ຈຳນວນຜູ້ເສຍຊີວິດຈາກນ້ຳຖ້ວມຢູ່ ສ.ເກົາຫລີ ເພີ່ມເປັນ 40 ຄົນແລ້ວ ປະທານາທິບໍດີກ່າວວ່າ ການຮັບມືໄພພິບັດລົ້ມເຫລວ
ທ່ານ ຢຸນຊອກຢໍ ປະທານາທິບໍດີຂອງ ສ.ເກົາຫລີ ກ່າວຕຳໜິເຖິງຄວາມລົ້ມເຫລວໃນການປະຕິບັດຕາມແຜນຮັບມືໄພພິບັດແຫ່ງຊາດຂອງບັນດາເຈົ້າໜ້າທີ່ທີ່ກ່ຽວຂ້ອງ ຫລັງປະສົບເຫດນ້ຳຖ້ວມຄັ້ງໃຫຍ່ໃນຫລາຍພື້ນທີ່ທົ່ວປະເທດ ໂດຍສະເພາະຢູ່ແຂວງຊຸງຊອງເໜືອ ສົ່ງຜົນໃຫ້ມີຜູ້ເສຍຊີວິດແລ້ວຢ່າງໜ້ອຍ 40 ຄົນ. ຂະນະທີ່ຍັງສູນຫາຍອີກ 9 ຄົນ ແລະ ໄດ້ຮັບບາດເຈັບອີກຈຳນວນໜຶ່ງ.
ທາງການ ສ.ເກົາຫລີ ຄາດວ່າ: ຈຳນວນຜູ້ເສຍຊີວິດ ແລະ ຜູ້ໄດ້ຮັບຜົນກະທົບຈາກເຫດນ້ຳຖ້ວມນີ້ຈະຍັງເພີ່ມສູງຂຶ້ນຢ່າງຕໍ່ເນື່ອງພາຍໃນໄລຍະເວລາອັນສັ້ນນີ້ ໂດຍເຈົ້າໜ້າທີ່ທີມກູ້ໄພເລັ່ງໃຫ້ການຊ່ວຍເຫລືອຜູ້ປະສົບໄພ ແລະ ຄົ້ນຫາສົບຜູ້ເສຍຊີວິດທີ່ອາດຕົກຄ້າງຢູ່ພາຍໃຕ້ອຸໂມງ ຫລື ຈົມຢູ່ໃຕ້ນ້ຳຢ່າງເຕັມຄວາມສາມາດ.
ເຫດການດັ່ງກ່າວເຮັດໃຫ້ເກີດການຕັ້ງຄຳຖາມເຖິງຄວາມພະຍາຍາມໃນການປ້ອງກັນ ແລະ ການຕອບສະໜອງຕໍ່ສະພາບວິກິດທີ່ເກີດຂຶ້ນຂອງລັດຖະບານ ສ.ເກົາຫລີ ແລະ ໜ່ວຍງານທີ່ກ່ຽວຂ້ອງ.
ປະທານາທິບໍດີ ສ.ເກົາຫລີ ຫາກໍເດີນທາງກັບຈາກຕ່າງປະເທດຍອມຮັບວ່າ: ສະພາບນ້ຳຖ້ວມໃນປະເທດຮ້າຍແຮງຂຶ້ນ ສ່ວນໜຶ່ງເປັນຍ້ອນການບໍລິຫານແກ້ໄຂພື້ນທີ່ສ່ຽງບໍ່ດີ ໂດຍທ່ານ ຢຸນຊອກຢໍ ລະບຸວ່າ: ພວກເຮົາໄດ້ເນັ້ນຫລາຍຄັ້ງເຖິງຄວາມສຳຄັນໃນການເຂົ້າເຖິງພື້ນທີ່ສ່ຽງໄພ ລວມທັງການກຽມພ້ອມຈະອົບພະຍົບຖ້າເກີດສະຖານະການສຸກເສີນນັບແຕ່ປີຜ່ານມາ, ແຕ່ຖ້າຫລັກການຂັ້ນພື້ນຖານໃນການຮັບມືຕໍ່ສະຖານະການໄພພິບັດບໍ່ໄດ້ຮັບການຢຶດຖື ຫລື ປະຕິບັດຢ່າງເຂັ້ມງວດ ຈະສົ່ງຜົນຕໍ່ຄວາມປອດໄພຂອງສາທາລະນະຊົນຢ່າງຫລີກລ່ຽງບໍ່ໄດ້.
ໃນປີ 2022 ລັດຖະບານ ສ.ເກົາຫລີ ໄດ້ໃຫ້ຄຳໝັ້ນຈະດຳເນີນການເພື່ອຮັບມືໄພພິບັດທີ່ເກີດຈາກການປ່ຽນແປງຂອງສະພາບອາກາດໃຫ້ດີຂຶ້ນ ຫລັງຜະເຊີນເຫດນ້ຳຖ້ວມຄັ້ງໃຫຍ່ ເນື່ອງຈາກພາຍຸຝົນທີ່ຕົກລົງມາຢ່າງໜັກທີ່ສຸດໃນຮອບ 115 ປີ ຂ້າຊີວິດປະຊາຊົນໄປຢ່າງໜ້ອຍ 14 ຄົນ ແລະ ສ້າງຄວາມເສຍຫາຍເປັນວົງກວ້າງ.
ຖືເປັນອີກໜຶ່ງຄວາມທ້າທາຍໃນການບໍລິຫານແກ້ໄຂສະຖານະການວິກິດຂອງ ສ.ເກົາຫລີ ໃນປີນີ້ ເຖິງວ່າໄລຍະຫລາຍໆປີຜ່ານມາ ສ.ເກົາຫລີ ຈະເຄີຍຜະເຊີນໄພພິບັດຄັ້ງໃຫຍ່ມາແລ້ວຫລາຍຄັ້ງກໍຕາມ.
ອ້າງອີງ:
- www.reuters.com/world/asia-pacific/south-korea-flood-death-toll-rises-39-yoon-orders-all-out-effort-2023-07-17/
- www.abc.net.au/news/2023-07-17/south-korea-floods-rain-death-toll-underpass-rescue/102609930
- www.washingtonpost.com/world/2023/07/17/south-korea-floods-tunnel-deaths/
