ຈຳນວນຜູ້ເສຍຊີວິດຈາກແຜ່ນດິນໄຫວ ຢູ່ແມັກຊິກເພີ່ມເປັນ 226 ຄົນແລ້ວ
ສຳນັກງານປ້ອງກັນໄພພົນລະເຮືອນແມັກຊິກຖະແຫຼງວ່າ: ມີຜູ້ເສຍຊີວິດຢ່າງໜ້ອຍ 226 ຄົນຈາກແຜ່ນດິນໄຫວຮຸນແຮງທາງພາກກາງໃນວັນທີ 19 ກັນຍາ.
ທ່ານ ລຸຍ ເຟລີເປ ປູເອນເຕ້ ຜູ້ອຳນວຍການສຳນັກງານ ສະແດງຂໍ້ຄວາມໃນທະວິດເຕີວ່າ: ຈຳນວນຜູ້ເສຍຊີວິດຢູ່ນະຄອນຫຼວງແມັກຊິກເພີ່ມຂຶ້ນເປັນ 117 ຄົນຈາກແຜ່ນດິນໄຫວຂະໜາດ 7,1 ເຊິ່ງເກີດຂຶ້ນໃນວັນດຽວກັບວັນລະນຶກເຫດການແຜ່ນດິນໄຫວຮຸນແຮງຢູ່ນະຄອນຫຼວງແມັກຊິກເມື່ອ 32 ປີກ່ອນທີ່ມີຜູ້ເສຍຊີວິດຫຼາຍພັນຄົນ. ລັດໂມເຣໂລສ ເຊິ່ງຢູ່ທາງໃຕ້ຂອງນະຄອນຫຼວງແມັກຊິກ ໄດ້ຮັບຜົນກະທົບຮຸນແຮງເຊັ່ນກັນ ມີຜູ້ເສຍຊີວິດ 55 ຄົນ, ລັດເມຮີໂກທີ່ຢູ່ໃກ້ກັນມີຜູ້ເສຍຊີວິດ 12 ຄົນ ແລະ ລັດເກເຣໂຣທາງເບື້ອງມະຫາສະໝຸດປາຊີຟິກມີຜູ້ເສຍຊີວິດ 3 ຄົນ. ເຈົ້າໜ້າທີ່ແມັກຊິກກ່າວວ່າ: ໃນຈຳນວນຜູ້ເສຍຊີວິດທັງໝົດມີນັກຮຽນຢ່າງໜ້ອຍ 21 ຄົນທີ່ຖືກອາຄານໂຮງຮຽນປະຖົມພັງລົງມາຈາກແຜ່ນດິນໄຫວຮຸນແຮງ ສົ່ງຜົນໃຫ້ອາຄານຫຼາຍຫຼັງພັງລົງມາທາງໃຕ້ຂອງເມືອງຫຼວງແມັກຊິກ.
