ແຂວງຫົວພັນ ແກ້ໄຂປາກົດການຫຍໍ້ທໍ້ຢູ່ຊາຍແດນລາວ-ຫວຽດ ສາມາດມ້າງຄະດີຢາເສບຕິດ ໄດ້ 14 ເລື່ອງ
ໃນວາລະດໍາເນີນກອງປະຊຸມສະຫລຸບຕີລາຄາການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ ວຽກງານຍ້ອງຍໍຮັກຊາດ ແລະ ພັດທະນາ 5 ປີ (20216 – 2020) ແລະ ທິດທາງແຜນການແຕ່ປີ 2021-2025 ວັນທີ 13 ກໍລະກົດ 2023, ໃຫ້ກຽດເປັນປະທານຂອງ ພົອ ວິໄລ ຫລ້າຄໍາຟອງ ຮອງນາຍົກລັດຖະມົນຕີ, ລັດຖະມົນຕີກະຊວງ ປກສ.
ທ່ານ ພັນເອກ ເພັດນ້ອຍ ລໍລອນສີ ຮອງຫົວໜ້າກອງບັນຊາການ ປກສ ແຂວງຫົວພັນ ລາຍງານວ່າ: ໃນໄລຍະຜ່ານການຈັດຕັ້ງປະຕິບັດວິທີການແກ້ໄຂ, ການປັບປຸງອໍານາດການປົກຄອງທ້ອງຖິ່ນຢູ່ເຂດຊາຍແດນ ໄດ້ປະສານສົມທົບກັບອຳນາດການປົກຄອງຂັ້ນເມືອງປັບປຸງລະບົບການຈັດຕັ້ງອຳນາດການປົກຄອງຂັ້ນບ້ານຢູ່ລຽບຕາມຊາຍແດນ.ພ້ອມທັງແກ້ໄຂກົດປາກົດການຫຍໍ້ທໍ້ ຕໍ່ກັບບັນຫາການລັກລອບເຂົ້າ-ອອກເມືອງ, ການລັກລອບສ້າງຄອບຄົວ, ການເຄື່ອນຍ້າຍ, ຕັ້ງພູມລຳເນົາບໍ່ຖືກຕ້ອງກັບລະບຽບກົດໝາຍຂອງສອງປະເທດ, ການຄ້າຂາຍເຖື່ອນ ສາມາດແກ້ໄຂໄດ້ຫຼາຍເປົ້າໝາຍ ເປັນຕົ້ນແມ່ນມ້າງຄະດີຢາເສບຕິດຢູ່ລຽບຕາມຊາຍແດນຮ່ວມກັບ ສສ ຫວຽດນາມໄດ້ 14 ເລື່ອງ, ຜູ້ຖືກຫາ 24 ຄົນ, ຍິງ 4 ຄົນ, ຢຶດຂອງກາງປະເພດຢາບ້າ 183.000 ເມັດ ນໍ້າໜັກ 18 ກິໂລກຣາມ, ເຮໂຣອິນ 153 ແທ່ງ ໜັກ 65,3 ກິໂລກຣາມ, ຢາຝິ່ນໜັກ 11 ກິໂລກຣາມ, ຢາໄອສ໌ ໜັກ 40 ກິໂລກຣາມ, ລົດໃຫຍ່ 2 ຄັນ ແລະ ຂອງກາງອື່ນໆ.
ສໍາລັບທິດທາງແຜນການແກ້ໄຂໃນຕໍ່ໜ້າ ສືບຕໍ່ປັບປຸງອຳນາດການປົກຄອງທ້ອງຖິ່ນ, ຕະຫລອດຮອດ ປກສ ກຸ່ມບ້ານ, ປກສ ບ້ານ ໃຫ້ໜັກແໜ້ນ ເຂັ້ມແຂງ ທັງຮັບປະກັນດ້ານປະລິມານ, ຄຸນນະພາບ, ຫັນເອົາພະນັກງານລົງກໍ່ສ້າງຮາກຖານການເມືອງຢູ່ເຂດຊາຍແດນໃຫ້ຫລາຍຂຶ້ນ, ເພີ່ມທະວີເຮັດວຽກງານກວດກາຄົ້ນເຂົ້າ-ອອກດ່ານໃຫ້ເຂັ້ມງວດ ເພື່ອຍົກສູງວຽກງານປ້ອງກັນ, ສະກັດກັ້ນ ແລະ ແກ້ໄຂບັນດາປາກົດການຫຍໍ້ທໍ້ຢູ່ເຂດຊາຍແດນໃຫ້ນັບມື້ຫລຸດໜ້ອຍຖອຍລົງເທື່ອລະກ້າວ.
