ສປປ ລາວ ເລັ່ງໃສ່ພັດທະນາແລວທາງເສດຖະກິດ ເພື່ອເຊື່ອມໂຍງ-ເຊື່ອມຈອດ ພາກພື້ນ ແລະ ສາກົນ

ກອງປະຊຸມຄະນະຊີ້ນໍາໂຄງການພັດທະນາຕາມແລວທາງເສດຖະກິດອາຊີຕາເວັນ ອອກສ່ຽງໃຕ້ ເພື່ອການເຊື່ອມຈອດ-ເຊື່ອມໂຍງ (Project Steering Committee Meeting) ແບບທາງເຊິ່ງໜ້າ ແລະ ຜ່ານວິດີໂອທາງໄກ, ດຳເນີນໄປໃນວັນທີ 5 ກໍລະກົດ 2023 ທີ່ນະຄອນຫລວງວຽງຈັນ, ໂດຍການເປັນປະທານຮ່ວມຂອງ ທ່ານ ງາມປະສົງ ເມືອງມະນີ ລັດຖະມົນຕີ ກະຊວງໂຍທາທິການ ແລະ ຂົນສົ່ງ ແລະ ທ່ານ ໂພລ ແຄລີ, ເອກອັກຄະລັດຖະທູດອົດສະຕຣາລີປະຈຳ ສປປ ລາວ.

ໂຄງການ SEARECC ແມ່ນໂຄງການໜຶ່ງທີ່ໄດ້ຈັດຕັ້ງປະຕິບັດນະໂຍບາຍ ແລະແນວ ທາງຂອງລັດຖະບານ ໃນການຫັນ ສປປ ລາວ ຈາກ ປະເທດທີ່ບໍ່ມີທາງອອກສູ່ທະເລໃຫ້ກາຍເປັນໃຈກາງສຳຄັນຂອງການເຊື່ອມຈອດ ແລະ ເຊື່ອມໂຍງ ດ້ານການຄ້າ, ການຜະລິດ, ການທ່ອງທ່ຽວ ແລະ ໂລຈິດສະຕິກຂອງພາກພື້ນ ແລະ ສາກົນ. ພ້ອມນີ້, ກໍມີຄວາມສອດຄ່ອງ ແລະ ປະກອບສ່ວນຢ່າງຕັ້ງໜ້າໃນການຈັດຕັ້ງຜັນຂະຫຍາຍ ແຜນພັດທະນາເສດຖະກິດ-ສັງຄົມ ຄັ້ງທີ 9 (2021-2025) ແລະ ວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ ຮອດປີ 2023 ຂອງ ລັດຖະບານລາວ, ໃນນັ້ນ, ກະຊວງໂຍທາທິການ ແລະ ຂົນສົ່ງ ໄດ້ຖືກມອບໝາຍໃຫ້ເປັນເຈົ້າການຮັບຜິດຊອບ 4 ໜ້າວຽກຫລັກຄື:

1. ໜ້າວຽກການເຊື່ອມຈອດ-ເຊື່ອມໂຍງພາກພື້ນ-ປັບປຸງເສັ້ນທາງຫລວງແຫ່ງຊາດໝາຍເລກ 2 ເຊິ່ງເປັນສ່ວນໜຶ່ງຂອງ AH 13, ທາງຫລວງທ້ອງຖິ່ນເຂົ້າຫາເຂດການຜະລິດຢູ່ 5 ແຂວງ (ອຸດົມໄຊ, ຜົ້ງສາລີ, ໄຊຍະບູລີ, ຫລວງນ້ຳທາ ແລະ ຫລວງພະບາງ) ແລະ ດ່ານຊາຍແດນສາກົນປາງຫົກ ຕິດກັບ ສສ ຫວຽດນາມ ແລະ ດ່ານຊາຍແດນສາກົນນ້ຳເງິນ ຕິດກັບລາດຊະນາຈັກໄທ.
2. ໜ້າວຽກພັດທະນາ ແລະ ຍົກລະດັບຂະແໜງບໍລິການໂລຈິດສະຕິກ ແລະ ການຄຸ້ມຄອງຂະບວກການຂ້າມແດນ-ພັດທະນາທ່າບົກ ໂດຍສະເພາະ ແຂວງອຸດົມໄຊ, ແຂວງຫລວງພະບາງ ແລະ ແຂວງໄຊຍະບູລີ ເພື່ອສ້າງເງື່ອນໄຂດຶງດູດການລົງທຶນຂອງເອກະຊົນໃນການພັດທະນາທ່າບົກ ປັບປຸງບັນດານະໂຍບາຍ ແລະ ລະບຽບການທີ່ຕິດພັນກັບດ່ານຊາຍແດນໃຫ້ເປັນທັນສະໄໝ ແລະ ຍົກລະດັບຂິດຄວາມສາມາດຂອງແຂວງ ແລະ ປັບປຸງລະບຽບການເພື່ອຊຸກຍູ້ການແຂ່ງຂັນໃນການບໍລິການໂລຈິດສະຕິກ.
3. ໜ້າວຽກສ້າງຄວາມເຂັ້ມແຂງໃຫ້ກັບອົງກອນ ຫລື ກົງຈັກ, ສ້າງຄວາມເຂັ້ມແຂງແກ່ ຂະແໜງກະສິກຳໃນການປັບປຸງມາດຕະຖານການກວດຢັ້ງຢືນຄຸນນະພາບ ແລະ ຄວາມປອດໄພຂອງພຶດ ແລະ ສັດ (SPS), ປັບປຸງຂີດຄວາມສາມາດ ເພື່ອຊຸກຍູ້ການຄ້າ, ສິນຄ້າກະສິກໍາ, ສ້າງຄວາມເຂັ້ມແຂງແກ່ຂະແໜງໂຍທາທິການ ແລະ ຂົນສົ່ງ ຊຸກຍູ້ສົ່ງເສີມນິຕິກໍາ ແລະ ນະໂຍບາຍຂົນສົ່ງຫລາຍຮູບແບບ ແລະ ຈັດຕັ້ງປະຕິບັດສັນຍາຂົນສົ່ງຂ້າມແດນ, ການວາງແຜນ, ການປະສານງານ, ຄວາມປອດໄພຕາມທ້ອງຖະໜົນ, ການມີສ່ວນຮ່ວມຂອງແມ່ຍິງເຂົ້າໃນການພັດທະນາຂອງຂະແໜງການ ແລະ ການຮັບປະກັນວຽກສິ່ງແວດລ້ອມ-ສັງຄົມ ຂອງຂັ້ນສູນກາງ ແລະ ທ້ອງຖິ່ນ.
4. ໜ້າວຽກຄຸ້ມຄອງບໍລິຫານໂຄງການລວມມີ ການປະສານງານໂຄງການ, ການຈັດຊື້-ຈັດຈ້າງ, ການຄຸ້ມຄອງການເງິນ, ການຄຸ້ມຄອງວຽກງານສິ່ງແວດລ້ອມ ແລະ ສັງຄົມ, ການຕິດຕາມ ແລະ ປະເມີນຜົນ, ການກວດສອບການເງິນ ແລະ ເຕັກນິກ.

ໂຄງການ SEARECC ແມ່ນ 1 ໃນໂຄງການຕົວແບບ ແລະ ເປັນບູລິມະສິດຂອງລັດຖະບານ, ເປັນບາດກ້າວຫັນປ່ຽນໃນການພັດທະນາພື້ນຖານໂຄງລ່າງໃນ ສປປ ລາວ. ເປັນໂຄງການທໍາອິດ ແລະ ໂຄງການຕົວແບບທີ່ສຸມໃສ່ ການພັດທະນາແບບເປັນເຂດແຄວ້ນ ຫລື Area-wide Approach Project Development ໂດຍມີສ່ວນຮ່ວມ ຈາກ 7 ກະຊວງ,ຂະແໜງການ ແລະ 5 ແຂວງພາກເໜືອ; ເພື່ອຂຸດຄົ້ນເອົາທ່າແຮງດ້ານເສດຖະກິດທີ່ບົ່ມຊ້ອນ ໂດຍຜ່ານການປັບປຸງຍົກລະດັບການເຊື່ອມຈອດ ລະຫວ່າງ ພື້ນທີ່ການຜະລິດ ແລະ ເຂດບໍລິການໂລຈິດສະຕິກ ກັບ ແລວທາງລົດໄຟລາວ-ຈີນ, ເຊິ່ງຈະນໍາໄປສູ່ການປ່ຽນແປງ, ເພີ່ມການເຕີບໂຕດ້ານເສດຖະກິດ, ດຶງດູດການລົງທຶນໂດຍກົງຈາກຕ່າງປະເທດ, ຫັນປ່ຽນເສດຖະກິດໄປສູ່ຮູບໂສມໃໝ່ ຜ່ານການສົ່ງເສີມການຜະລິດກະສິກຳ ທົດແທນການນໍາເຂົ້າ ແລະ ເປັນສິນຄ້າສົ່ງອອກ, ສ້າງຖານລາຍຮັບທີ່ເຂັ້ມແຂງ-ຍືນຍົງ (ຫັນໄປສູ່ສັງຄົມການຜະລິດ)  ເຮັດໃຫ້ ສປປ ລາວ ສາມາດປະກອບສ່ວນເຂົ້າໃນຕ່ອງໂສ້ການສະໜອງຂອງພາກພື້ນ  ແລະ ສາກົນ.