ອົງການອະນາໄມໂລກເລັ່ງກໍານົດໃຫ້ “ແອສປາຣ໌ແຕມ” ເປັນສານເຮັດໃຫ້ເກີດມະເຮັງ
ໜ່ວຍງານວິໄຈພະຍາດມະເຮັງຂອງອົງການອະນາໄມໂລກ (WHO) ຄາດວ່າຈະກໍານົດໃຫ້ “ແອສປາຣ໌ແຕມ” ຫລື ສານໃຫ້ຄວາມຫວານແທນນໍ້າຕານທີ່ໄດ້ຮັບຄວາມນິຍົມຫລາຍທີ່ສຸດໃນໂລກ ເປັນສານທີ່ອາດເຮັດໃຫ້ເກີດມະເຮັງ. ຖືເປັນການເຄື່ອນໄຫວທີ່ສັ່ນສະເທືອນອຸດສາຫະກໍາອາຫານ ແລະ ເຄື່ອງດື່ມ.
ວັນທີ 30 ມິຖຸນາ, ສໍານັກຂ່າວຕ່າງປະເທດລາຍງານວ່າ: WHO ກ່າວໃນຖະແຫລງການວ່າ: ອົງການສາກົນເພື່ອການວິໄຈມະເຮັງ (IARC) ໄດ້ມີການປະເມີນຜົນກະທົບຂອງແອສປາຣ໌ແຕມທີ່ອາດເຮັດໃຫ້ເກີດມະເຮັງ.
ຕໍ່ຈາກນີ້, ຄະນະກໍາມະການຜູ້ຊ່ຽວຊານຮ່ວມລະຫວ່າງອົງການອາຫານ ແລະ ກະສິກໍາ ແລະ ອົງການອະນາໄມໂລກແຫ່ງສະຫະປະຊາຊາດ ວ່າດ້ວຍວັດຖຸເຈືອປົນອາຫານ (JECFA) ຈະປັບປຸງແບບປະເມີນຄວາມສ່ຽງຂອງແອສປາຣ໌ແຕມ ໄດ້ແກ່ ການທົບທວນປະລິມານການບໍລິໂພກປະຈໍາວັນທີ່ຍອມຮັບໄດ້ ແລະ ການປະເມີນການສໍາຜັດແອສປາຣ໌ແຕມທາງອາຫານ.
ແອສປາຣ໌ແຕມ ເປັນສານໃຫ້ຄວາມຫວານທີ່ຖືກໃຊ້ຢ່າງແພ່ຫລາຍໃນເຄື່ອງດື່ມ ແລະ ອາຫານທົ່ວໄປເຊັ່ນ: ໄດເອດໂຄ້ກ, ຊິງກົມບໍ່ມີນໍ້າຕານ ແລະ ໂຢເກີດ. ທັງຢູ່ໃນຢາອົມແກ້ໄອ ແລະ ຢາຖູແຂ້ວບາງຊະນິດ ກໍມີສານຊະນິດນີ້ຢູ່ເຊັ່ນກັນ. ສະນັ້ນ IARC ລະບຸວ່າ: ມີຫລັກຖານບົ່ງຊີ້ວ່າ: ແອສປາຣ໌ແຕມ ມີການພົວພັນຕໍ່ການເກີດພະຍາດມະເຮັງໃນມະນຸດ ແຕ່ຍັງບໍ່ຈະແຈ້ງ.
ຂະນະທີ່, ທ່ານ ນາງ ຟຣານເຊສ ຮັນ-ວູດ ເລຂາທິການສະມາຄົມສານໃຫ້ຄວາມຫວານສາກົນ (ISA) ກ່າວໃນຖະແຫລງການວ່າ: IARC ບໍ່ແມ່ນໜ່ວຍງານດ້ານຄວາມປອດໄພຂອງອາຫານ ແລະ ບໍ່ສາມາດຫາຂໍ້ສະຫລຸບຂອງການເປັນສານເຮັດໃຫ້ເກີດມະເຮັງໄດ້ ຈົນກວ່າລາຍງານປະເມີນທັງສອງສະບັບຈະຖືກເຜີຍແພ່.
ນອກຈາກນີ້, ສະພາສະມາຄົມເຄື່ອງດື່ມສາກົນ (ICBA) ເຊິ່ງເປັນອົງການການຄ້າສໍາລັບອຸດສາຫະກໍາເຄື່ອງດື່ມທີ່ບໍ່ມີແອລກໍຮໍ ຍັງປະນາມການຮົ່ວໄຫລຂອງລາຍງານ ເຊິ່ງອາດສ້າງຄວາມເຂົ້າໃຈຜິດຕໍ່ຜູ້ບໍລິໂພກ ແລະ ເຮັດໃຫ້ພວກເຂົາບໍລິໂພກນໍ້າຕານເພີ່ມຂຶ້ນ ແທນທີ່ຈະເລືອກສານໃຫ້ຄວາມຫວານທີ່ບໍ່ມີນໍ້າຕາລ ຫລື ມີນໍ້າຕານໜ້ອຍ.
ທັງນີ້, ການຈັດປະເພດໃຫ້ແອສປາຣ໌ແຕມເປັນສານທີ່ອາດເຮັດໃຫ້ເກີດມະເຮັງ ຄືການເຄື່ອນໄຫວຫລ້າສຸດຂອງ WHO ຫລັງຈາກເດືອນຜ່ານມາ WHO ແນະນໍາໃຫ້ຜູ້ບໍລິໂພກຢຸດໃຊ້ສານໃຫ້ຄວາມຫວານທີ່ບໍ່ແມ່ນນໍ້າຕານ ເພື່ອຄວບຄຸມນໍ້າໜັກ ໂດຍໃຫ້ເຫດຜົນວ່າ: ມັນບໍ່ສາມາດຊ່ວຍຫລຸດນໍ້າໜັກໄດ້, ແຕ່ຄໍາແນະນໍາດັ່ງກ່າວບໍ່ໄດ້ຊີ້ເຖິງຄວາມສ່ຽງຕໍ່ສຸຂະພາບທີ່ອາດເກີດຂຶ້ນແຕ່ຢ່າງໃດ.
