ຮອງນາຍົກລັດຖະມົນຕີ ຮ່ວມປຶກສາຫາລືການປະຕິບັດງານສາກົນ ເພື່ອການພັດທະນາຮ່ວມກັນຂອງປະເທດກຳລັງພັດທະນາ

ໃນວັນທີ 10 ກໍລະກົດ 2023 ທີ່ນະຄອນຫລວງປັກກິ່ງ ສປ ຈີນ, ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ນຳພາຄະນະຜູ້ແທນຈາກ ສປປ ລາວ ເຂົ້າຮ່ວມກອງປະຊຸມລະດັບສູງ ຄັ້ງທຳອິດ ຂອງເວທີປຶກສາຫາລືວ່າດ້ວຍ ການປະຕິບັດງານສາກົນ ເພື່ອການພັດທະນາຮ່ວມກັນ ພາຍໃຕ້ຂໍ້ລິເລີ່ມດ້ານການພັດທະນາສາກົນທີ່ສະເໜີໂດຍທ່ານ ສີ ຈິ້ນ ຜິງ ປະທານປະເທດ ແຫ່ງ ສປ ຈີນ ໂດຍການເປັນເຈົ້າພາບຂອງອົງການຮ່ວມມືເພື່ອການພັດທະນາສາກົນຂອງ ສປ ຈີນ.

ໃນກອງປະຊຸມ, ທ່ານ ຫວັງ ອີ້ ກຳມະການກົມການເມືອງສູນກາງພັກ, ຫົວໜ້າຫ້ອງການຄະນະກຳມະການກິດຈະການຕ່າງປະເທດ ສູນກາງພັກຄອມມູນິດຈີນ ໄດ້ອ່ານສານຊົມເຊີຍກອງປະຊຸມຂອງທ່ານປະທານສີຈິ້ນຜິງ ແລະ ໄດ້ກ່າວເປີດກອງປະຊຸມຢ່າງເປັນທາງການ. ກອງປະຊຸມ ໄດ້ປຶກສາຫາລືກ່ຽວກັບມາດຕະການ ແລະ ແນວທາງປະຕິບັດຕ່າງໆ ເພື່ອຊຸກຍູ້ສົ່ງເສີມການຮ່ວມມືເພື່ອການພັດທະນາຮ່ວມກັນ ຂອງປະເທດກຳລັງພັດທະນາ ກໍຄື ວິທີການແກ້ໄຂບັນດາສິ່ງທ້າທາຍຕ່າງໆ ທີ່ກີດຂວາງການພັດທະນາເສດຖະກິດສັງຄົມຢູ່ໃນໂລກ ໂດຍສະເພາະພາຍໃຕ້ຂອບຂໍ້ລິເລີ່ມດ້ານການພັດທະນາສາກົນ ເພື່ອເປັນການປະກອບສ່ວນສຳຄັນໃນການເລັ່ງລັດການຈັດຕັ້ງປະຕິບັດວາລະ 2030 ເພື່ອການພັດທະນາແບບຍືນຍົງໃຫ້ບັນລຸຜົນເປັນຈິງ ໃນປີ 2030;  ຜົນຂອງກອງປະຊຸມທີ່ສຳຄັນແມ່ນການຮັບຮອງເອົາຖະແຫລງການປັກກິ່ງ ໃນນັ້ນ ຢັ້ງຢືນເຖິງຄວາມໝາຍໝັ້ນທາງດ້ານການເມືອງຂອງບັນດາປະເທດທີ່ເຂົ້າຮ່ວມ ກໍຄື ການມີສ່ວນຮ່ວມຂອງທຸກພາກສ່ວນທີ່ກ່ຽວ ຂ້ອງທັງພາກລັດ, ພາກເອກະຊົນ, ອົງການຈັດຕັ້ງສາກົນ, ອົງການຈັດຕັ້ງທາງສັງຄົມ ເພື່ອຮ່ວມມືກັນໃນວຽກງານການພັດທະນາເສດຖະກິດ-ສັງຄົມ ຢູ່ໃນສາກົນ ກໍຄື ການຈັດຕັ້ງປະຕິບັດຂໍ້ລິເລີ່ມດ້ານການພັດທະນາສາກົນໃຫ້ມີປະສິດທິພາບ ແລະ ປະສິດທິຜົນ.

ໂອກາດດັ່ງກ່າວ, ທ່ານ ສະເຫລີມໄຊ ກົມມະສິດ ໄດ້ມີຄຳເຫັນໃນທີ່ປະຊຸມ ໂດຍຊີ້ໃຫ້ເຫັນບັນດາສິ່ງທ້າທາຍທີ່ໂລກເຮົາກໍາລັງຜະເຊີນຢູ່ ອັນໄດ້ສົ່ງຜົນກະທົບໂດຍກົງຕໍ່ການພັດທະນາເສດຖະກິດ-ສັງຄົມ ໃນທົ່ວໂລກ ແລະ ຮຽກຮ້ອງໃຫ້ທຸກພາກສ່ວນສືບຕໍ່ຮ່ວມມືກັນໃນການແກ້ໄຂສິ່ງທ້າທາຍຕ່າງໆ ເພື່ອສັນຕິພາບ ແລະ ການພັດທະນາທີ່ຢືນຍົງຮ່ວມກັນ, ພ້ອມທັງໄດ້ຢໍ້າເຖິງຄວາມໝາຍຄວາມສຳຄັນຂອງຂໍ້ລິເລີ່ມດ້ານການພັດທະນາສາກົນ ເຊິ່ງເປັນກົນໄກການຮ່ວມມືຫລາຍຝ່າຍທີ່ຈະຊ່ວຍຊຸກຍູ້ເລັ່ງລັດການບັນລຸວາລະ 2030 ການພັດທະນາແບບຍືນຍົງຂອງປະເທດທີ່ກຳລັງພັດທະນາ ຢ່າງເປັນຮູບປະທຳ ແລະ ສອດຄ່ອງ.

ໃນໂອກາດເຂົ້າຮ່ວມກອງປະຊຸມໃນຄັ້ງນີ້, ທ່ານ ສະເຫລີມໄຊ ກົມມະສິດ ຍັງໄດ້ພົບປະສອງຝ່າຍກັບທ່ານ ຫວັງ ອີ້ ເພື່ອປຶກສາຫາລືກ່ຽວກັບການສົ່ງເສີມການຮ່ວມມືສອງຝ່າຍ ໃນດ້ານການເມືອງ, ເສດຖະກິດ ແລະ ວັດທະນະທຳ-ສັງຄົມ ເຊິ່ງເປັນການສືບຕໍ່ເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອ, ການພົວພັນຮ່ວມມືແບບຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ແລະ ການເປັນຄູ່ຮ່ວມຊະຕາກຳ ລາວ-ຈີນ, ຈີນ-ລາວ ລະຫວ່າງສອງປະເທດ ກໍຄື ການຮ່ວມມືໃນຂອບອາຊຽນ.

ການຈັດກອງປະຊຸມຄັ້ງນີ້, ເປັນສ່ວນໜຶ່ງຂອງການດຳເນີນງານ ເພື່ອຜັນຂະຫຍາຍຂໍ້ລິເລີ່ມດ້ານການພັດທະນາສາກົນ ຂອງປະທານ ສີ ຈິ້ນ ຜິງ ທີ່ໄດ້ນໍາສະເໜີຕໍ່ກອງປະຊຸມສະມັດຊາໃຫຍ່ອົງການສະຫະປະຊາຊາດ ສະໄໝທີ 76 ໃນເດືອນກັນຍາ ປີ 2021. ຂໍ້ລິເລີ່ມດັ່ງກ່າວ ໄດ້ຍຶດຖືເອົາການພັດ ທະນາເປັນບູລິມະສິດຫລັກ ໂດຍຖືເອົາປະຊາຊົນເປັນໃຈກາງ, ທຸກຄົນລ້ວນແລ້ວແຕ່ໄດ້ຮັບຜົນປະ ໂຫຍດ, ນຳໃຊ້ນະວັດຕະກຳໃໝ່ເປັນສິ່ງຂັບເຄື່ອນການພັດທະນາ ໂດຍການຢູ່ຮ່ວມກັນຢ່າງກົມກຽວລະຫວ່າງມະນຸດ ແລະ ທຳມະຊາດ ເຊິ່ງກວມເອົາ 8 ຂົງເຂດວຽກງານບູລິມະສິດ ທີ່ສອດຄ່ອງກັບເປົ້າໝາຍການພັດທະນາແບບຍືນຍົງຄື: ການຫລຸດຜ່ອນຄວາມທຸກຍາກ, ການຄໍ້າປະກັນດ້ານສະບຽງອາ ຫານ, ການຮັບມືກັບພະຍາດລະບາດ ແລະ ວັກຊິນ, ການສະໜອງເງິນເພື່ອການພັດທະນາ, ການປ່ຽນ ແປງດິນຟ້າອາກາດ ແລະ ການພັດທະນາສີຂຽວ, 6 ການຫັນເປັນອຸດສາຫະກໍາທີ່ທັນສະໄໝ, ເສດ ຖະກິດດີຈິຕອນ ແລະ ການເຊື່ອມໂຍງໃນຍຸກດີຈິຕອນ.

ຂ່າວ-ພາບ: ກຕທ