ການດຳເນີນຄະດີຢາເສບຕິດ ນໍ້າກະທ່ອມ ຢາສູບໄຟຟ້າ ປຸມເປົ້າອັດແກັສ ຍັງມີຄວາມຫຍຸ້ງຍາກ ແລະ ຍັງມີຫລາຍບັນຫາໃນການປະຕິບັດຕົວຈິງ

ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ(ອອປ ສ) ໄດ້ຊີ້ແຈງບາງປະເດັນທີ່ ສສຊ ມີຄວາມສົນໃຈ ແລະ ຊັກຖາມ ໃນວາລະກອງປະຊຸມສະ ໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ວັນທີ 5 ກໍລະກົດ 2023, ໂດຍສະເພາະ ກ່ຽວກັບບັນຫາການດຳເນີນຄະດີຢາເສບຕິດ ເຊັ່ນ: ນໍ້າກະທ່ອມ, ຢາສູບໄຟຟ້າ ແລະ ປຸ່ມເປົ້າອັດແກັສ, ລວມທັງວຽກງານກວດກາທົ່ວໄປ ແລະ ອື່ນໆ ເຊິ່ງເປັນບັນຫາສຳຄັນ ທີ່ຈະຕ້ອງໄດ້ເລັ່ງປັບປຸງແກ້ໄຂ ແນໃສ່ເຮັດໃຫ້ສັງຄົມ ມີຄວາມສະຫງົບ ແລະ ເປັນລະບຽບຮຽບຮ້ອຍ.

ຕໍ່ບັນຫາດັ່ງກ່າວ, ທ່ານ ໄຊຊະນະ ໂຄດພູທອນ  ໄດ້ກ່າວຕື່ມວ່າ: ໃນໄລຍະຜ່ານມາ ກົດໝາຍວ່າດ້ວຍຢາເສບຕິດ ແລະ ກົດໝາຍອາຍາ ຍັງບໍ່ທັນໄດ້ກຳນົດຈະແຈ້ງ ແຕ່ການປະຕິບັດຕົວຈິງເຫັນວ່າ ມີຄວາມຫຍຸ້ງຍາກ ແລະ ມີຫລາຍບັນຫາທີ່ເກີດຂຶ້ນ. ສະນັ້ນ, ອອປສ ຈຶ່ງໄດ້ອອກຄຳສັ່ງ ເຖິງບັນດາອົງການໄອຍະການ ປະຈຳທ້ອງຖິ່ນ ໃນຂອບເຂດທົ່ວປະເທດ ເພື່ອເຂັ້ມງວດ ແລະ ເດັດຂາດໃນການດຳເນີນຄະດີ. ປັດຈຸບັນໄດ້ຮັບການລາຍງານວ່າ ບາງທ້ອງຖິ່ນ, ບາງແຂວງ ສາມາດຈັດຕັ້ງປະຕິບັດໄດ້ດີ ແຕ່ກໍຍັງມີບາງແຂວງ, ບາງທ້ອງຖິ່ນ ຍັງບໍ່ສາມາດປະຕິບັດໄດ້. ເພື່ອແກ້ໄຂບັນຫາທີ່ເຄັ່ງຮ້ອນດັ່ງກ່າວ ພາຍຫລັງທີ່ສຳເລັດກອງປະຊຸມຄັ້ງນີ້, ອອປສ ຈະນຳເອົາບັນຫາໄປຄົ້ນຄວ້າ ແລະ ຫັນເປັນນິຕິກຳ, ຄຳສັ່ງ, ຄຳແນະນຳ ເພື່ອເປັນເຄື່ອງມືອັນລະ ອຽດໃນການຈັດຕັ້ງປະຕິບັດທົ່ວປະເທດ.   ເພື່ອໃຫ້ເຂົ້າເຖິງການຕິດຕາມກວດກາ ການປະຕິບັດກົດໝາຍ ຂອງບັນດາກະຊວງຂະແໜງການ ຕ້ອງມີກົນໄກປະສານ, ຄວາມສາມາດຂອງພະນັກງານ  ທີ່ຍັງມີຈໍາກັດທາງດ້ານປະລິມານ ແລະ ຄຸນນະພາບ, ຍັງບໍ່ທັນເປັນເຈົ້າການ ໃນການປະຕິບັດພາລະບົດບາດຢ່າງເຕັມສ່ວນ. ປັດຈຸບັນ ຢູ່ກົງຈັກອົງການໄອຍະການປະຊາຊົນຂັ້ນທ້ອງຖິ່ນ ຍັງບໍ່ທັນມີຂະແໜງຕິດຕາມກວດກາທົ່ວໄປສະເພາະ ແລະ ປົນຢູ່ນຳຂະແໜງການອື່ນ ຍ້ອນຈຳນວນບຸກຄະລາກອນມີຈຳກັດ; ຄວາມຮັບຮູ້ ແລະ ເຂົ້າໃຈ ຂອງປະຊາຊົນ, ພະນັກງານ, ທະຫານ ຕຳຫລວດ, ພັກ, ລັດ ຈຳນວນບໍ່ໜ້ອຍຍັງບໍ່ທັນເຂົ້າໃຈເລິກ ແລະ ກວ້າງຂວາງເທົ່າທີ່ຄວນ ກ່ຽວກັບພາລະບົດບາດຕິດຕາມກວດກາທົ່ວໄປ ຂອງອົງການໄອຍະການປະຊາຊົນ; ເນື່ອງຈາກກົດໝາຍກຳນົດພາລະບົດບາດນີ້ ກວ້າງຂວາງເກີນໄປ ແລະ ຍັງມີລັກສະນະຊ້ຳຊ້ອນກັນ ກັບພາກສ່ວນອື່ນ ທີ່ເຮັດໜ້າ ທີ່ກວດກາ ເຮັດໃຫ້ມີຄວາມຫຍຸ້ງຍາກໃນການປະຕິບັດ.

ເພື່ອແກ້ໄຂບັນຫາຫຍຸ້ງຍາກ ຂອງວຽກງານຕິດ ຕາມກວດກາ ທົ່ວໄປ, ອອປສ ໄດ້ເປັນເອກະພາບ ກຳນົດ 5 ວຽກ ຈຸດສຸມຄື: ການຕິດຕາມກວດກາທົ່ວໄປ; ການຕິດ ຕາມກວດ ກາ ການດໍາເນີນຄະດີປົກຄອງ; ການຕິດຕາມກວດກາ ການປະຕິບັດຄໍາຕັດສິນຂອງສານ; ການຕິດຕາມກວດກາສະຖິຕິອາຊະຍາກຳ ພ້ອມທັງວິເຄາະວິໄຈ ອາຊະຍາກຳໄປພ້ອມ ແລະ ການຕິດຕາມກວດກາ ການອອກນິຕິກຳຂອງບັນດາກະຊວງ, ອົງການຈັດຕັ້ງຕ່າງໆ.

ນອກນີ້, ຍັງໄດ້ອອກຄຳສັ່ງເລກທີ 016/ອອປສ ເຖິງອົງການໄອຍະການປະຊາຊົນແຂວງ ເພື່ອໃຫ້ປະສານສົມ ທົບ ແລະ ຂໍທິດຊີ້ນຳ ຈາກບັນດາທ່ານເຈົ້າແຂວງ ຫລື ເລຂາພັກແຂວງ ເພື່ອເປັນໃຈກາງປະສານສົມທົບ ແລະ ຊຸກຍູ້ບັນດາຂະແໜງການທີ່ກ່ຽວຂ້ອງ ໄດ້ສົ່ງນິຕິກຳໃຫ້ແກ່ອົງ ການໄອຍະການປະຊາຊົນ ເພື່ອຕິດຕາມກວດກາ ເຊິ່ງໄດ້ທົດລອງເຮັດຢູ່ເມືອງລ້ອງຊານ, ແຂວງໄຊສົມບູນ ເຫັນວ່າມີຜົນສຳເລັດ ໂດຍສະເພາະໄດ້ຕິດຕາມກວດກາ ການອອກນິຕິກຳຕ່າງໆຂອງ 25 ບ້ານພາຍໃນເມືອງລ້ອງຊານ ມີຄວາມຖືກຕ້ອງ ແລະ ເປັນເອກະພາບກັນ. ນອກຈາກນັ້ນ, ຍັງໄດ້ຫັນເອົາພະນັກງານຂັ້ນກົມ ລົງໄປຕິດຕາມຊຸກຍູ້ວຽກ ງານຕິດຕາມກວດກາທົ່ວໄປ ຢູ່ຂັ້ນທ້ອງຖິ່ນ ເປັນຕົ້ນແຂວງ ສະຫວັນນະເຂດ, ແຂວງສາລະວັນ, ແຂວງຄຳມ່ວນ, ແຂວງ ບໍລິຄຳໄຊ, ແຂວງຫົວພັນ ແລະ ແຂວງຊຽງຂວາງ ເພື່ອໃຫ້ອົງການໄອຍະການປະຊາຊົນທ້ອງຖິ່ນ ໄດ້ຈັດຕັ້ງປະຕິບັດພາລະບົດບາດ ຕິດຕາມກວດກາທົ່ວໄປ ໄດ້ຢ່າງແຂງແຮງ.

ເພື່ອແກ້ໄຂບັນຫາດັ່ງກ່າວ ໃນຕໍ່ໜ້າ ອອປສ ຈະຄົ້ນຄວ້າສ້າງກົນໄກປະສານສົມທົບກັບ ສໍານັກງານຫ້ອງວ່າການນາຍົກລັດຖະມົນຕີ, ກະຊວງ, ຂະແໜງການ, ອົງການປົກ ຄອງທ້ອງຖິ່ນ ແລະ ພາກສ່ວນອື່ນທີ່ກ່ຽວຂ້ອງ ກ່ຽວກັບການຕິດຕາມກວດກາທົ່ວໄປ ໃຫ້ສຳເລັດ; ສືບຕໍ່ສ້າງຄວາມເຂົ້າໃຈເປັນເອກະພາບ ກັບພາກສ່ວນທີ່ກ່ຽວຂ້ອງ ໃຫ້ແຂງ ແຮງກວ່າເກົ່າ ດ້ວຍຮູບການ ແລະ ວິທີການລົງເລິກ; ສືບຕໍ່ສ້າງ ແລະ ປັບປຸງນິຕິກໍາໃຕ້ກົດ  ໝາຍ ຈຳນວນໜື່ງ ເພື່ອເປັນເຄື່ອງມືໃນການຈັດຕັ້ງປະຕິບັດ ເປັນຕົ້ນ ແມ່ນ ຄູ່ມືກ່ຽວກັບ ວຽກງານຕິດຕາມກວດກາທົ່ວໄປ ແລະ ການປ້ອງກັນອາຊະຍາກຳ.