ການນຳໃຊ້ເງິນຫລາຍສະກຸນໃນການຄ້າຂາຍຍັງມີຄວາມຈຳເປັນ ແຕ່ຄວນຢູ່ໃນຂອບເຂດຈຳກັດ
ໂດຍ: ທິດກ່ຳ
ໃນອາທິດຜ່ານມາ, ທິດກ່ຳ ໄດ້ໄປຊື້ສິນຄ້າຢູ່ຮ້ານແຫ່ງໜຶ່ງໃນນະຄອນຫລວງວຽງຈັນ, ໃນຂະນະທີ່ຢືນລຽນຄິວລໍຖ້າຈ່າຍເງິນ ໄດ້ເຫັນລູກຄ້າທ່ານໜຶ່ງໄດ້ຈົກເອົາເງິນໃບພັນບາດອອກມາຈ່າຍຄ່າເຄື່ອງ ແລ້ວຜູ້ຂາຍກໍໄລ່ລຽງທອນດ້ວຍເງິນກີບ. ຈາກປາກົດການທີ່ເຫັນນີ້ ສະແດງວ່າການໃຊ້ເງິນຕາຕ່າງປະເທດ ໂດຍສະເພາະເງິນບາດ, ເງິນໂດລາ ແລະ ຍັງບໍ່ທັນເວົ້າເຖິງເງິນຢວນຢູ່ທາງພາກເໜືອຢູ່ບ້ານເຮົາຍັງບໍ່ທັນມີມາດຕະການແກ້ໄຂປົດເປື້ອງອອກຢ່າງສິ້ນເຊີງໄດ້. ເວົ້າຄວາມຈິງແລ້ວ ການນຳໃຊ້ເງິນບາດ, ເງິນໂດລາໃນການຊື້-ຂາຍຢູ່ປະເທດເຮົາແມ່ນມີມາຊ້ານານ ແລະ ເບື້ອງລັດເຮົາເອງກໍບໍ່ສາມາດໃຊ້ມາດຕະການທາງກົດໝາຍຢ່າງເຂັ້ມງວດເດັດຂາດ ເພາະມັນເຖິງຂັ້ນລວາດແຂ້ວເຕົ່າຝັງເລິກແພ່ລາມໄປທົ່ວປະເທດມາໄດ້ຫລາຍທົດສະວັດແລ້ວ.
ໃນຄວາມເປັນຈິງແລ້ວ, ການໃຊ້ເງິນບາດ, ເງິນໂດລາ ແລະ ປະເພດສະກຸນເງິນອື່ນໆ ຍັງຖືວ່າມີຄວາມຈຳເປັນສູງ ເນື່ອງຈາກການນຳເຂົ້າສິນຄ້າ ແຕ່ມັນກໍເປັນສາເຫດໜຶ່ງທີ່ເຮັດໃຫ້ສະກຸນເງິນກີບລາວອ່ອນຄ່າ ແລະ ອາດຈະອ່ອນຄ່າໄປຕິກໆ ເຊິ່ງພວກເຮົາຕ້ອງມີມາດຕະການສະກັດກັ້ນຢ່າງເຂັ້ມງວດ ເດັດຂາດ ມີການຈຳກັດຂອບເຂດທີ່ຊັດເຈນ.
ໃນສາມປີກ່ອນ, ທິດກ່ຳ ໄດ້ຂຽນບົດໜຶ່ງທີ່ພົວພັນເຖິງການໃຊ້ເງິນຫລາຍສະກຸນຂອງລາວເຮົາ ໂດຍປຽບທຽບກັບເງິນບາດໄທ. ໝາຍວ່າຢູ່ລາວເຮົາ ປັດຈຸບັນສາມາດໃຊ້ເງິນສາມສະກຸນຄື: ເງິນກີບ, ເງິນບາດໄທ ແລະ ເງິນໂດລາສະຫະລັດ. ສ່ວນວ່າປະເທດໄທ ພວກເພິ່ນໃຊ້ເງິນປະຈຳຊາດພຽງສະກຸນດຽວຄືເງິນບາດ ໂດຍມີເນື້ອໃນຂຽນວ່າ: ເຮົາໄດ້ໄປບຸນທາດພະນົມ, ຕອນຂາກັບເຮົາຕັ້ງແກ້ງທົດລອງຂໍຊື້ປີ້ຂ້າມຝັ່ງລາວເປັນເງິນກີບ ແຕ່ຜູ້ຂາຍປີ້ເຂົາກໍຕອບວ່າ: “ໜູບໍ່ເຄີຍໃຊ້ເງິນກີບ ຢູ່ເມືອງໄທໃຊ້ແຕ່ເງິນບາດ, ໃຊ້ເງິນສະກຸນອື່ນບໍ່ໄດ້” ເຂົາກ່າວຢ້ຳ. ຈາກນນັ້ນ ຂ້ອຍຈຶ່ງໄດ້ຈົກເອົາເງິນບາດຊື້ປີ້ກັບຝັ່ງລາວ.
ແຕ່ກົງກັນຂ້າມ, ຢູ່ຝັ່ງລາວເຮົາພັດສາມາດຊື້ປີ້ເປັນເງິນກີບ, ເງິນບາດ ທັງເງິນໂດລາໄດ້ຢ່າງເສລີ, ອຶກກະທຶກຄຶກໂຄມ ເບິ່ງຢ່າງໜຶ່ງແລ້ວຄືບໍ່ມີຕົວບົດກົດໝາຍອັນໃດມາຄຸ້ມຄອງ. ຍິ່ງໄປກວ່ານັ້ນ ພົນລະເມືອງລາວທີ່ຢູ່ແຖວຊົນນະບົດລຽບຕາມແຄມຂອງແຕ່ເໜືອສຸດໃຕ້ເຂົາບໍ່ສົນໃຈໃຊ້ເງິນກີບ, ການທຳມາຄ້າຂາຍອັນໃດກໍເອົາແຕ່ເງິນບາດ. ນີ້ລະຄືຕົ້ນເຫດຂອງບັນຫາຂອງຄົນລາວເຮົາເອງທີ່ພາກັນທຳລາຍຄຸນຄ່າຂອງເງິນກີບໃນທາງກົງ ແລະ ທາງອ້ອມ.
ຫາກຕັ້ງໂຈດກັນວ່າ, ເມື່ອໃດເງິນກີບລາວຈຶ່ງຈະຫວນກັບມ່ແຂງຄ່າ ? ຄຳຕອບໂຈດກໍຄື ເມື່ອໃດກົດໝາຍເຂັ້ມແຂງເດັດຂາດ, ຄົນລາວມີສະຕິເປັນເຈົ້າການໃນການປົກປ້ອງສະກຸນເງິນຂອງຊາດ ທັງເສດຖະກິດນັບມື້ເຂັ້ມແຂງ ສາມາດເປັນຄູ່ແຂ່ງ ແລະ ເຊື່ອມໂຍງກັບພາກພື້ນ ແລະ ສາກົນ ນັບທັງພະນັກງານລັດບໍ່ມີການສໍ້ລາດບັງຫລວງ ສັງຄົມຮັ່ງມີສີວິໄລ ເມື່ອນັ້ນເງິນກີບລາວອາດຫວນມາແຂງຄ່າຢ່າງໝັ້ນຄົງ.
