ແພດເຜີຍຂໍ້ມູນ! ພົບບັນຫາລະບົບຫາຍໃຈໃນກຸ່ມໄວໜຸ່ມຍ້ອນຢາສູບໄຟຟ້າຫລາຍຂຶ້ນ
ວັນທີ 11 ມິຖຸນາ 2023 ນີ້ ຜູ້ໃຊ້ເຟສບຸກ Nui Nitisack Sysana ທີ່ເປັນທ່ານໝໍກວດພະຍາດລະບົບຫົວໃຈອອກມາເປີດເຜີຍວ່າ: ໃນໄລຍະ 6 ເດືອນ ຕົ້ນປີ2023 ນີ້ໄດ້ ລົງກວດ OPD ລະບົບຫາຍໃຈແຕ່ລະມື້ ພົບວ່າໄວໜຸ່ມ 15-35 ປີ, ມີບັນຫາທາງລະບົບຫາຍໃຈທີ່ເກີດຈາກຢາສູບໄຟຟ້າເພີ່ມຂຶ້ນ ແລະຍັງພົບໄວໜຸ່ມຊ່ວງ ມ.4-ມ. 7 ກຳລັງມີບັນຫາທາງລະບົບຫາຍໃຈເກີດຈາກຢາສູບໄຟຟ້າເຊັ່ນກັນ.
ກໍລະນີສຶກສາຫລ້າສຸດ ເຄສນີ້ ອາຍຸ 18 ປີ ກຳລັງຮຽນຢູ່ ມ.7, ສູບຢາສູບໄຟຟ້າທຸກມື້, ສູບຕະຫຼອດ, ສູບມາໄດ້2ປີກວ່າ
– CC: Cough with sputum × Dyspnea.
– PH: Smoking Pod 2 years.
ຜົນ PHI: ໄອມີເສມຫະສີຂຽວໄດ້ 2 ອາທິດ, ຫາຍໃຈຝືດ, ອິດເມື່ອຍ, ແໜ້ນໜ້າເອິກ, ຮູ້ສຶກບໍ່ສະບາຍຕົວ, ກິນດື່ມໄດ້ໜ້ອຍ.
– PE: Lung: Crackle left side.
– CXR: ສັງເກດເຫັນວ່າປອດມີການອັກເສບຕິດເຊື້ອ.
ນີ້ຄືຂໍ້ມູນມູນຈາກທ່ານໝໍຜູ້ເຮັດວຽກຕົວຈິງໃນການກວດລະບົບຫົວໃຈຢູ່ໂຮງໝໍລັດແຫ່ງໜຶ່ງໃນນະຄອນຫລວງວຽງຈັນ ເຊິ່ງປັດຈຸບັນຫລາຍກໍລະນີໄດ້ຮັບການປິ່ນປົວ ແຕ່ສຸຂະພາບຈະບໍ່ຄືເກົ່າເນື່ອງຈາກລະບົບບາງຢ່າງຖືກທຳລາຍ.
ຝາກເປັນອຸທາຫອນໃຫ້ນ້ອງໆທີ່ພວມຫລົງໄຫລເຂົ້າສູ່ກະແສຂອງຢາສູບໄຟຟ້າ ຫາທາງອອກໄດ້ຮີບໄວຍິ່ງດີ ເພື່ອບໍ່ເປັນບັນຫາຊໍາເຮື້ອ ແລະ ບັນຫາໃຫຍ່ຂຶ້ນໄປ ເຊິ່ງອາດໝາຍເຖິງຊີວິດກໍເປັນໄດ້.
