ດິນແມ່ນຊັບພະຍາກອນອັນລ້ຳຄ່າ ແລະ ທຶນຮອນອັນມະຫາສານຂອງຊາດ ພົນລະເມືອງລາວເປັນກຳມະສິດຂອງວົງຄະນາຍາດແຫ່ງຊາດ ຊຶ່ງລັດເປັນຕົວແທນເຈົ້າກຳມະສິດ

ໂດຍ: ຜາຕຸງ

ເຮົາຕ້ອງຍອມຮັບຄວາມເປັນຈິງວ່າ: ວຽກງານຄຸ້ມຄອງທີ່ດິນ ທັງດິນລັດ,ດິນລວມໝູ່, ບຸກຄົນ, ນິຕິບຸກຄົນ, ດິນປຸກສ້າງ, ດິນທຳການຜະລິດ, ດິນປ່າໄມ້  ຢູ່ແຕ່ລະແຂວງໃນໄລຍະຜ່ານມາແມ່ນມີຄວາມຫຍຸ້ງຍາກຫຼາຍ ຍ້ອນຖືກບຸກລຸກ,ບຸກເບີກສັບຊ່າວທຳການຜະລິ ການປຸກສ້າງ, ການເຊົ່າ ແລະ ສຳປະທານ ໂດຍບໍ່ໄດ້ຮັບອະນຸຍາດຈາກລັດຖະບານ ຫຼືໜ່ວຍງານທີ່ກ່ຽວຂ້ອງ ຈົນກາຍເປັນປາກົດການຫຍໍ້ທໍ້ໃນສັງຄົມ ຍາກໃນການແກ້ໄຂ, ດັ່ງທີ່ປາກົດອອກໃນສື່ມວນຊົນຜ່ານມາ, ຍ້ອນແນວນັ້ນແຕ່ລະແຂວງຈຶ່ງໄດ້ເອົາໃຈໃສ່ເປັນສຳຄັນຕໍ່ວຽກງານນີ້,

ຢູ່ໃນກອງປະຊຸມລະດັບສູງສຳມະນາວິທະຍາສາດກ່ຽວກັບວຽກງານທີ່ດິນ ຊຶ່ງດຳເນີນໄປໃນກາງເດືອນມິຖຸນາ 2023 ທ່ານເລັດ ໄຊຍະພອນ ເຈົ້າແຂວງໆ ອັດຕະປື ມີຄຳເຫັນວ່າ: ປັດຈຸບັນການນຳໃຊ້ດິນປ່າໄມ້ໃນ 3 ປະເພດປ່າຢູ່ແຂວງອັດຕະປືມີທ່າອ່ຽງເພີ່ມຂື້ນເນື່ອງຈາກຄວາມຕ້ອງການທີ່ດິນເຂົ້າໃນການພັດທະນາເສດຖະກິດ – ສັງຄົມກໍຄືການພັດທະນາຄອບຄົວຂອງຊາວກະສິກອນຍັງມີສູງ  ໂດຍສະເພາະການອະນຸມັດໃຫ້ເຊົ່າສຳປະທານນຳໃຊ້ເຂົ້າໃນການພັດທະນາໂຄງການລົງທຶນຂອງລັດ, ບັນດາບໍລິສັດ ທັງຂອງພາຍໃນແລະຕ່າງປະເທດ ກາຍເປັນເຫດໃຫ້ປະຊາຊົນບຸກກລຸກຈັບຈອງ ປ່າໄມ້ ແລະ ດິນປ່າໄມ້ເພື່ອທຳການຜະລິດ ເປັນຕົ້ນແມ່ນການປູກມັນຕົ້ນເປັນສິນຄ້າທີ່ມີຄວາມຕ້ອງການສູງ ທັງປູກງ່າຍ ລາຍໄດ້ດີ ແບບບໍ່ໄດ້ຮັບອະນຸຍາດນັບມື້ຫຼາຍຂື້ນມີເຖິງ 561ເຮັກຕາ, ເຮັດເນື້ອທີ່ດິນປ່າໄມ້ຢູ່ແຂວງ ອັດຕະປືຫຼຸດລົງ,

ເພື່ອຕ້ານສະກັດກັ້ນການບຸກລຸກ ຈັບຈອງເນື້ອທີ່ດິນໂດຍທີ່ບໍ່ໄດ້ຮັບອະນຸຍາດໃຫ້ນັບມື້ຫຼຸດລົງ ຜ່ານມາແຂວງອັດຕະປື ໄດ້ເອົາໃຈໃສ່ຢ່າງຈິງຈັງໃນການຈັດຕັ້ງປະຕິບັດ ກ່ຽວກັບການຄຸ້ມຄອງທີ່ດິນ ຂະແໜງການທີ່ກ່ຽວຂ້ອງໂດຍສະເພາະ ຂະແໜງຊັບພະຍາກອນທຳມະຊາດແລະສິ່ງແວດລ້ອມ, ກະສິກຳ ແລະ ປ່າໄມ້ ໄດ້ເອົາໃຈໃສ່ລົງເກັບກຳເນື້ອທີ່ດິນປ່າໄມ້ໄດ້ທັງໝົດ 880762ເຮັກຕາ ກວມ84%, ເນື້ອທີ່ນອກ3ປະເພດປ່າໄດ້ 96.339 ເຮັກຕາ ກວມຫຼາຍກວ່າ 9%,ເນື້ອທີ່ດິນກະສິກຳ 190.843ເຮັກຕາ ກວມ10%, ດິນນຳໃຊ້ເຂົ້າໃນຂະແໜງການຕ່າງໆ 16.197ເຮັກຕາ ກວມ57% ຂອງເນື້ອທີ່ດິນທົ່ວແຂວງ,

ເພື່ອຄຸ້ມຄອງແລະນຳໃຊ້ເນື້ອທີ່ດິນ, ດິນປ່າໄມ້ ຊຶ່ງເປັນຊັບສົມບັດຂອງວົງຄະນາຍາດແຫ່ງຊາດໃຫ້ເປັນໄປຢ່າງຖືກຕ້ອງຕາມລະບຽບກົດໝາຍ ທັງຮັບປະກັນສິດຜົນປະໂຫຍດແລະຄວາມເປັນທຳທັງພາກລັດແລະປະຊາຊົນບັນດາເຜົ່າ ລັດຖະບານກໍ່ຄືອຳນາດການປົກຄອງແຕ່ລະເຂດແຂວງ ແຕ່ລະທ້ອງຖິ່ນໄດ້ຫັນມາເອົາໃຈໃສ່ຄຸ້ມຄອງທີ່ດິນດ້ວຍການລົງໂຄສະນາເຜີຍແຜ່ຄວາມໝາຍຄວາມສຳ ຄັນໃນການອອກໃບຕາດິນ,ສິດ,ພັນທະ ແລະ ຜົນປະໂຫຍດຈາກທີ່ດິນໃຫ້ສັງຄົມຮັບຊາບຢ່າງກ້ວາງຂວາງ ລວມທັງການອອກໃບຕາດິນແບບເປັນລະບົບເພື່ອອອກສິດນຳໃຊ້ທີ່ດິນ ສ້າງໄດ້ຄວາມສະດວກໃນການກວດກາຕິດຕາມເຮັດໃຫ້ການບຸກລຸກ ຈັບຈອງ ແລະຄວາມຂັດແຍ່ງທາງດ້ານທີ່ດິນ ດິນປ່າໄມ້ ຄ່ອຍໆຫຼຸດລົງ,

ຢູ່ໃນກົດໝາຍ ວ່າດ້ວຍທີ່ດິນສະບັບປັບປຸງສະບັບເລກທີ70/ສພຊ ລົງວັນທີ 21 ມິຖຸນາປີ 2019 ຊີ້ໃຫ້ເຫັນວ່າ: ທີ່ດິນແຫ່ງ ສປປ ລາວ ແມ່ນເນື້ອທີ່ດິນຊຶ່ງນອນຢູ່ໃນເຂດແດນຂອງລາວ ປະກອບດ້ວຍ ໜ້າດິນພື້ນດິນ, ພູຜາ, ເກາະດອນແລະດິນພື້ນນ້ຳ, ທີ່ດິນແມ່ນຊັບພະ ຍາກອນອັນລ້ຳຄ່າ ແລະ ທຶນຮອນອັນມະຫາສານຂອງຊາດ ທີ່ເປັນບ່ອນດຳລົງຊີວິດ ແລະ ທຳມາຫາກິນຂອງພົນລະເມືອງລາວ, ເປັນພາຫະນະອັນສຳຄັນ ແລະ ປັດໄຈຕົ້ນຕໍຂອງການຜະລິດ, ການພັດທະນາເສດຖະກິດ-ສັງຄົມ ແລະ ການປ້ອງກັນຊາດປ້ອງກັນຄວາມສະຫງົບ, ທີ່ດິນແຫ່ງ ສປປ ລາວເປັນກຳມະສິດຂອງວົງຄະນາຍາດແຫ່ງຊາດ ຊຶ່ງລັດເປັນຕົວແທນເຈົ້າກຳມະສິດດັ່ງກ່າວແລະຄຸ້ມຄອງຢ່າງລວມສູນເປັນເອກະພາບໃນຂອບເຂດທົ່ວປະເທດ ໂດຍມີການຈັດສັນ, ວາງແຜນການນຳໃຊ້ ແລະ ພັດທະນາທີ່ດິນ