ສິງກະໂປ ຈະນຳໃຊ້ຫຸ່ນຍົນຕຳຫຼວດລາດຕະເວນ ໃນສະໜາມບິນນານາຊາດ ເພື່ອສອດສ່ອງເບິ່ງແຍງຄວາມສະຫງົບຮຽບຮ້ອຍ

ຂ່າວຕ່າງປະເທດລາຍງານ ວັນທີ 15 ມິຖຸນາຜ່ານມາ: ສຳນັກງານຕຳຫຼວດແຫ່ງຊາດສິງກະໂປ ເປີດເຜີຍແຜນການນຳໃຊ້ຫຸ່ນຍົນຕຳຫຼວດລາດຕະເວນ ຂັບເຄື່ອນສີ່ລໍ້ ລຸ້ນດຽວກັບທີ່ແນະນຳໂຕໃນສະໜາມບິນນານາຊາດຊາງງີ ໃນເດືອນເມສາຜ່ານມາ ເພື່ອຊ່ວຍສອດສ່ອງເບິ່ງແຍງຄວາມສະຫງົບຮຽບຮ້ອຍ ແຕ່ຍັງບໍ່ໄດ້ກຳນົດເວລາທີ່ຊັດເຈນ.

ທັງນີ້, ສື່ທ້ອງຖິ່ນສິງກະໂປ ໄດ້ລາຍງານວ່າ: ຫຸ່ນຍົນດັ່ງກ່າວມີຊື່ວ່າ ໂຄງການ MATAR (ຫຸ່ນຍົນອະເນກປະສົງ ເຮັດວຽກຢ່າງອັດສະລິຍະໃນທຸກພູມີປະເທດ) ມີຮູບຮ່າງຄືກັບລົດເຮັດຄວາມສະອາດ ຂັບເຄື່ອນແບບ 4 ລໍ້ ມີເສົາຍືດຫົດໄດ້ 2,3 ແມັດ ຕິດຕັ້ງກ້ອງວົງຈອນປິດ ເບິ່ງໄດ້ 360 ອົງສາ ເພື່ອເບິ່ງສະຖານະການຮອບຕົວ ມີໜ້າຈໍແອລຊີດີ, ມີສຽງເຕືອນໄພ, ພ້ອມປຸ່ມຂໍຄວາມຊ່ວຍເຫຼືອ ແລະ ລຳໂພງສຳລັບສື່ສານກັບເຈົ້າໜ້າທີ່ຕຳຫຼວດປະຈຳສະຖານີ.

ທ່ານ ພ.ຕ.ອ ລິມ ຄີ ເຫວີຍ ຜູ້ບັນຊາການຕຳຫຼວດປະຈຳສະໜາມບິນຊາງງີ ເປີດເຜີຍວ່າ: ການລອງໃຊ້ງານຫຸ່ນຍົນ ຊ່ວຍເສີມສ້າງປະສິດທິພາບໃຫ້ເຈົ້າໜ້າທີ່ຕຳຫຼວດໄດ້ເປັນຢ່າງດີ ສາມາດປະກາດແຈ້ງໃຫ້ປະຊາຊົນຮູ້ເຖິງພື້ນທີ່ປະຕິບັດງານຂອງເຈົ້າໜ້າທີ່ ແລະ ກັ້ນອານາເຂດເຕືອນບໍ່ໃຫ້ປະຊາຊົນເຂົ້າໄປພື້ນທີ່ເກີດເຫດ ຫຼື ສະກັດກັ້ນບໍ່ໃຫ້ຄົນເຂົ້າໃກ້ກະເປົາທີ່ຕ້ອງສົງໄສ ສ່ວນກ້ອງວົງຈອນປິດກໍຊ່ວຍເກັບຫຼັກຖານໃຫ້ເຈົ້າທີ່, ຄຣິບວິດີໂອຈາກກ້ອງຈະຖືກເກັບໄວ້ໃນເຊີເວີ ເປັນເວລາ 30 ວັນ.