ສະພາກາແດງຈີນມອບລົດຮັບສົ່ງຄົນເຈັບ 5 ຄັນ ແລະ ລົດຖີບ 200 ຄັນໃຫ້ກາແດງລາວເພື່ອວຽກງານມະນຸດສະທຳ
ໃນໂອກາດປະທານອົງການກາແດງລາວ ເຂົ້າຮ່ວມກອງປະຊຸມວຽກງານກາແດງ ແລະ ຊີກວົງເດືອນແດງ ທີ່ໃນນະຄອນຫລວງນານນິງ, ສປ ຈີນ ໃນອາທິດຜ່ານມານີ້, ສະພາກາແດງຈີນ ໄດ້ຖືໂອກາດດັ່ງກ່າວມອບລົດຮັບ-ສົ່ງຄົນເຈັບ ຈຳນວນ 5 ຄັນ ແລະ ລົດຖີບອີກ 200 ຄັນ ໃຫ້ອົງການກາແດງລາວ, ເພື່ອນຳໃຊ້ເຂົ້າໃນວຽກງານມະນຸດສະທຳ, ຊຶ່ງພິທີມອບ-ຮັບໄດ້ມີຂຶ້ນໃນລະ ຫວ່າງທ່ານ ເຊັນລູ ປະທານສະພາກາແດງຈີນ, ທັງເປັນຮອງປະທານສະຫະພັນກາແດງ ແລະ ຊີກວົງເດືອນແດງສາກົນ ແລະ ທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ.
ໃນກອງປະຊຸມດັ່ງກ່າວ, ໄດ້ພ້ອມກັນປຶກສາຫາລືຜົນການຈັດຕັ້ງປະຕິບັດວຽກງານມະນຸດສະທຳໃນໄລຍະຜ່ານມາ, ການ ເພີ່ມທະວີການຮ່ວມມືໃນຂົງເຂດວຽກງານຂະບວນການກາແດງ ແລະ ຊີກວົງເດືອນແດງລະຫວ່າງບັນດາປະເທດອາຊຽນ-ຈີນ. ຂະນະດຽວກັນ ປະທານອົງການກາແດງລາວ ຍັງໄດ້ຖືໂອກາດນີ້ເຂົ້າພົບທ່ານ ເຊັນລູ ປະທານສະພາກາແດງຈີນ, ເພື່ອຫາລືທິດທາງກອບການຮ່ວມມືລະຫວ່າງອົງການກາແດງລາວ-ສະພາກາແດງຈີນໃນອານາຄົດໃຫ້ມີປະສິດທິຜົນສູງຂຶ້ນກວ່າເກົ່າ.
