ພະຍາດຕີນມືເປື່ອຍ ກຳລັງລະບາດໃນຕອນໃຕ້ຂອງຫວຽດນາມ ເສຍຊີວິດຢ່າງໜ້ອຍ 7 ຄົນ
ສຳນັກຂ່າວ ຊິນຮວາ ລາຍງານ: ວັນທີ 28 ມິຖຸນາ 2023 ຜ່ານມາວ່າ: ສະຖາບັນປາສເຕີໃນເມືອງໂຮ່ຈິມິນ ພົບຜູ້ຕິດເຊື້ອພະຍາດ ຕີນມືເປື່ອຍ ສະສົມປະມານ 11.000 ຄົນ, ເສຍຊີວິດແລ້ວ 7 ຄົນ ໃນປີນີ້, ເຊິ່ງສ່ວນໃຫຍ່ຕິດເຊື້ອໄວຣັສເອນເທີໂຣ 71 (EV71) ທີ່ອາດນຳໄປສູ່ພະຍາດແຊກຊ້ອນຮຸນແຮງ ແລະ ເສຍຊີວິດ.
ດ້ານຂໍ້ມູນຈາກສຳນັກງານສາທາລະນະສຸກເມືອງໂຮ່ຈີມິນລະບຸວ່າ: ເຖິງແມ່ນວ່າຈຳນວນຜູ້ຕິດເຊື້ອຈະຫລຸດລົງ ແຕ່ຈຳນວນຄົນເຈັບອາການຮຸນແຮງກັບເພີ່ມຂຶ້ນໃນໄລຍະສອງສາມອາທິດຜ່ານມາ,ຂະນະດຽວກັນໂຮງໝໍທ້ອງຖີ່ນຫລາຍແຫ່ງໃນຕອນໃຕ້ຂອງຫວຽດນາມກຳລັງປະເຊີນກັບບັນຫາຂາດແຄນຢາ ເພາະຈຳນວນຄົນເຈັບເພີ່ມຂຶ້ນເປັນຕົ້ນແມ່ນຢາ gamma globulin, phenobarbital.
ສຳລັບພະຍາດ ຕີນມືເປື່ອຍ ເປັນພະຍາດຕິດຕໍ່ທີ່ພົບເຫັນໃນເດັກນ້ອຍອາຍຸຕໍ່າກວ່າ 5 ປີ, ມັກລະບາດໃນລະດູຝົນ ສາເຫດເກີດຈາກເຊື້ອໄວຣັສ ກຸ່ມເອນເທີໂຣໄວຣັສ 71 (EV71), ຜູ້ຕິດເຊື້ອຈະມີອາການ ເປັນໄຂ້, ເຈັບປາກ, ນ້ຳລາຍໄຫລ, ກິນອາຫານໄດ້ ໜ້ອຍ, ເປັນຜື່ນແດງ ຫລື ເປັນຕຸ່ມນ້ຳໃສ ບໍລິເວນ ຝ່າມື, ຝ່າຕີນ, ກົ້ນ, ອະໄວຍະວະເພດ ແລະ ຕາມແຂນຂາ ສະແດງອອກປະມານ 2-3 ວັນ ແລະ ຈະດີຂຶ້ນໃນ 1 ອາທິດ ຖ້າບໍ່ຮຸນແຮງ.
