ອຸນຫະພູມໂລກ ໃນຕົ້ນເດືອນມິຖຸນານີ້ ຮ້ອນທີ່ສຸດເປັນປະຫວັດສາດ ປີນີ້ອາດຮ້ອນທີ່ສຸດເທົ່າທີ່ມະນຸດເຄີຍພົບມາ

ໜ່ວຍງານເຝົ້າຕິດຕາມສະພາບອາກາດ ເປີດເຜີຍໃນວັນທີ 15 ມິຖຸນາວ່າ: ອຸນຫະພູມສະເລ່ຍຂອງໂລກໃນຕົ້ນເດືອນມິຖຸນານີ້ຮ້ອນຫລາຍທີ່ສຸດເທົ່າທີ່ເຄີຍບັນທຶກມາໃນໄລຍະເວລາດຽວກັນ ເຮັດໃຫ້ເກີດຄວາມກັງວົນວ່າ: ປີນີ້ອາດເປັນປີຮ້ອນທີ່ສຸດເທົ່າທີ່ມະນຸດເຄີຍພົບມາ.

ການເຄື່ອນໄຫວດັ່ງກ່າວມີຂຶ້ນຫລັງຈາກປາກົດການເອລນີໂຢໄດ້ກ້າວເຂົ້າມາສູ່ໂລກຂອງເຮົາຢ່າງເປັນທາງການ ເຊິ່ງອາດເຮັດໃຫ້ເກີດສະພາບອາກາດສຸດຂົ້ວ ລວມທັງອາດເຮັດໃຫ້ອຸນຫະພູມສູງທໍາລາຍສະຖິຕິເກົ່າ.

ຂໍ້ມູນຈາກ C3S ລະບຸວ່າ: ອຸນຫະພູມອາກາດພື້ນຜິວໃນຕົ້ນເດືອນມິຖຸນາ 2023 ສູງສຸດເມື່ອທຽບໃສ່ອຸນຫະພູມໃນໄລຍະເວລາດຽວກັນຂອງປີຜ່ານໆມາ ຕາມບັນທຶກຂໍ້ມູນຂອງອົງການ ຫລື ນັບແຕ່ປີ 1950. ນອກຈາກນີ້ ໃນໄລຍະເວລາດັ່ງກ່າວ ອຸນຫະພູມໂລກຍັງສູງເໜືອລະດັບກ່ອນຍຸກອຸດສາຫະກໍາຫລາຍກວ່າ 1,5 ອົງສາ ຫລື ທະລຸເພດານທີ່ຕົກລົງກັນໄວ້ໃນຂໍ້ຕົກລົງປາຣີສປີ 2015.

ຖ້າເຈາະເລິກເຖິງລາຍລະອຽດຈະພົບວ່າ: ອຸນຫະພູມສະເລ່ຍທົ່ວໂລກປະຈໍາວັນຢູ່ປະມານ ຫລື ເໜືອເພດານ 1,5 ອົງສາ ໃນລະຫວ່າງວັນທີ 7-11 ມິຖຸນາ ແລະ ເຖິງລະດັບສູງສຸດ 1,69 ອົງສາ ເໜືອລະດັບກ່ອນຍຸກອຸດສາຫະກໍາໃນວັນທີ 9 ມິຖຸນາຜ່ານມາ.

ທັງນີ້, ຄໍາວ່າ: “ເອລນີໂຢ” ມາຈາກພາສາແອັສປາຍ ເຊິ່ງແປວ່າ: “ເດັກນ້ອຍຜູ້ຊາຍ” ໂດຍເປັນປາກົດການທໍາມະຊາດທີ່ຈະເຮັດໃຫ້ຜິວນໍ້າໃນມະຫາສະໝຸດປາຊີຟິກເບື້ອງຕາເວັນອອກໃນເຂດຮ້ອນມີອຸນຫະພູມສູງຂຶ້ນກວ່າປົກກະຕິ ໂດຍປາກົດການນີ້ເກີດຂຶ້ນທຸກໆ 2-7 ປີ ເຊິ່ງຄັ້ງຫລ້າສຸດທີ່ເອລນີໂຢມາຢາມໂລກຄືປີ 2018-2019.

ນອກຈາກນີ້ ປີທີ່ຮ້ອນທີ່ສຸດເປັນປະຫວັດສາດສ່ວນຫລາຍຈະເກີດຂຶ້ນໃນໄລຍະທີ່ໂລກພົບກັບເອລນີໂຢ ສົ່ງຜົນໃຫ້ນັກວິທະຍາສາດກັງວົນວ່າ: ລະດູຮ້ອນປີນີ້ ແລະ ປີຕໍ່ໆໄປ ໂລກອາດມີອຸນຫະພູມສູງເປັນປະຫວັດສາດ ທັງຢູ່ເທິງບົກ ແລະ ໃນທະເລ.

ອ້າງອີງ:

https://www.france24.com/…/20230615-world-breaks…

https://www.theguardian.com/…/record-temperatures…