3 ພາກສ່ວນ ປຶກສາຫາລືການຮັບຮູ້ສິດນໍາໃຊ້ທີ່ດິນ ຂອງປະຊາຊົນ ຢູ່ໃນເຂດທີ່ດິນປ່າໄມ້ ແຂວງຄຳມ່ວນ

ກອງປະຊຸມປຶກສາຫາລື ກ່ຽວກັບການຮັບຮູ້ສິດນໍາໃຊ້ທີ່ດິນຂອງປະຊາຊົນ ທີ່ອາໄສ ແລະ ທໍາການຜະລິດ ຢູ່ໃນເຂດທີ່ດິນປ່າໄມ້ (ທີ່ດິນ 3 ປະເພດປ່າ) ຈັດຂຶ້ນວັນທີ 12 ມິຖຸນາ 2023 ຜ່ານມາ ທີ່ແຂວງຄໍາມ່ວນ,    ເປັນປະທານຮ່ວມຂອງ ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ທ່ານ ນາງ ບຸນຄໍາ ວໍລະຈິດ, ລັດຖະມົນຕີ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ (ກຊສ) ແລະ ທ່ານ ເພັດ ພົມພິພັກ, ລັດຖະມົນຕີ ກະຊວງກະສິກໍາ ແລະ ປ່າໄມ້ (ກປ).

ທ່ານ ຄຳໝັ້ນ ສໍປະເສີດ ຫົວໜ້າ ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ແຂວງຄຳມ່ວນ ລາຍງານວ່າ: ແຂວງຄຳມ່ວນ ເປັນແຂວງໜຶ່ງທີ່ໄດ້ຮັບໂຄງການທົດລອງການຮັບຮູ້ສິດນໍາໃຊ້ທີ່ດິນຂອງປະຊາຊົນ ທີ່ອາໄສ ແລະ ທໍາການຜະລິດ ຢູ່ໃນເຂດທີ່ດິນປ່າໄມ້ ເຊິ່ງລວມມີ ຢູ່ 7 ບ້ານ ຄື: ປ່າປ້ອງກັນພູງູ ເມືອງຫີນບູນ 2 ບ້ານ, ປ່າຜະລິດ ດົງພູຊອຍ ເມືອງເຊບັ້ງໄຟ 2 ບ້ານ ແລະ ອຸທິຍານ ແຫ່ງຊາດ ນ້ຳເທີນ ນາກາຍ 3 ບ້ານ ທີ່ຈັດຕັ້ງປະຕິບັດໂດຍກົມທີ່ດິນ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ກົມປ່າໄມ້ ແລະ ກົມຄຸ້ມຄອງ ແລະ ພັດທະນາທີ່ດິນ ກະສິກຳ, ກະຊວງ ກະສິກຳ ແລະ ປ່າໄມ້ ໂດຍການສະໜັບຈາກໂຄງການບໍລິຫານລັດ ກຽວກັບການຄຸ້ມຄອງທີ່ດິນ ພາກພື້ນແມນໍ້າຂອງ (MRLG).

ຈາກນັ້ນ, ຜູ້ເຂົ້າຮ່ວມກອງປະຊຸມໄດ້ປຶກສາຫາລື ກ່ຽວກັບທິດທາງການຮັບຮູ້ການນຳໃຊ້ທີ່ດິນ ໃນສາມປະເພດປ່າໃຫ້ກັບປະຊາຊົນທີ່ອາໄສຢູ່ ໃນເຂດປ່າໄມ້. ພ້ອມທັງເຫັນວ່າຮູບແບບ, ຂັ້ນຕອນ ແລະ ເຕັກນິກວິທີການຂອງການເຮັດທົດລອງການຮັບຮູ້ສິດນໍາໃຊ້ທີ່ດິນຂອງປະຊາຊົນທີ່ອາໄສຢູ່ໃນເຂດທີ່ດິນ ສາມປະເພດປ່າ ຢູ່ແຂວງຄໍາມ່ວນ ແມ່ນເປັນແບບຢ່າງທີ່ດີເພື່ອຜັນຂະຫຍາຍ ນຳໄປຈັດຕັ້ງປະຕິບັດໃນຂອບເຂດທົ່ວປະເທດ ເຊິ່ງຈະໄດ້ລາຍງານລັດຖະບານແລະ ສະພາແຫ່ງຊາດ ພິຈາລະນາ ຮັບຮູ້ສິດນໍາໃຊ້ທີ່ດິນຂອງປະຊາຊົນທີ່ໄດ້ອາໃສໃນເຂດທີ່ດິນສາມປະເພດປ່າ ຕາມລະບຽບ ແລະ ຂັ້ນຕອນ ຂອງກົດໝາຍ.

ໃນວັນຕໍ່ມາ ທ່ານ ເຈົ້າແຂວງ ແລະ ຄະນະນຳຂອງກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ກະຊວງກະສິກຳ ແລະ ປ່າໄມ້ ໄດ້ລົງພື້ນທີ່ຕົວຈິງຢູ່ບ້ານ ໂພນສະຫວັນ, ເມືອງ ໄຊບົວທອງ ແຂວງ ຄຳມ່ວນ ເຊິ່ງເປັນບ້ານທີ່ປະຊາຊົນ ອາໄສຢູ່ໃນເຂດໃນປ່າຜະລິດ ດົງພູຊອຍ ຫຼັງຈາກນັ້ນ ກໍໄດ້ມີການ ປຶກສາຫາລື ຮ່ວມກັນລະຫວ່າງ ພໍ່ແມ່ປະຊາຊົນ ແລະ ອຳນາດການປົກຄອງເມືອງ ໄຊບົວທອງ ແລະ ຢ້ຽມຢາມ ຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ ເມືອງໄຊບົວທອງ ອີກດ້ວຍ.