ້ ເພີ່ມທະວີໃນການນໍາພາຊີ້ນໍາຕົກລົງບັນຫາເປັນໝູ່ຄະນະແບ່ງວຽກແບ່ງຄວາມຮັບຜິດຊອບກັນຢ່າງລະອຽດຈະແຈ້ງ ມີຄວາມສາມັກຄີເປັນເອກະພາບສູງ ພ້ອມກັນ ສ້າງເມືອງໃຫ້ມີຄວາມໜັກແໜ້ນ ເຂັ້ມແຂງ ຮອບດ້ານ.