ລາວຫາລືການຄຸ້ມຄອງສານເຄມີຕົກຄ້າງໃນຂະແໜງພະລັງງານ

ກົມຄວບຄຸມມົນລະພິດກະຊວງຊັບພະຍາກອນທຳມະຊາດ ແລະ ສິ່ງແວດລ້ອມໄດ້ຈັດກອງປະຊຸມຄະນະກຳມະການຊີ້ນຳໂຄງການຄຸ້ມຄອງ ແລະ ທຳລາຍສານເຄມີອົງຄະທາດທີ່ຕົກຄ້າງ (POPs) ເປັນຕົ້ນ: ສານ PCBs ໃນຂະແໜງພະລັງງານ, ໂດຍປຶກສາຫາລືກ່ຽວກັບການຈັດຕັ້ງປະຕິບັດໂຄງການໃນໄລຍະຜ່ານມາ ແລະ ທົບທວນຄືນບັນດານິຕິກຳກໍຄືຮ່າງດຳລັດວ່າດ້ວຍການນຳເຂົ້າ ແລະ ສົ່ງອອກ, ລວມທັງຄູ່ມືແນະນຳການຄຸ້ມຄອງສານດັ່ງກ່າວ ເພື່ອແນໃສ່ສ້າງຄວາມເຂັ້ມແຂງໃນການຄຸ້ມຄອງ ແລະ ການຈຳກັດສານເຄມີອົງຄະທາດທີ່ເປັນພິດຕົກຄ້າງໃນຂະແໜງພະລັງງານແມ່ນໄດ້ຮັບການສະໜັບສະໜູນງົບປະມານ ຈາກກອງທຶນສິ່ງແວດລ້ອມໂລກ (GEF) ໃນມູນຄ່າ 1,4 ລ້ານໂດລາສະຫະລັດ, ໂດຍໄດ້ຈັດຕັ້ງປະຕິບັດມາແຕ່ທ້າຍປີ 2014 ເປັນຕົ້ນມາ ແລະ ຊ່ວຍໃຫ້ບັນລຸແຜນງານແຫ່ງຊາດວ່າດ້ວຍການປະຕິບັດສົນທິສັນຍາສະຕັອກໂຮມໄລຍະທີໜຶ່ງຈຳນວນ 9 ໂຄງການບູລິມະສິດ, ເຊິ່ງສະແດງໃຫ້ເຫັນວ່າ ສປປ ລາວໄດ້ປະຕິບັດພັນທະຕໍ່ສັນຍາສາກົນເປັນຢ່າງດີ.

ທ່ານ ພອນແກ້ວ ກິ່ງຄຳບາງ ຜູ້ປະສານງານໂຄງການລະດັບຊາດ ໃຫ້ຮູ້ວ່າ: ມາຮອດປັດຈຸບັນໂຄງການຄຸ້ມຄອງ ແລະ ທຳລາຍສານເຄມີທີ່ເປັນພິດຕົກຄ້າງແມ່ນໄດ້ສຳເລັດການຮ່າງດຳລັດວ່າດ້ວຍການນຳເຂົ້າ ແລະ ສົ່ງອອກ ແລະ ຄູ່ມືແນະນຳການຄຸ້ມຄອງສານພີຊີບີ ແລະ ສຳເລັດການລົງເກັບກຳຕົວຢ່າງນໍ້າມັນໝໍ້ແປງໄຟຟ້າໃນ 5 ເມືອງຄື: ເມືອງຫາດຊາຍຟອງ, ໄຊທານີ, ນາຊາຍທອງ, ສັງທອງ ແລະ ເມືອງປາກງື່ມ, ນະຄອນຫລວງວຽງຈັນ ແລະ ກອງປະຊຸມຄັ້ງນີ້, ນອກຈາກສ້າງຄວາມເຂັ້ມແຂງໃຫ້ຂະແໜງການກ່ຽວຂ້ອງ ໃນການຄຸ້ມຄອງໂຄງການທີ່ອາດສົ່ງຜົນກະທົບທາງກົງ ແລະ ທາງອ້ອມຕໍ່ສຸຂະພາບຂອງຄົນ, ສັດ ແລະ ສິ່ງແວດລ້ອມແລ້ວ, ຍັງຊ່ວຍໃຫ້ພາກລັດໂຄສະນາເຜີຍແຜ່ ແລະ ສ້າງຈິດສຳນຶກໃຫ້ມວນຊົນຮັບຮູ້ກ່ຽວກັບການຄຸ້ມຄອງສານເຄມີອົງຄະທາດທີ່ເປັນພິດຕົກຄ້າງອີກດ້ວຍ.

ກອງປະຊຸມດັ່ງກ່າວໄດ້ຈັດຂຶ້ນໃນວັນທີ 29 ມີນານີ້, ທີ່ນະຄອນຫລວງວຽງຈັນ.