ລັດຖະມົນຕີຕ່າງປະເທດອາເມລິກາ ເດີນໜ້າຟື້ນຟູການພົວພັນທາງການທູດກັບຈີນ ໃນເວລາຢ້ຽມຢາມປັກກິ່ງຢ່າງເປັນທາງການ

ທ່ານ ແອນໂທນີ ບລິງເຄນ ລັດຖະມົນຕີກະຊວງການຕ່າງປະເທດອາເມລິກາ ເດີນໜ້າຟື້ນຟູການພົວພັນທາງການທູດກັບຈີນ ໃນເວລາເດີນທາງຢ້ຽມຢາມນະຄອນຫລວງປັກກິ່ງຢ່າງເປັນທາງການໃນວັນທີ 18 ມິຖຸນາ ຖືເປັນຜູ້ແທນລະດັບສູງຂອງອາເມລິກາທີ່ເດີນທາງຢ້ຽມຢາມຈີນຄົນທໍາອິດໃນຮອບກວ່າເຄິ່ງທົດສະວັດຕໍ່ຈາກທ່ານ ໄມ ປອມເປໂອ ລັດຖະມົນຕີຕ່າງປະເທດໃນສະໄໝປະທານາທິບໍດີ ໂດນັລ ທຣໍາ ທີ່ເຄີຍຢ້ຽມຢາມຈີນໃນປີ 2018.

ທ່ານ ບລິງເຄນ ໄດ້ເຂົ້າພົບທ່ານ ສິນກັງ ລັດຖະມົນຕີກະຊວງການຕ່າງປະເທດຈີນ. ທັງສອງຝ່າຍໄດ້ຫາລືກັນພາຍໃນກອງປະຊຸມທີ່ເປີດເຜີຍກົງໄປກົງມາ ເພື່ອພະຍາຍາມຫາທາງປັບປຸງການພົວພັນລະຫວ່າງກັນ ຫລັງອາເມລິກາ ແລະ ຈີນມັກເກີດຄວາມເຄັ່ງຕຶງຂຶ້ນໃນໄລຍະຫລາຍປີຜ່ານມາ.

ຫລັງຈາກກອງປະຊຸມຫາລືກວ່າ 5 ຊົ່ວໂມງ, ທ່ານ ສິນກັງ ໄດ້ຕອບຮັບຄໍາເຊີນຂອງທ່ານ ບລິງເຄນ ທີ່ຈະເດີນທາງຢ້ຽມຢາມອາເມລິກາຢ່າງເປັນທາງການໃນອະນາຄົດ ໂດຍລັດຖະມົນຕີຂອງທັງສອງປະເທດຕັດສິນໃຈຈະເພີ່ມຈໍານວນຖ້ຽວບິນລະຫວ່າງກັນໃຫ້ຫລາຍຂຶ້ນ ລວມທັງຈະປະສານການຮ່ວມມືກັນໃນມິຕິຕ່າງໆໃຫ້ຫລາຍຂຶ້ນ ໂດຍສະເພາະໃນລະດັບເຈົ້າໜ້າທີ່ປະຕິບັດການ.

ເບື້ອງຕົ້ນຍັງບໍ່ຮູ້ແນ່ນອນວ່າທ່ານ ບລິງເຄນ ຈະໄດ້ເຂົ້າພົບປະທານປະເທດ ສີຈິ້ນຜິງ ຫລື ບໍ່ ໂດຍທ່ານຫວັງວ່າທ່ານຈະໄດ້ເຂົ້າພົບຜູ້ນໍາຈີນໃນອະນາຄົດ. ພ້ອມເຊື່ອໝັ້ນວ່າ: ການຮັກສາຊ່ອງທາງການສື່ສານລະຫວ່າງກັນ ຈະຊ່ວຍຫລຸດຄວາມສ່ຽງຂອງການສື່ສານທີ່ຜິດພາດ ແລະ ເຂົ້າໃຈຜິດກັນ ລວມທັງມີສ່ວນຊ່ວຍປັບປຸງການພົວພັນລະຫວ່າງທັງສອງປະເທດໃຫ້ດີຂຶ້ນ.

ອ້າງອີງ:

https://www.bbc.com/news/world-us-canada-65941659

https://www.reuters.com/…/blinken-wrap-up-rare-visit…/

https://edition.cnn.com/…/blinken-beijing…/index.html