7 ວຽກງານ ສະພາແຫ່ງຊາດສະເໜີລັດຖະບານ ເອົາໃຈໃສ່ແກ້ໄຂບັນຫາ ປະກັນສຸຂະພາບ ປະກັນສັງຄົມ ໃຫ້ມີຄວາມສະດວກສະບາຍ

ທ່ານ ຄຳໃບ ດຳລັດ ຮອງປະທານສະພາແຫ່ງຊາດລາຍງານ ກ່ຽວກັບຜົນສຳເລັດ ການພິຈາລະນາບົດລາຍງານຂອງລັດຖະບານກ່ຽວກັບການຈັດຕັ້ງປະຕິ ບັດຍຸດທະສາດການປົກປ້ອງສັງຄົມແຫ່ງຊາດ ຂຶ້ນໃນວັນທີ 4 ກໍລະກົດນີ້  ໂດຍສະພາແຫ່ງຊາດໄດ້ສະເໜີໃຫ້ລັດຖະບານເອົາໃຈໃສ່ ແກ້ໄຂບາງດ້ານດັ່ງນີ້:

1. ໃຫ້ລັດຖະບານ ດໍາເນີນການຕິດຕາມກວດກາ ແລະ ປະເມີນຜົນວຽກ ງານປະກັນສຸຂະພາບ ປະກັນສັງຄົມ ເພື່ອຊອກໃຫ້ເຫັນດ້ານດີ ຂໍ້ຄົງຄ້າງ ສາເຫດ ແລະ ວິທີແກ້ໄຂໃນຕໍ່ໜ້າ ໂດຍສະເພາະໃນເງື່ອນໄຂທີ່ປະເທດເຮົາ ຍັງມີຄວາມຫຍຸ້ງຍາກທາງດ້ານເສດຖະກິດ-ການເງິນ ຊີວິດການເປັນຢູ່ ຂອງປະຊາຊົນຍັງມີຄວາມຫຍຸ້ງຍາກ ການຕອບສະໜອງງົບປະມານຂອງ ລັດໃຫ້ແກ່ກອງທຶນປະກັນສຸຂະພາບ ແລະ ກອງທຶນປະກັນສັງຄົມ ຍັງມີ ຄວາມຈຳກັດ ກອງປະຊຸມສະເໜີລັດຖະບານຄົ້ນຄວ້າໂຮມສອງກອງທຶນ ດັ່ງກ່າວໃຫ້ຂຶ້ນກັບອົງການຄຸ້ມຄອງດຽວກັນພາຍໃຕ້ການຊີ້ນຳໂດຍກົງຂອງລັດຖະບານ ເພື່ອເຮັດໃຫ້ວຽກງານປະກັນສຸຂະພາບ ປະກັນສັງຄົມມີຄວາມ ເຂັ້ມແຂງ ແລະ ຍືນຍົງ ຫຼຸດຜ່ອນການແບກຫາບດ້ານງົບປະມານຂອງລັດ.
2. ໃຫ້ລັດຖະບານສ້າງ ແລະ ປັບປຸງລະບົບຖານຂໍ້ມູນລະດັບຊາດ ກ່ຽວກັບວຽກງານປະກັນສຸຂະພາບ ປະກັນສັງຄົມ ແລະ ສະຫວັດດີການສັງຄົມ ໃຫ້ລວມສູນ ທັນສະໄໝ ແລະ ສາມາດເຊື່ອມຕໍ່ກັນໄດ້ລະຫວ່າງຂະແໜງ ການ ທ້ອງຖິ່ນໃນຂອບເຂດທົ່ວປະເທດ ສາມາດກຳນົດໄດ້ກຸ່ມເປົ້າໝາຍທີ່ ຈະໄດ້ຮັບການຊ່ວຍເຫຼືອເປັນຕົ້ນ: ຜູ້ທີ່ມີຖານະເສດຖະກິດທຸກຍາກ ປານ ກາງ ຜູ້ມີຖານະດີ ກຸ່ມເປົ້າໝາຍທີ່ດ້ອຍໂອກາດ ກຸ່ມທີ່ໄດ້ຮັບການປົກປ້ອງ ພິເສດ.
3. ໃຫ້ລັດຖະບານເອົາໃຈໃສ່ປັບປຸງກົນໄກການຄຸ້ມຄອງບໍລິຫານ ບັນຫາ ຄຸນນະພາບການບໍລິການຂອງລະບົບປະກັນສຸຂະພາບ ປະກັນສັງຄົມ ແລະ ສະຫວັດດີການສັງຄົມໃຫ້ມີປະສິດທິພາບ ແລະ ປະສິດທິຜົນ ລວມທັງການ ປັບປຸງຈັນຍາບັນ ຈັນຍາທໍາຂອງບຸກຄະລາກອນໃຫ້ມີນ້ຳໃຈຮັບໃຊ້ຊາດ ຮັບ ໃຊ້ປະຊາຊົນຢ່າງແທ້ຈິງ ຄົ້ນຄວ້າການອອກບັດປະກັນສຸຂະພາບໃຫ້ທົ່ວເຖິງ ປັບປຸງບັດປະກັນສັງຄົມ ບັດປະກັນສຸຂະພາບໃຫ້ສາມາດນຳໃຊ້ໄດ້ຢ່າງສະ ດວກຢູ່ທຸກສະຖານທີ່ບໍລິການປິ່ນປົວສຸຂະພາບໃນຂອບເຂດທົ່ວປະເທດ.
4. ໃຫ້ລັດຖະບານຄົ້ນຄວ້າຈັດສັນງົບປະມານ ເພື່ອແກ້ໄຂບັນຫາໜີ້ສິນທີ່ ສະສົມມາຫຼາຍປີຂອງກອງທຶນປະກັນສຸຂະ ພາບ ເພື່ອບໍ່ໃຫ້ເກີດມີໜີ້ສິນສະ ສົມ ໄປເລື້ອຍໆ ແລະ ເພີ່ມງົບປະມານໃຫ້ແກ່ວຽກງານປະກັນສຸຂະພາບ ປະກັນສັງຄົມ ແລະ ສະຫວັດດີການສັງຄົມ ໂດຍສະເພາະແມ່ນການປະຕິ ບັດນະໂຍບາຍຕໍ່ຜູ້ມີຜົນງານ ຄຸນງາມຄວາມດີໃນພາລະກິດປະຕິວັດຊາດ ປະຊາທິປະໄຕ ໃຫ້ສຳເລັດໂດຍໄວ.
5. ໃຫ້ລັດຖະບານເອົາໃຈໃສ່ຊີ້ນໍາບັນດາຂະແໜງການກ່ຽວຂ້ອງຄົ້ນຄວ້າ ສ້າງ ແລະ ປັບປຸງກົດໝາຍ ນິຕິກຳໃຕ້ກົດໝາຍກ່ຽວກັບວຽກງານປະກັນ ສຸຂະພາບ ປະກັນສັງຄົມ ແລະ ສະຫວັດດີການສັງຄົມໃຫ້ສອດຄ່ອງກັບ ການຂະຫຍາຍຕົວຂອງເສດຖະກິດ-ສັງຄົມ ແລະ ສະພາບຄວາມເປັນ ຈິງຂອງແຕ່ລະໄລຍະ ພ້ອມທັງຊຸກຍູ້ ຕິດຕາມ ກວດກາ ການໂຄສະນາ ເຜີຍແຜ່ ແລະ ການຈັດຕັ້ງປະຕິບັດໃຫ້ແຂງແຮງ.
6. ໃຫ້ລັດຖະບານຊີ້ນໍາຄະນະກໍາມາທິການແຫ່ງຊາດເພື່ອການປົກປ້ອງ ສັງຄົມ ດໍາເນີນການປະເມີນຜົນການຈັດຕັ້ງປະຕິບັດຍຸດທະສາດການ ປົກປ້ອງສັງຄົມແຫ່ງຊາດ ເພື່ອປັບປຸງວິທີການ ມາດຕະການຈັດຕັ້ງປະ ຕິບັດ 20 ກິດຈະກຳທີ່ກຳນົດໄວ້ໃນແຜນຍຸດທະສາດດັ່ງກ່າວໃຫ້ເກີດ ຜົນເປັນຈິງ.
7. ໃຫ້ລັດຖະບານຊີ້ນໍາການຄົ້ນຄວ້າ ແລະ ປັບປຸງພາລະບົດບາດ ສິດ ແລະ ໜ້າທີ່ຂອງຄະນະກຳມາທິການເພື່ອປົກປ້ອງສັງຄົມ ປັບປຸງກົນໄກ ປະສານງານໃນການຈັດຕັ້ງປະຕິບັດຍຸດທະສາດການປົກປ້ອງສັງຄົມແຫ່ງຊາດ ລະຫວ່າງ ບັນດາຂະແໜງການຂັ້ນສູນກາງດ້ວຍກັນ ແລະ ລະຫວ່າງສູນ ກາງກັບທ້ອງຖິ່ນ ໃຫ້ມີຄວາມໂລ່ງລ່ຽນ ກົມກຽວກັນ ມີປະສິດທິພາບ ແລະ ປະສິດທິຜົນກວ່າເກົ່າ.