ກະຊວງຍຸຕິທຳ ທາບທາມຄວາມໄວ້ວາງໃຈຕໍ່ການນໍາພາລວມ ແລະ ບຸກຄົນ ຂອງຄະນະບໍລິຫານງານພັກສະໄໝທີ V
ວັນທີ 19-21 ມິຖຸນາ 2023, ຄະນະບໍລິຫານງານພັກກະຊວງຍຸຕິທຳ ໄດ້ດໍາເນີນກອງປະຊຸມຄົບຄະນະກາງສະໄໝ ເພື່ອທາບທາມຄວາມໄວ້ວາງໃຈຕໍ່ການນໍາພາລວມ ແລະ ບຸກຄົນຂອງຄະນະບໍລິຫານງານພັກກະຊວງຍຸຕິທຳ ກາງສະໄໝທີ V, ເປັນປະທານຂອງ ສະຫາຍ ໄພວີ ສີບົວລິພາ ກໍາມະການສູນກາງພັກ, ເລຂາຄະນະບໍລິຫານງານພັກກະຊວງຍຸຕິທຳ ແລະ ເຂົ້າຮ່ວມໂດຍ ສະຫາຍ ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ.
ສະຫາຍ ໄພວີ ສີບົວລິພາ ກ່າວວ່າ: ເພື່ອເປັນການສໍາຫລວດກວດກາຄືນຕີລາຄາ ການນໍາພາ-ຊີ້ນໍາຂອງຄະນະບໍລິຫານງານພັກກະຊວງຍຸຕິທຳ ໃນໄລຍະກາງສະໄໝ ເຊິ່ງຈະໄດ້ຍົກໃຫ້ເຫັນການຊີ້ນໍາ-ນໍາພາ ຂອງອົງຄະນະພັກກະຊວງຍຸຕິທຳ ສະໄໝທີ V ໃນໄລຍະ 2 ປີເຄິ່ງຜ່ານມາ ກໍຄືການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ (2021-2025) ແລະ ແຜນພັດທະນາຂະແໜງຍຸຕິທຳ 5 ປີ (2021-2025) ເຊິ່ງຈະໄດ້ຍົກໃຫ້ເຫັນດ້ານດີ ແລະ ຜົນສໍາເລັດ ໃນຄວາມຮັບຜິດຊອບໃນການປະຕິບັດໜ້າທີ່ການເມືອງ, ຄວາມຮັບຜິດຊອບໃນການຜັນຂະຫຍາຍບັນດາມະຕິ, ຄໍາສັ່ງ ແລະ ເອກະສານສໍາຄັນຕ່າງໆຂອງພັກ, ການນໍາພາດ້ານການເມືອງ-ແນວຄິດ, ການກໍ່ສ້າງພັກ-ພະນັກງານ, ປັບປຸງກົງຈັກການຈັດຕັ້ງ, ແບບແຜນການນໍາພາ ແລະ ວິທີເຮັດວຽກ, ນໍາພາອົງການຈັດຕັ້ງມະຫາຊົນ ແລະ ວຽກງານການເຄື່ອນໄຫວຮອບດ້ານຂອງຂະແໜງຍຸຕິທຳ.
ເພື່ອເຮັດໃຫ້ກອງປະຊຸມທາບທາມຄວາມໄວ້ວາງໃຈຕໍ່ການນໍາພາລວມ ແລະ ບຸກຄົນ ຄະນະບໍລິຫານງານພັກກະຊວງຍຸຕິທຳ ກາງສະໄໝຄັ້ງນີ້ ດຳເນີນໄປດ້ວຍຜົນສໍາເລັດເປັນຢ່າງດີ, ສາມາດບັນລຸຕາມຈຸດປະສົງຄາດໝາຍທີ່ວາງໄວ້ ປະທານກອງປະຊຸມໄດ້ຮຽກຮ້ອງໃຫ້ບັນດາສະຫາຍຜູ້ແທນກອງປະຊຸມ ຈົ່ງໄດ້ພ້ອມກັນຍົກສູງຄວາມຮັບຜິດຊອບຂອງຕົນ ສຸມໃສ່ຈັດຕັ້ງປະຕິບັດຕາມພາລະບົດບາດ, ສິດ ແລະ ໜ້າທີ່ ຂອງຕົນຢ່າງເຕັມສ່ວນ ເພື່ອເປັນການຍົກສູງບົດບາດການຊີ້ນໍາ-ນໍາພາຂອງ ອົງຄະນະພັກກະຊວງຍຸຕິທຳ ໃຫ້ມີປະສິດທິພາບ ແລະ ປະສິດທິຜົນສູງຂຶ້ນກວ່າເກົ່າ.
