ຂົນສົ່ງສິນຄ້າຕ້ອງຮັບປະກັນຄວາມປອດໄພ ບໍ່ແມ່ນເອົາແຕ່ຄວາມຢາກໄດ້ ແຕ່ໄຮ້ຄວາມຮັບຜິດຊອບຕໍ່ສັງຄົມ
ໂດຍ: ຜາຕຸງ
ທຸກອາຊີບທີ່ເວົ້າມານີ້ກໍລ້ວນແລ້ວແຕ່ແມ່ນອາຊີບທີ່ດີມີກຽດສະຫງ່າ ແລະ ບໍລິສຸດໂດຍທີ່ບໍ່ໄດ້ໄປສໍ້ໂກງໃຜຜູ້ໃດເລີຍ, ແຕ່ກໍຄວນເບິ່ງຄືໃນເວລາລຳລຽງຂົນສົ່ງສິນຄ້າໂດຍສະເພາະປະເພດ ກວດນ້ຳດື່ມປລາສຕິກ, ການແກ່ເສດເຫັກ ໄປສົ່ງຈຸດຈຳໜ່າຍ ຫຼື ເອົາໄປໄວ້ເຮືອນຂອງຕົນເອງຕ້ອງມີຄວາມຮັບຜິດຊອບຕໍ່ສັງຄົມຂຶ້ນຕື່ມອີກ ດ້ວຍການທີ່ບັນທຸກເກີນຂອດເຂດ ສ້າງຄວາມເດືອດຮ້ອນຕໍ່ສັງຄົມເວລາໃຊ້ລົດລາງພາຫະນະໄປຕາມທ້ອງຖະໜົນທັງສ່ຽງຕໍ່ການເກີດອຸບັດເຫດຕື່ມອີກ, ຊຶ່ງຜ່ານມາປາກົດຍັງເຫັນເຫັນຫຼາຍໃນນະຄອນຫຼວງວຽງຈັນ ແລະ ຕາມຕົວເມືອງໃຫຍ່.
ສັງຄົມລາວເຂົ້າໃຈເລື່ອງການພະຍາມຍາມປະກອບອາຊີບໃນດ້ານຕ່າງໆ ຫາລ້ຽງກຸ້ມຕົນເອງຕາມຄວາມສາມາດ ແລະທ່າແຮງທີ່ຕົນມີດ້ວຍຄວາມຊື່ສັດສຸດຈະລິດ ແຕ່ຕ້ອງເຮັດໃຫ້ຖືກຕ້ອງຕາມລະບຽບກົດໝາຍບ້ານເມືອງ ເຊິ່ງຜູ້ຮັບຊື້ ແລະ ຂົນສົ່ງຂອງເກົ່າປະເພດ ກວດນ້ຳດື່ມປລາສຕິກ, ແກັດເຈ້ຍ ແລະ ເຫຼັກເສດ ໃນລັກສະນະດັ່ງກ່າວນີ້ອາດເຂົ້າໃຈວ່າມັນເບົາ ບໍ່ກະທົບຕໍ່ບຸກຄົນອື່ນ ແຕ່ຢ່າລືມວ່າຖ້າຫາກມັນໂລດໂຜນເກີນໄປກໍເບິ່ງບໍ່ເປັນລະບຽບ, ບຸກຄົນອື່ນເຫັນມີຄວາມຢ້ານກົວ ແລະ ຢ້ານເຖິງຄວາມບໍ່ປອດໄພ.
ຕ້ອງທຳຄວາມເຂົ້າໃຈວ່າເສັ້ນທາງຄົມມະນາຄົມ ແມ່ນຊັບສົມບັດສ່ວນລວມຂອງຊາດທຸກຄົນໜ້າທີ່ປົກປັກຮັກສາທະນຸບຳລຸງສ້ອມແປງໃຫ້ນຳໃຊ້ໄດ້ຍາວນານ ແລະ ທຸກຄົນມີສິດຊົມໃຊ້ຮ່ວມກັນ ແຕ່ການຊົມໃຊ້ກໍບໍ່ຄວນເຫັນແກ່ຕົວ ໃຊ້ດ້ວຍຄວາມຮັບຜິດຊອບຊ່ວຍກັນໂດຍທີ່ບໍ່ສ້າງຄວາມເດືອດຮ້ອນໃຫ້ຄົນຈຳນວນຫຼາຍ ຜ່ານມາມັກເຫັນວ່າລົດ ທີ່ຂົນສົ່ງສິນຄ້າເຫຼົ່ານັ້ນມັກຈະຕໍ່ເຕີມເສີມແຕ່ງ ໂຕຖັງຂອງລົດໃຫ້ສູງຂຶ້ນ ເຮັດໃຫ້ບັນທຸກໄດ້ຫຼາຍເກີນກວ່າກຳນົດທີ່ມີ ໂດຍສະເພາະແມ່ນຄວາມສູງ ສ້າງຄວາມກີດຂວາງການສັນຈອນໄປມາບໍ່ສາມາດເບິ່ງເຫັນໄດ້ໄກ ເຊິ່ງສ່ຽງຕໍ່ການເກີດອຸບັດເຫດໄດ້ງ່າຍທັງເພິ່ນທັງໂຕ, ດັ່ງນັ້ນ ຄວນຄຳນຶງເຖິງຄວາມປອດໄພໄວ້ກ່ອນມາລະຍາດຂອງນັກຂັບຂີ່ທີ່ດີ ຈະບໍ່ສ້າງຄວາມເດືອດຮ້ອນໃຫ້ຜູ້ອື່ນ.
ນອກຈາກນີ້ ຝາກເຖິງພາກສ່ວນກ່ຽວຂ້ອງ ກວດກາເຂັ້ມງວດເລື່ອງມາດຕະຖານການບັນຈຸເຄື່ອງຂອງໃນລົດຂົນສົ່ງສິນຄ້າ, ນໍ້າໜັກກັບຂະໜາດຂອງລົດ ໃຫ້ພໍດ້າມພໍດີ ຫາກພົບເຫັນການລະເມີດກໍຕ້ອງມີການສຶກສາອົບຮົມ ແລະ ປັບໃໝໃສ່ລະບຽບກັນຄັກແນ່ ເພື່ອເປັນແບບຢ່າງ ແລະ ເປັນລະບຽບຂອງສັງຄົມ.
