ລັດຖະບານ ປະຕິບັດ 5 ວຽກຈຸດສຸມ ແກ້ໄຂ ຄວາມຫຍຸ້ງຍາກ ດ້ານເສດຖະກິດ-ການເງິນ

ນັບແຕ່ເດືອນກັນຍາ ປີ 2021 ມາຮອດປັດຈຸບັນ, ລັດຖະບານ ກໍຄື ບັນດາຂະແໜງການ ແລະ ທ້ອງຖິ່ນ ທີ່ກ່ຽວຂ້ອງ ໄດ້ມີຄວາມພະຍາຍາມໃນການຜັນຂະຫຍາຍເນື້ອໃນ ແລະ ຄາດໝາຍໃນວາລະແຫ່ງຊາດ ໂດຍສະເພາະວາລະແຫ່ງຊາດ ວ່າດ້ວຍການແກ້ໄຂ ຄວາມຫຍຸ້ງຍາກທາງດ້ານເສດຖະກິດ-ການເງິນ ເຂົ້າສູ່ວຽກງານຕົວຈິງຂອງຕົນໃນ 5 ວຽກຈຸດສຸມ ຄື: ການສົ່ງເສີມການຜະລິດ-ການບໍລິ ການ ເພື່ອທົດແທນການນຳເຂົ້າ ແລະ ເປັນສິນຄ້າສົ່ງອອກ; ການສ້າງຄວາມເຂັ້ມແຂງ ດ້ານການເກັບລາຍຮັບງົບປະ ມານ; ການສົ່ງເສີມການປະຢັດ, ຕ້ານການຟູມເຟືອຍ, ຍົກສູງປະສິດທິຜົນການລົງທຶນ-ລາຍຈ່າຍ ງົບປະມານ ແລະການແກ້ໄຂໜີ້ສິນພາຍໃນ ແລະ ຕ່າງປະເທດ; ການສ້າງສະຖຽນລະພາບດ້ານເງິນຕາ ແລະ ການຍົກສູງປະສິດທິພາບການຄຸ້ມຄອງລັດດ້ວຍກົດໝາຍ. ຜ່ານການຈັດຕັ້ງປະຕິບັດຕົວຈິງໃນໄລຍະ 2 ປີ ຜ່ານມາ ບັນດາຂະແໜງການໄດ້ປະຕິບັດ ຕາມບົດບາດໜ້າທີ່ຂອງຕົນ ດ້ວຍຄວາມພະຍາຍາມເຮັດໃຫ້ 5 ວຽກຈຸດສຸມໄດ້ຮັບຜົນສໍາເລັດເປັນກ້າວໆມາ.

ທ່ານ ຄຳເຈນ ວົງໂພສີ ລັດຖະມົນຕີກະຊວງແຜນການ ແລະ ການລົງທຶນ ລາຍງານໃນກອງປະຊຸມ ສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ໃນວັນທີ 29 ມິຖຸ ນາ 2023 ນີ້ວ່າ: ການຈັດຕັ້ງປະຈິບັດ ວາລະແຫ່ງຊາດວ່າດ້ວຍການແກ້ໄຂຄວາມຫຍຸງຍາກທາງດ້ານເສດຖະກິດ- ການເງິນ ໃນໄລຍະຜ່ານມາ ສູນກາງພັກ, ລັດຖະບານ, ສະ ພາແຫ່ງຊາດ ໄດ້ມີການຊີ້ນຳ-ນຳພາ ຢ່າງຈົດຈໍ່, ເຮັດໃຫ້ 5 ວຽກຈຸດສຸມ ດັ່ງກ່າວ, ມີຫລາຍໜ້າວຽກໄດ້ຮັບຜົນສຳເລັດເປັນກ້າວໆ, ອັນພົ້ນເດັ່ນແມ່ນລາຍຮັບງົບປະມານ ມີທ່າອ່ຽງເພີ່ມຂຶ້ນ ແລະ ຄຸ້ມຄອງລາຍຈ່າຍຕາມທິດປະຢັດ, ເຮັດໃຫ້ການແກ້ໄຂຄວາມຫຍຸ້ງຍາກ ດ້ານເສດຖະກິດ- ການເງິນ ໄດ້ໃນລະດັບປະຄັບປະຄອງ, ກົງຈັກການຈັດຕັ້ງມີຄວາມກະທັດຮັດກວ່າເກົ່າ, ສະຕິຄວາມຕື່ນຕົວໃນການປະຢັດມັດທະຢັດ ການນຳໃຊ້ງົບປະມານຂອງລັດ, ຂອງການຈັດຕັ້ງທຸກຂັ້ນໄດ້ຮັບການປັບປຸງຕື່ມອີກ ຊຶ່ງທັງໝົດນັ້ນ ຈະເປັນພື້ນຖານສໍາຄັນ ເພື່ອສືບຕໍ່ບຸກບືນຕໍ່ໄປ. ຢ່າງ ໃດກໍຕາມ, ຍັງມີບາງຄາດໝາຍຫລາຍດ້ານບໍ່ທັນບັນລຸ, ມີບາງດ້ານສົ່ງຜົນກະທົບຕໍ່ສິ່ງແວດລ້ອມ, ທໍາມະຊາດ ແລະ ສັງຄົມ.

ຜົນສຳເລັດທີ່ຍາດໄດ້ໃນໄລຍະຜ່ານມາ ແມ່ນມີຫລາຍດ້ານ ທີ່ໄດ້ຮັບການຈັດຕັ້ງປະຕິບັດ ຢ່າງເປັນຮູບປະທຳ ເປັນຕົ້ນ, ວຽກຈຸດສຸມການສົ່ງເສີມການຜະລິດ-ການບໍລິການ ເພື່ອທົດແທນການນໍາເຂົ້າ ແລະ ເປັນສິນຄ້າສົ່ງອອກ ໂດຍສະ ເພາະ ດ້ານກະສິກຳ-ປ່າໄມ້ ໄດ້ມີຜົນສໍາເລັດທີ່ພົ້ນເດັ່ນ ໄດ້ສຸມໃສ່ຜະລິດສະບຽງອາຫານ ເພື່ອຮັບໃຊ້ພາຍໃນ ເຊິ່ງສາມາດຜະລິດເຂົ້າ ເພື່ອຄໍ້າປະກັນສະບຽງອາຫານ ໂດຍຜະລິດເຂົ້າ ໃນປີ 2022 ປະຕິບັດໄດ້ 957.629 ເຮັກຕາ, ຜົນຜະລິດ 3,78 ລ້ານໂຕນ, ທຽບໃສ່ກ່ອນມີວາລະແຫ່ງ ຊາດແມ່ນເພີ່ມຂຶ້ນ 0,3%. ມາຮອດເດືອນພຶດສະພາ 2023 ສາມາດເກັບກ່ຽວຜົນຜະລິດ ເຂົ້ານາແຊງໄດ້ 441.850 ໂຕນ ແລະ ປູກພືດສະບຽງອາຫານໄດ້ປະມານ 1,07 ລ້ານໂຕນ ໃນເນື້ອທີ່ 125.870 ເຮັກຕາ ເຊິ່ງຈຸດພິເສດໃນການເກັບກ່ຽວເຂົ້ານາແຊງໃນປີນີ້ ແມ່ນປະຕິບັດໄດ້ຕາມແຜນຍ້ອນປະຊາຊົນຫັນມານຳໃຊ້ ກົນຈັກທົດແທນການນຳໃຊ້ແຮງງານຄົນຫລາຍຂຶ້ນ. ສ່ວນການປູກພືດສະບຽງອາຫານເພື່ອບໍລິໂພກພາຍໃນ ແລະ ປ້ອນໂຮງງານອຸດສະຫະກຳປຸງແຕ່ງໃນປີ 2022 ໄດ້ຜົນຜະລິດ 2.369.580 ໂຕນ, ທຽບໃສ່ກ່ອນປະຕິບັດວາລະແຫ່ງຊາດ ເພີ່ມຂຶ້ນ 14,4%; ມາ ຮອດເດືອນພຶດສະພາ 2023 ການປູກພືດເປັນສິນຄ້າລະດູແລ້ງໄດ້ 45.359 ເຮັກຕາ. ໃນປີ 2022 ສາມາດຜະລິດຊີ້ນ, ໄຂ່ ແລະ ປາ ໄດ້ທັງໝົດ 507.644 ໂຕນ, ທຽບໃສ່ກ່ອນປະຕິບັດວາລະແຫ່ງຊາດ ເພີ່ມຂື້ນ 4,5% (ຈາກ 485.480 ໂຕນ), ມາຮອດປັດຈຸບັນ ຜະລິດໄດ້ 263.095 ໂຕນ, ປະຕິ ບັດໄດ້ 49,5% ຂອງແຜນການປີ. ນອກນັ້ນ ຍັງສາມາດຮັບ ປະກັນໄດ້ພືດສະບຽງອາຫານ ເພື່ອບໍລິໂພກພາຍໃນ ແລະ ປ້ອນ ໂຮງງານອຸດສະຫະກຳປຸງແຕ່ງ ແລະ ສົ່ງອອກ ມາ ຮອດເດືອນພຶດສະພາ 2023 ການປູກພືດສິນຄ້າລະດູແລ້ງໄດ້ 45.359 ເຮັກຕາ.

ໃນໄລຍະ 6 ເດືອນຕົ້ນປີ 2023, ສາມາດຜະລິດພະລັງ ງານ ໄຟຟ້າໄດ້ 24.316 ລ້ານກິໂລວັດໂມງ, ມູນຄ່າ 21.965 ຕື້ກີບ, ທຽບໃສ່ 6 ເດືອນຕົ້ນປີ 2022 (23.911 ລ້ານກິໂລວັດໂມງ) ເພີ່ມຂຶ້ນ 1,69%, ມີມູນຄ່າ (18.100 ຕື້ກີບ) ເພີ່ມ ຂຶ້ນ 21,35% ແລະ ຖ້າທຽບໃສ່ແຜນການປີ (51.134 ລ້ານກິໂລວັດໂມງ) ປະຕິບັດໄດ້ 47,55%, ມູນຄ່າ (41.321 ຕື້ກີບ) ປະຕິບັດໄດ້ 53,15%. ສ່ວນດ້ານບໍ່ແຮ່ ໃນໄລຍະ 6 ເດືອນຕົ້ນປີ 2023 ສາມາດຄາດຄະເນມູນຄ່າໄດ້ 10.805 ຕື້ກີບ, ທຽບໃສ່ 6 ເດືອນຕົ້ນປີ 2022 ເພີ່ມຂຶ້ນ 10,8% (ການເພີ່ມຂຶ້ນແມ່ນມາຈາກ ກິດຈະການບໍ່ແຮ່ປົກກະຕິທີ່ສາມາດຜະລິດໄດ້ຕາມແຜນ ແລະ ຈາກກິດຈະການແບບທົດລອງ ທີ່ກວມປະມານ 8%) ແລະ ຖ້າທຽບໃສ່ແຜນການປີ ປະຕິບັດໄດ້ 54,58%. ໃນນັ້ນ, ຂຸດຄົ້ນເພື່ອຈຳໜ່າຍພາຍ ໃນໄດ້ 156 ລ້ານໂດລາສະຫະລັດ ທຽບໃສ່ໄລຍະດຽວກັນກັບປີຜ່ານມາ ເພີ່ມຂື້ນ 7,58% ເປັນຕົ້ນ ຫີນກາວ, ແຮ່ເກືອໂປຣຕາສ (ເກືອກາລີ), ຫີນປູນ ທີ່ສະໜອງເຂົ້າໃນໂຮງງານອຸດສະຫະກໍາພາຍໃນ.

ສຳລັບ ດ້ານການທ່ອງທ່ຽວ ໄດ້ປະຕິບັດມາດຕະການເປີດປະເທດ ແລະ ສະໜັບສະໜູນພາກທຸລະກິດທ່ອງທ່ຽວປັບ ປຸງຄວາມພ້ອມແຕ່ລະດ້ານ, ສິ່ງອໍານວຍຄວາມສະດວກ ແລະ ເພີ່ມການໂຄສະນາການທ່ອງທ່ຽວ ໃນຫລາຍຊ່ອງທາງ ເຊິ່ງເຮັດໃຫ້ໝົດປີ 2022 ມີນັກທ່ອງທ່ຽວເຂົ້າມາທ່ຽ່ວທັງໝົດ 2.979.724 ເທື່ອຄົນ ທຽບໃສ່ແຜນປີ 2022 ປະຕິບັດໄດ້ລື່ນປະມານ 52% ແລະ ສ້າງລາຍຮັບທັງໝົດປະມານ 537.539.389 ໂດລາສະຫະລັດ; ໃນນີ້ ນັກທ່ອງ ທ່ຽວສາກົນ ຈຳນວນ 1.294.365 ເທື່ອຄົນ, ທຽບໃສ່ແຜນປີ 2022 ປະຕິບັດໄດ້ລື່ນແຜນ 43% ແລະ ໃນໄລຍະ 5 ເດືອນຕົ້ນປີ 2023 ມີນັກທ່ອງທ່ຽວຕ່າງປະ ເທດເຂົ້າມາທັງໝົດ 1.405.265 ເທື່ອຄົນ, ໃນນີ້ ກວມສັດສ່ວນຫລາຍກວ່າໝູ່ແມ່ນນັກທ່ອງທ່ຽວຈາກບັນດາປະ ເທດອາຊຽນ ປະມານ 65%.