ແຕ່ງຕັ້ງພະນັກງານ ອົງການໄອຍະການປະຊາຊົນເຂດ I ປະຈຳເມືອງສັງທອງ  ນວ ເຄື່ອນໄຫວວຽກງານໃຫ້ຈັນຍາບັນ-ຈັນຍາທໍາ

ພິທີປະກາດການແຕ່ງຕັ້ງພະນັກງານອົງການໄອຍະການປະຊາຊົນເຂດ I ປະຈໍາເມືອງສັງທອງ ນະຄອນຫລວງວຽງຈັນ ໄດ້ມີຂຶ້ນວັນທີ 19 ມິຖຸນາ 2023 ນີ້, ເປັນປະທານຮ່ວມຂອງ ທ່ານ ອ່ອນຈັນ ມະນີວັນ ຫົວໜ້າກົມຕິດຕາມກວດກາການດຳເນີນຄະດີອາຍາ ອົງການໄອຍະການປະຊາຊົນສູງສຸດ, ທ່ານ ພົງສະຫວັນ ສີຣິພັນ ເຈົ້າເມືອງສັງທອງ.

ໃນພິທີ, ທ່ານ ຄໍານຸທອນ ສູນວິເລີດ ຮອງຫົວໜ້າກົມຈັດຕັ້ງ-ພະນັກງານ ອົງການໄອຍະການປະຊາຊົນສູງສຸດ ໄດ້ຜ່ານຂໍ້ຕົກລົງຂອງຫົວໜ້າອົງການໄອຍະການປະຊາຊົນສູງສຸດ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງພະນັກງານອົງການໄອຍະການປະຊາຊົນເຂດ ປະຈຳເມືອງ, ເທດສະບານ, ນະຄອນຫລວງວຽງຈັນ ແລະ ຂໍ້ຕົກລົງວ່າດ້ວຍການແຕ່ງຕັ້ງ ພະນັກງານອົງການໄອຍະການປະຊາຊົນເຂດ I ປະຈໍາເມືອງສັງທອງ. ໃນໂອກາດນີ້ ຄະນະປະທານ ໄດ້ໃຫ້ກຽດໂອ້ລົມຕໍ່ບັນດາທ່ານທີ່ໄດ້ຮັບການແຕ່ງຕັ້ງ ການເຄື່ອນໄຫວຕາມພາລະບົດບາດ, ຂອບເຂດສິດ ແລະ ໜ້າທີ່ຕາມທີ່ໄດ້ກໍານົດໄວ້ໃນກົດໝາຍ, ຮັບປະກັນຄວາມສັກສິດຂອງກົດໝາຍ, ເຮັດໃຫ້ສັງຄົມມີຄວາມຍຸຕິທໍາ ແລະ ເນັ້ນຫລາຍບັນຫາທີ່ສໍາຄັນຕົ້ນຕໍ ເປັນຕົ້ນ ໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ຈັນຍາບັນ, ຈັນຍາທໍາ, ແບບແຜນວິທີເຮັດວຽກ ແລະ ມີຄວາມຮັບຜິດຊອບສູງຕໍ່ໜ້າທີ່ ທີ່ໄດ້ຮັບມອບໝາຍ.