ສົງໄສວ່າເປັນໄຂ້ເລືອດອອກຕ້ອງຟ້າວປິ່ນປົວ
ໃນຍາມທີ່ໄຂ້ເລືອດອອກລະບາດນັ້ນ ເດັກນ້ອຍທີ່ມີອາຍຸ 5 – 14 ປີຈະສ່ຽງຕິດເຊື້ອ ແລະ ປ່ວຍໄດ້ງ່າຍຫລາຍກ່ວາເດັກອາຍຸ ສູງກ່ວານີ້ ແລະ ຜູ້ໃຫຍ່ ໂດຍຕາມແຫ່ລງນຳ້ຂັງຕ່າງໆມັກເປັນບ່ອນວາງໄຂ່ຂອງຍຸງລາຍທີ່ເປັນພາຫະນຳເຊື້ອພະຍາດ ຫາກຄົນໃນເຮືອນ ຫລື ກຸ່ມບ້ານປ່ວຍເປັນໄຂ້ເລືອດອອກຂຶ້ນມາ ກໍມັກຈະເພີ່ມຈຳນວນຄົນປ່ວຍຂຶ້ນໄປເລື້ອຍໆ. ດັ່ງນັ້ນ, ຫາກມີອາການໄຂ້, ປວດເມື່ອຍຕົນໂຕໃນໄລຍະທີ່ໄຂ້ເລືອດອອກລະບາດ ຄວນກິນຢາຫລຸດໄຂ້ຊະນິດປາຣາເຊຕາໂມນເທົ່ານັ້ນ ຫາກໃຊ້ຢາອື່ນອາດເຮັດໃຫ້ຄົນປ່ວຍຊັອກໄດ້.
ໄຂ້ເລືອດອອກນີ້ເມື່ອຍຸງມີເຊື້ອມາກັດຄົນຈະປ່ອຍເຊື້ອເຂົ້າສູ່ຮ່າງກາຍ ແລະ ໃຊ້ເວລາຟັກໂຕຢູ່ປະມານ 5 – 8 ມື້ ຈຶ່ງສະແດງອາການ ເຊິ່ງຈະແບ່ງອອກເປັນ 3 ໄລຍະດັ່ງນີ້ :
- ໄລຍະໄຂ້ສູງ ປະມານ 2 – 7 ມື້ ມັກມີອາການເຈັບຫົວ, ປວດເບົ້າຕາ, ປວດເມື່ອຍຕາມຂໍ້ ແລະ ຕາມກ້າມຊີ້ນໂຕ, ເບື່ອອາຫານ, ອ່ອນເພຍ, ວິນຫົວປວດຮາກ, ປາກແຫ້ງ, ມີຈຸດເລືອດຂຶ້ນຕາມຕົນໂຕ ຫລື ມີເລືອດດັງໄຫລ.
- ໄລຍະໄຂ້ຫລຸດ ໄຂ້ທີ່ສູງຢູ່ຈະຫລຸດລົງຢ່າງໄວວາ, ແຕ່ຍັງອ່ອນເພຍ ແລະ ເບື່ອອາຫານ ຍັງຄວນຕ້ອງໄດ້ຮັບການເບິ່ງແຍງດູແລຢ່າງໃກ້ຊິດຢູ່ ເພາະຄົນທີ່ເປັນຫລາຍອາດຖ່າຍອາຈົມ ຫລື ຮາກເປັນເລືອດ ເຮັດໃຫ້ຊັອກ ແລະ ອາດເສຍຊີວິດໄດ້, ຄົນທີ່ເປັນບໍ່ຮຸນແຮງຈະຄ່ອຍໆຫລຸຸດຜ່ອນອາການລົງ ແລະ ກິນອາຫານໄດ້.
- ໄລຍະຟື້ນໂຕ ຫລັງຈາກໄຂ້ຫລຸດໂດຍບໍ່ມີອາການແຊກຊ້ອນແລ້ວ ຄົນປ່ວຍຈະດີຂຶ້ນ ອາດມີຕຸ່ມຜື່ນແດງຕາມຕົນໂຕ ເຮັດໃຫ້ຄົນໄດ້, ແຕ່ຈະເຊົາໄດ້ເອງພາຍໃນ 2 – 3 ມື້ ແລະ ອາການອື່ນໆກໍຈະຫາຍໄປຈົນກັບເຂົ້າສູ່ສະພາບປົກກະຕິ.
ພະຍາດນີ້ບໍ່ມີຢາປິ່ນປົວໂດຍສະເພາະ ແພດຈະປິ່ນປົວຕາມອາການເທົ່ານັ້ນ ຫາກບໍ່ຮຸນແຮງແພດຈະຈ່າຍຢາ ແລ້ວກັບໄປເບິ່ງແຍງຕົນເອງຢູ່ເຮືອນ, ຄວນພັກຜ່ອນໃຫ້ຫລາຍໆ, ກິນຢາທີ່ແພດສັ່ງໃຫ້ຄົບ ແລ້ວເຊັດໂຕເພື່ອຫລຸດໄຂ້ ຈະເຮັດໃຫ້ສະບາຍໂຕຂຶ້ນ, ຄວນດື່ມນຳ້ໃຫ້ຫລາຍ, ປ້ອງກັນອາການຮ່າງກາຍຂາດນຳ້, ດື່ມໄດ້ທັງນຳ້ດື່ມບໍລິສຸດ, ນຳ້ໝາກໄມ້ ຫລື ເກືອແຮ່ກໍໄດ້ ຫາກອາການບໍ່ດີຂຶ້ນ, ຊຶງ, ອ່ອນເພຍຫລາຍ, ກິນອາຫານ ຫລື ດື່ມນຳ້ໄດ້ໜ້ອຍ, ເຈັບທ້ອງ, ຮາກ, ໂຕເຢັນຜິດປົກກະຕິ, ສັບສົນກະວົນກະວາຍ ຄວນຟ້າວໄປໂຮງໝໍອີກເທື່ອໜຶ່ງ.
