ຫາລື ແລະ ກວດກາ ຄວາມສອດຄ່ອງທາງດ້ານກົດໝາຍວ່າດ້ວຍວຽກງານຄຸມຂັງ-ດັດສ້າງ ໃຫ້ປະສິດທິພາບ ແລະ ປະສິດທິຜົນດີຂຶ້ນ

ກົມກົດໝາຍ ກະຊວງຍຸຕິທຳ ຮ່ວມກັບ ກົມຄຸມຂັງ-ດັດສ້າງ, ກົມນິຕິກຳ ກະຊວງປ້ອງກັນຄວາມສະຫງົບ ຈັດກອງປະຊຸມກວດກາຄວາມສອດຄ່ອງທາງດ້ານກົດໝາຍຂອງຮ່າງດຳລັດວ່າດ້ວຍວຽກງານຄຸມຂັງ-ດັດສ້າງ ຂຶ້ນໃນວັນທີ 12-13 ມິຖຸນາ 2023 ຢູ່ກະຊວງຍຸຕິທຳ, ເປັນປະທານຮ່ວມຂອງທ່ານ ກົງຈີ ຢ່າງຈື່ ຮອງລັດຖະມົນຕີ ກະຊວງຍຸຕິທຳ, ທ່ານ ພົຕ ຄຳກິງ ຜຸຍຫລ້າມະນີວົງ ຮອງລັດຖະມົນຕີກະຊວງປ້ອງກັນຄວາມສະຫງົບ.

ດຳລັດສະບັບນີ້ກຳນົດຫລັກການ, ລະບຽບການ ແລະ ມາດຕະການ ກ່ຽວກັບການຄຸ້ມ ແລະ ຕິດຕາມ, ກວດກາວຽກງານຄຸມຂັງ-ດັດສ້າງ ເພື່ອເຮັດໃຫ້ວຽກງານດັ່ງກ່າວ ມີປະສິດທິພາບ ແລະ ປະສິດທິຜົນ, ຮັບປະກັນມາດຕະການບັງຄັບຂອງລັດ ໃຫ້ມີຄວາມຖືກຕ້ອງ ແລະ ເຂັ້ມແຂງ ແນໃສ່ການປ້ອງກັນ, ສະກັດກັ້ນນັກໂທດ, ຜູ້ຖືກດັດສ້າງ, ຜູ້ຖືກສົງໄສ, ຜູ້ຖືກຫາ ຫລື ຈຳເລີຍ ໂຕນໜີ ຫລື ກໍ່ຄວາມວຸ້ນວາຍໃນຄ້າຍຄຸມຂັງ-ດັດສ້າງ ແລະ ເຮັດໜ້າທີ່ສຶກສາອົບຮົມເຂົາເຈົ້າ ໃຫ້ກາຍເປັນພົນລະເມືອງດີຂອງສັງຄົມ, ປະກອບສ່ວນເຮັດໃຫ້ປະເທດຊາດມີຄວາມສະຫງົບ ແລະ ຄວາມເປັນລະບຽບຮຽບຮ້ອຍ. ຮ່າງດຳລັດສະບັບນີ້ປະກອບມີ 13 ໝວດ, 57 ມາດຕາ.

ໃນກອງປະຊຸມທ່ານປະທານ ໄດ້ມີຄຳເຫັນໂອ້ລົມຕໍ່ບັນດາທ່ານທີ່ເຂົ້າຮ່ວມກອງປະຊຸມ ຈົ່ງພ້ອມກັນປະກອບຄຳຄິດຄຳເຫັນໃສ່ ຮ່າງດຳລັດສະບັບນີ້ ເພື່ອປັບປຸງເຮັດໃຫ້ເນື້ອໃນມີຄວາມສອດຄ່ອງ ແລະ ຖືກຕ້ອງ, ຊັດເຈນກັບສະພາບຄວາມເປັນຈິງ ແລະ ມີຄວາມເປັນເອກະພາບກັນ ໃນການຈັດຕັ້ງປະຕິບັດໃຫ້ມີປະສິດທິພາບ ແລະ ປະສິດທິຜົນຍິ່ງຂຶ້ນ.