ຮອງນາຍົກລັດຖະມົນຕີ ເນັ້ນໃຫ້ຄະນະບໍລິຫານງານພັກ ຫສນຍ ເອົາໃຈໃສ່ 7 ບັນຫາສຳຄັນ

ໃນໂອກາດ ເຂົ້າຮ່ວມກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ຫ້ອງວ່າການສຳນັກງານນາຍົກລັດຖະມົນຕີ (ຫສນຍ) ສະໄໝທີ V ວັນທີ 13 ກໍລະກົດ 2023, ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ໄດ້ເນັ້ນໃຫ້ຄະນະບໍລິຫານງານພັກ ແລະ ສະມາຊິກພັກ ຫສນຍ ສືບຕໍ່ເອົາໃຈໃສ່ຕື່ມ 7 ບັນຫາສຳຄັນເປັນຕົ້ນ:

1. ໃຫ້ສືບຕໍ່ຄົ້ນຄວ້າ, ສໍາຫລວດກວດກາຕົນເອງຄືນ ວ່າອັນໃດມີຄວາມຈິງ, ອັນໃດບໍ່ມີຄວາມຈິງ ເພື່ອເປັນເຈົ້າການປັບປຸງແກ້ໄຂໃຫ້ຕົກໄປໂດຍມີການໄຈ້ແຍກໃຫ້ຈະແຈ້ງວ່າ ອັນໃດເປັນຄວາມຮັບຜິດຊອບລວມຂອງໝູ່ຄະນະ, ຈຸດສຸມໃນການແກ້ໄຂ, ອັນໃດເປັນຄວາມຮັບຜິດຊອບການເມືອງ ແລະ ບັນຫາສ່ວນຕົວຂອງແຕ່ລະສະຫາຍ ທີ່ຕ້ອງປັບປຸງແກ້ໄຂປ່ຽນແປງໃຫ້ໄດ້;

2. ໃຫ້ມີຄວາມເຂົ້າໃຈຖືກຕ້ອງ ແລະ ເປັນເອກະພາບ ຕໍ່ຜົນຂອງການທາບທາມ ກໍຄືການປະກອບຄໍາຄິດເຫັນ ຕໍານິສົ່ງຂ່າວຈາກສະມາຊິກພັກ, ພະນັກງານຫລັກແຫລ່ງທີ່ເຂົ້າຮ່ວມທາບທາມນັ້ນຖືວ່າແມ່ນການສະແດງເຖິງຄວາມເປັນຫ່ວງເປັນໄຍຕໍ່ການນໍາພາລວມຂອງຄະນະພັກ ແລະ ແຕ່ລະສະຫາຍໃນຄະນະພັກ, ທັງແມ່ນການປະຕິບັດຫລັກການ ໃຫ້ຂັ້ນລຸ່ມຕໍານິ, ປະກອບຄໍາເຫັນຕໍ່ຂັ້ນເທິງ ແລະ ຫລັກການໃຫ້ມະຫາຊົນ ເຂົ້າຮ່ວມການປັບປຸງກໍ່ສ້າງພັກ, ຄະນະພັກ ແລະ ບຸກຄົນໃນຄະນະພັກ ເພື່ອໃຫ້ບັນດາສະຫາຍສືບຕໍ່ເປັນຫລັກແຫລ່ງ, ເປັນແບບຢ່າງ, ເປັນແວ່ນແຍງທີ່ໃສແຈ້ງ ທົ່ວອົງຄະນະພັກ.

3. ໃຫ້ນໍາເອົາຄໍາຄິດເຫັນຕໍ່ການນໍາພາລວມ ແລະ ຕໍ່ແຕ່ລະສະຫາຍນັ້ນ ໄປຄົ້ນຄວ້າປັບປຸງບົດນໍາພາລວມຂອງຄະນະພັກໃຫ້ເລິກເຊິ່ງຕື່ມ.

4. ໃຫ້ສືບຕໍ່ປັບປຸງການນໍາພາ ແລະ ວິທີເຮັດວຽກຂອງຄະນະພັກ ໃຫ້ມີວິທະຍາສາດ, ຖືກຕ້ອງຕາມຫລັກການນໍາພາຂອງພັກ, ແທດເຖິງຕົວຈິງຫລາຍກວ່າເກົ່າ, ນໍາພາຢ່າງມີຈຸດສຸມ, ແກ້ໄຂບັນຫາຕ່າງໆໃຫ້ໄວ, ທັນການ ແລະ ມີຜົນສໍາເລັດຢ່າງຂາດຕົວ; ທຸກບັນຫາທີ່ໄດ້ວາງອອກ ແລະ ຈັດຕັ້ງນໍາພາປະຕິບັດ ຕ້ອງມີການຕິດຕາມ, ກວດກາ, ຊຸກຍູ້ ແລະ ປະເມີນຜົນ ຢ່າງເປັນປົກກະຕິ ເພື່ອເຫັນໄດ້ອັນທີ່ສໍາເລັດ ແລະ ຄົງຄ້າງ ເພື່ອປັບປຸງແກ້ໄຂໃຫ້ທັນເວລາ;

5. ຕ້ອງປັບປຸງ ແລະ ເພີ່ມທະວີຄວາມສາມັກຄີພາຍໃນຄະນະພັກ, ຄະນະປະຈໍາພັກໃຫ້ໜັກແໜ້ນ ແລະ ມີຄວາມເປັນເອກະພາບສູງ, ເປັນໃຈກາງນໍາພາ ເຕົ້າໂຮມຄວາມສາມັກຄີໃນຖັນແຖວ ສະມາຊິກພັກ-ພະນັກງານ ໃຫ້ເປັນປຶກແຜ່ນແໜ້ນໜາຍິ່ງຂຶ້ນ;

6. ສືບຕໍ່ຕິດຕາມ, ເກັບກຳສະພາບການເມືອງແນວຄິດຂອງສະມາຊິກພັກ-ພະນັກງານ, ຖືເອົາວຽກງານການເມືອງແນວຄິດ “ເປັນຄືສະໜາມຮົບໜຶ່ງ” ໂດຍເລີ່ມຈາກຫັນປ່ຽນດ້ານທັດສະນະ, ແນວຄິດ ດ້ວຍການຫັນວິທີຄິດແບບເກົ່າ ໄປສູ່ການປະດິດສ້າງໃໝ່;

7. ສືບຕໍ່ເພີ່ມທະວີການປັບປຸງການຈັດຕັ້ງ ໃຫ້ປອດໃສ, ໜັກແໜ້ນ, ເຂັ້ມແຂງ, ແທດເໝາະກັບເງື່ອນໄຂໃນສະພາບແວດລ້ອມໃໝ່ ແລະ ສາມາດປະຕິບັດສຳເລັດໜ້າທີ່ການເມືອງຂອງຕົນ; ປະຕິບັດສິດອໍານາດຖືກຕ້ອງຕາມກົດໝາຍ ແລະ ລະບຽບການຕ່າງໆ ທີ່ວາງອອກຢ່າງເຂັ້ມງວດ.