ເຕືອນໄພໃກ້ໂຕ! ພາວເວີແບັງລະເບີດຂຶ້ນໂດຍທີ່ບໍ່ໄດ້ສຽບສາຍສາກ
ສຳນັກຂ່າວຕ່າງປະເທດລາຍງານ: ວັນທີ 28 ມິຖຸນາ 2023 ຜ່ານມາ ກໍລະນີມີຜູ້ໃຊ້ເຟສບຸກລາຍໜຶ່ງໂພສເຕືອນໄພ ພາຍຫລັງລອດຕາຍແບບຫວຸດຫວິດ ເນື່ອງຈາກເກີດເຫດພາວເວີແບັງລະເບີດ ໄຟເກືອບໄໝ້ເຮືອນໝົດຫລັງ, ເຄື່ອງຂອງເສຍຫາຍ ພາວເວີແບັງດັ່ງກ່າວ ເປັນຂອງແຖມຈາກການຊື້ໂທລະສັບ.
ຜູ້ໃຊ້ເຟສບຸກຄົນດ່ັງກ່າວ ລະບຸຂໍ້ຄວາມວ່າ: ໃນວັນທີ 19 ມິຖຸນາ 2023 ຜ່ານມາ ໄດ້ໄປຊື້ໂທລະສັບ 1 ໜ່ວຍໃນຫ້າງສັບພະສິນຄ້າແຫ່ງໜຶ່ງ ໂດຍທາງຮ້ານໄດ້ມີຂອງແຖມໃຫ້ເປັນຕົ້ນ ຫູຟັງບູທູດ, ລຳໂພງບູທູດ ແລະ ພາວເວີແບັງ 10000 mah, ຈາກນັ້ນ ເມື່ອກັບມາຮອດເຮືອນໄດ້ແກະເຊັກອຸປະກອນທຸກຢ່າງພ້ອມທັງໄດ້ລອງສາກ ພາວເວີແບັງໄວ້ ແລະ ກ່ອນນອນໄດ້ມີການຖອດອອກແລ້ວເກັບອຸປະກອນທຸກຢ່າງໄວ້ໃນກະເປົາເດີນທາງ ເພາະຕົນເອງຈະໄດ້ເດີນທາງໄປປະເທດມຽນມາ, ຕອນເຊົ້າຂອງມື້ຕໍ່ມາໄດ້ກິ່ນຂິວໄໝ້ ທຳອິດຄິດວ່າໄໝ້ຈາກເຮືອນອື່ນ ແລະ ບໍ່ພໍເທົ່າໃດນາທີ ກໍໄດ້ຍິນສຽງລະເບີດດັງຂຶ້ນ, ຈາກນັ້ນຈຶ່ງເຂົ້າໄປເບິ່ງໃນຫ້ອງນອນຂອງຕົນເອງຈຶ່ງປາກົດເຫັນ ໄຟໄໝ້ກະເປົາເດີນທາງທີ່ວາງໄວ້ກາງຫ້ອງ, ໂຊກດີທີ່ໄຟຍັງບໍ່ລາມໄປບ່ອນນອນ ແລະ ສາຍໄຟອື່ນໆ, ຖືວ່າຍັງໂຊກດີທີ່ບໍ່ລະເບີດຕອນນອນ ແລະ ຖືວ່າເປັນບຸນຫົວທີ່ຍັງບໍ່ທັນໄດ້ຂຶ້ນຍົນ.
ເຖິງແມ່ນວ່າ ປະຕິເສດບໍ່ໄດ້ໃນເມື່ອທຸກຄົນມີໂທລະສັບ ທຸກຄົນກໍຕ້ອງໃຊ້ພາວເວີແບັງໄປນຳເວລາເດີນທາງ ແຕ່ເຖິງຢ່າງໃດກໍຕາມ ຝາກເຕືອນໄວ້ເປັນອຸທາຫອນໃນການໃຊ້ພາວເວີແບັງ ຂໍໃຫ້ກວດເບິ່ງສະພາບ ແລະ ພິຈາລະນາໃຫ້ດີວ່າມັນຈະບໍ່ລະເບີດຂຶ້ນ.
