ກະຊວງປ້ອງກັນຄວາມສະຫງົບ ສະຫລຸບຕີລາຄາການນໍາພາຂອງຄະນະບໍລິຫານງານພັກ ກາງສະໄໝທີ V ແລະ ທິດທາງແຜນການທ້າຍສະໄໝ

ໃນຕອນບ່າຍຂອງວັນທີ 20 ມິຖຸນາ 2023 ນີ້, ສະຫາຍ ພົຕ ວັນທອງ ກອງມະນີ ກໍາມະການສູນກາງພັກ, ຮອງເລຂາຄະນະພັກກະຊວງ ຮອງລັດຖະມົນຕີ ກະຊວງປ້ອງກັນຄວາມສະຫງົບ ໄດ້ຂຶ້ນຜ່ານບົດສະຫລຸບຕີລາຄາການນໍາພາຂອງຄະນະບໍລິຫານງານພັກ ກະຊວງປ້ອງກັນຄວາມສະຫງົບ ກາງສະໄໝທີ V ແລະ ທິດທາງແຜນການທ້າຍສະໄໝ ເຊິ່ງສະຫາຍໄດ້ກ່າວວ່າ: ຕະຫລອດໄລຍະກາງສະໄໝຜ່ານມາ ຄະນະບໍລິຫານງານພັກກະຊວງ ໄດ້ເອົາໃຈໃສ່ນຳພາ-ຊີ້ນຳ ຈັດຕັ້ງປະຕິບັດມະຕິກອງປະຊຸມໃຫຍ່ຂອງຕົນຢ່າງຕໍ່ເນື່ອງ ແລະ ຕິດພັນກັບການຈັດຕັ້ງເຊື່ອມຊຶມ, ກຳແໜ້ນບັນດາເນື້ອໃນພື້ນຖານມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງ, ການຈັດຕັ້ງປະຕິບັດ 4 ຄາດໝາຍ 4 ແຜນງານໃຫຍ່ 41 ໂຄງການ ແລະ ຜັນຂະຫຍາຍເຂົ້າສູ່ໜ້າທີ່ວຽກງານຕົວຈິງ ໂດຍຫັນມະຕິກອງປະຊຸມໃຫຍ່ ເປັນແຜນງານ, ເປັນໂຄງການ, ກິດຈະກຳ, ແຜນວຽກລະອຽດແຕ່ລະໄລຍະຜ່ານການນຳພາ-ຊີ້ນຳຢ່າງແທດເຖິງຕົວຈິງ ດ້ວຍມາດຕະການຕ່າງໆ ໃນກາງສະໄໝຜ່ານມາ ກໍາລັງປ້ອງກັນຄວາມສະຫງົບ ໄດ້ຮັບການປັບປຸງຢ່າງໜັກແໜ້ນ ແລະ ຍາດໄດ້ຜົນສຳເລັດໃໝ່ໃນຫຼາຍດ້ານ, ໄດ້ຮັບຄວາມເຊື່ອໝັ້ນໄວ້ວາງໃຈ ແລະ ໄດ້ຮັບການສະໜັບສະໜູນຈາກສັງຄົມຢ່າງກວ້າງ ຂວາງ ສົມເປັນກຳລັງຫຼັກແຫຼ່ງ ໃນການປົກປັກຮັກສາຄວາມສະຫງົບດ້ານການເມືອງ ແລະ ຄວາມເປັນລະບຽບຮຽບຮ້ອຍໃນສັງຄົມ, ປະກອບສ່ວນຢ່າງຕັ້ງໜ້າເຂົ້າໃນການສ້າງສາພັດທະນາປະເທດຊາດ ຕາມຈຸດໝາຍສັງຄົມນິຍົມ ເຊິ່ງມີຜົນງານສະແດງອອກແຕ່ລະດ້ານ ດັ່ງນີ້: ດ້ານວຽກງານປົກປັກຮັກສາສະຖຽນລະພາບ ທາງດ້ານການເມືອງ ແລະ ຄວາມເປັນລະບຽບຮຽບຮ້ອຍ-ປອດໄພໃນສັງຄົມ ໄດ້ເພີ່ມທະວີນຳພາ-ຊີ້ນຳວຽກງານວິຊາສະເພາະ ຊອກຮູ້ເກັບກຳຂ່າວ, ວິໄຈ ແລະ ປະມວນຂ່າວທີ່ກ່ຽວຂ້ອງເຖິງກົນອຸບາຍ ແລະ ການເຄື່ອນໄຫວຂອງກຸ່ມຄົນບໍ່ດີທີ່ມີ ຕໍ່ປະເທດເຮົາຢ່າງຊັດເຈນ ພ້ອມທັງໄດ້ຄົ້ນຄວ້າວິທີການ ແລະ ມາດຕະການຕອບຕ້ານຢ່າງທັນເວລາ ອັນພົ້ນເດັ່ນແມ່ນໄດ້ຕໍ່ສູ້-ທັບມ້າງ ແລະ ແກ້ໄຂບັນດາປັດໄຈທີ່ເປັນໜໍ່ແໜງຄວາມບໍ່ສະຫງົບຢ່າງທັນການ; ວຽກງານປັບປຸງກໍ່ສ້າງພັກ-ກໍ່ສ້າງກໍາລັງປ້ອງກັນຄວາມສະຫງົບ ປະຊາຊົນ: ໄດ້ເອົາໃຈໃສ່ເຮັດວຽກງານການເມືອງ-ແນວຄິດ ໃຫ້ແກ່ສະມາຊິກພັກ, ນາຍ ແລະ ພົນຕຳຫຼວດ ຢ່າງເນື່ອງນິດລຽນຕິດດ້ວຍຫຼາຍເນື້ອໃນ, ຫຼາຍວິທີການ ຕິດພັນກັບການປຸກລະດົມຂະບວນການແນວຄິດ “ຮັກຊາດ-ພັດທະນາ” ຢ່າງຕັ້ງໜ້າ, ຈັດຕັ້ງເຊື່ອມຊຶມກຳແໜ້ນແນວທາງນະໂຍບາຍຂອງພັກ, ກົດໝາຍຂອງລັດ, ລະບຽບວິໄນຂອງກຳລັງ ເປັນຕົ້ນແມ່ນນຳພາຈັດຕັ້ງເຜີຍແຜ່ມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມ ໃຫຍ່ ຄັ້ງທີ V ຂອງອົງຄະນະພັກກະຊວງ; ຕັ້ງໜ້າສຶກສາອົບຮົມ 3 ທາດແທ້, 7 ມູນເຊື້ອ, 4 ໜ້າທີ່ ແລະ 4 ການພົວພັນຂອງກໍາລັງປ້ອງກັນຄວາມສະຫງົບ, ໄປພ້ອມກັນນັ້ນ ກໍ່ໄດ້ປັບປຸງຍົກສູງຄຸນນະພາບພາຫະນະເຕັກນິກຮັບໃຊ້ວຽກງານການເມືອງ-ແນວຄິດ, ວັດທະນະທຳ, ຫໍພິພິທະພັນ, ກີລາກາຍຍະກຳ ແລະ ສີລະປະວັນນະຄະດີ ໃນກຳລັງປ້ອງກັນຄວາມສະຫງົບ ມີທ່າຂະຫຍາຍຕົວ, ໂດຍສະເພາະແມ່ນລາຍການຂ່າວໂທລະພາບ, ວິທະຍຸ, ສື່ສິ່ງພິມຕ່າງໆ ເປັນກະບອກສຽງໃຫ້ແກ່ກຳລັງ ໃນການເຜີຍແຜ່ມູນເຊື້ອ ແລະ ຜົນງານການເຄື່ອນໄຫວປະຕິບັດແນວທາງຂອງພັກ ໃນວຽກງານປ້ອງກັນຊາດ-ປ້ອງກັນຄວາມສະຫງົບ, ພ້ອມທັງຕອບຕ້ານຖ້ອຍທໍານອງ ຂອງພວກຄົນບໍ່ດີໄດ້ຢ່າງທັນການ ແລະ ໄດ້ຮັບຄວາມນິຍົມຊົມຊອບຈາກສັງຄົມ ຢ່າງກວ້າງຂວາງ.

ພ້ອມນີ້, ກໍຍັງໄດ້ເອົາໃຈໃສ່ເຮັດວຽກງານກໍ່ສ້າງພັກ-ກໍ່ສ້າງພະນັກງານ ແຕ່ລະຂັ້ນ ໄດ້ຮັບການປັບປຸງດີຂຶ້ນ, ມີລະບອບແບບແຜນໃນການນຳພາ-ຊີ້ນຳປະຕິບັດຖືກຕ້ອງຕາມຫຼັກການ ແລະ ທິດ ນຳຂອງພັກ, ຄວາມເປັນແບບຢ່າງນຳໜ້າຂອງສະມາຊິກພັກ ໄດ້ຮັບການປັບປຸງດີຂຶ້ນ; ມີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຢ່າງຕັ້ງໜ້າ ແລະ ຕໍ່ເນື່ອງ, ຜ່ານການຕີລາຄາ ປະເພດສະມາຊິກພັກແຕ່ລະປີ ເຫັນໄດ້ວ່າສະມາຊິກພັກແຂງ ແລະ ໜ່ວຍພັກແຂງ ກວມອັດຕາສ່ວນຫຼາຍ ແລະ ເພີ່ມຂຶ້ນໃນແຕ່ລະປີ, ໃນນີ້, ການຕີລາຄາແບ່ງປະເພດ ປີທີ່ຜ່ານມາ ມີສະມາຊິກພັກແຂງ 7.963 ສະຫາຍ, ກວມ 96.16% ຂອງສະມາຊິກພັກທັງໝົດ, ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນໄດ້ 209 ໜ່ວຍ ທຽບໃສປີ 2020 ເພີ່ມຂື້ນ 23 ໜ່ວຍ; ພິເສດຕະຫຼອດໄລຍະກາງສະໄໝຜ່ານມາ ຄະນະບໍລິຫານງານພັກກະຊວງ ໄດ້ເອົາໃຈໃສ່ນຳພາ-ຊີ້ນຳ, ຈັດຕັ້ງຝຶກອົບຮົມວຽກງານພັກ-ວຽກງານການເມືອງ ຢູ່ອ້ອມຂ້າງກະຊວງ ແລະ ປກສ ແຂວງ ໃນຂອບເຂດທົ່ວປະເທດ, ເຮັດໃຫ້ຄະນະພັກ, ຜູ້ທີ່ເຮັດວຽກງານການເມືອງ ມີຄວາມເຂົ້າໃຈເປັນເອກະພາບ ແລະ ຈັດຕັ້ງປະຕິບັດໄປ ໃນທິດທາງດຽວ, ສາມາດບັນລຸຕາມຄາດໝາຍທີ່ກະຊວງວາງອອກ; ພ້ອມກັນນັ້ນກໍໄດ້ເຮັດວຽກງານໂຄສະນາ ແລະ ຂະຫຍາຍສະມາຊິກພັກໃໝ່ ຮັບປະກັນໄດ້ຜູ້ທີ່ດີເດັ່ນ ຈາກຂະບວນການວຽກງານຕົວຈິງ ຢູ່ຮາກຖານມີຈຳນວນເພີ່ມຂຶ້ນທາງດ້ານປະລິມານ ແລະ ຄຸນນະພາບ.

ພາບຂ່າວ: ຄວາມສະຫງົບ