ຫົວພັນວາງກຳນົດຍຸດທະສາດສຳຄັນພັດທະນາເຂດໃກ້ຄຽງສະໜາມບິນໜອງຄ້າງ

ສະໜາມບິນໜອງຄ້າງ ເມືອງຊຳເໜືອ ແຂວງຫົວພັນໄດ້ສ້າງສຳເລັດແລະໄດ້ມີການມອບ-ຮັບ ພ້ອມທັງເປີດບໍລິການຮັບໃຊ້ສັງຄົມຢ່າງເປັນທາງການໃນວັນທີ 15ພຶດສະພາ 2023 ນີ້ມາ ໄດ້ເຮັດໃຫ້ແຂວງຫົວພັນມີໃບໜ້າໃໝ່ດ້ານການຄົມມະນາຄົມຂົນສົ່ງ ແລະ ຫຼາຍຄົນໃຫ້ຄວາມສົນໃຈນຳໃຊ້ການບໍລິການມຸ່ງໜ້າໄປສູ່ຖານທີ່ໝັ້ນຂອງການປະຕິວັດລາວນັບມື້ຫຼາຍຂຶ້ນ,ຈຶ່ງເຮັດໃຫ້ແຂວງຫົວພັນຕ້ອງກຳນົດແຜນຍຸດທະສາດສຳຄັນໃນການພັດທະນາເຂດໜອງຄ້າງ ແລະ ເຂດໃກ້ຄຽງໃຫ້ລະອຽດ ເພື່ອສະດວກໃນການຄຸ້ມຄອງ,

ແຂວງຫົວພັນໄດ້ວາງແຜນ 3 ຍຸດທະສາດສຳຄັນເພື່ອພັດທະນາເຂດໃກ້ຄຽງສະໜາມບິນ ໜອງຄ້າງໃຫ້ເກີດປະໂຫຍດສູງສຸດແກ່ການພັດທະນາເສດຖະກິດ – ສົງຄົມຂອງແຂວງໃຫ້ດີຂຶ້ນກວ່າເກົ່າ ແລະ ເຮັດໃຫ້ຊີວິດການເປັນຢູ່ຂອງປະຊາຊົນໃນເຂດນີ້ໄດ້ຮັບການປັບປຸງນັບມື້ດີຂຶ້ນ ແຂວງຫົວພັນໄດ້ຄົ້ນຄວ້າ ແລະ ວາງຍຸດທະສາດເພື່ອພັດທະນາເຂດໜອງຄ້າງໃຫ້ເກີດປະໂຫຍດສູງສຸດ ເຊິ່ງໄດ້ແບ່ງເປັນ 3 ໄລຍະ ມີທັງໄລຍະສັ້ນ ໄລຍະກາງ ແລະ ໄລຍະຍາວ.

ທ່ານ ພອນສຸກ ອິນທະວົງ ຮອງເຈົ້າແຂວງຫົວພັນ ເວົ້າວ່າ: ສຳລັບແຜນໄລຍະສັ້ນ ແມ່ນຈະຍົກຍ້າຍແລະຈັດສັນບ້ານໜອງຄ້າງໄປຢູ່ບ່ອນໃໝ່ເພື່ອຄວາມປອດໄພໃນການບໍລິການສະໜາມບິນ ແລະ ອຳນວຍຄວາມສະດວກໃຫ້ປະຊາຊົນໃນການດຳເນີນທຸລະກິດຄ້າ-ຂາຍ ທີ່ຖືກຕ້ອງຕາມລະບຽບກົດໝາຍ ສ້າງລາຍຮັບເຂົ້າຄອບຄົວແກ້ໄຂຊີວິດການເປັນຢູ່ໃຫ້ດີຂຶ້ນ, ສ່ວນແຜນໄລຍະກາງ ແຂວງຈະພັດທະນາເຂດນີ້ໃຫ້ເປັນເຂດບໍລິການໃນການທ່ອງທ່ຽວຊຶ່ງຈະໄດ້ຈັດສັນໃນຂັ້ນຕໍ່ໄປ ແລະ ໄລຍະຍາວນັ້ນ ຈະອຳນວຍຄວາມສະດວກໃນການດຶງດູດການລົງທຶນທັງພາຍໃນ ແລະ ຕ່າງປະເທດ ເພື່ອໃຫ້ນັກລົງທຶນເຂົ້າໄປສຶກສາສຳຫຼວດຄວາມເປັນໄປໄດ້ໃນການເຮັດທຸລະກິດດ້ານຕ່າງໆ ເປັນຕົ້ນທາງດ້ານກະສິກຳ ການປູກ ການລ້ຽງ ອຸດສະຫະກຳ, ການສ້າງຕັ້ງໂຮງຈັກໂຮງງານ ຫຼື ຈະເປັນທຸລະກິດທາງດ້ານການທ່ອງທ່ຽວຕາມຄວາມອາດສາມາດເປັນໄປໄດ້, ແຂວງຫົວພັນນັບວ່າເປັນແຂວງນຶ່ງທີ່ມີທ່າແຮງເສດຖະກິດຫຼາຍດ້ານ ໂດຍສະເພາະທາງດ້ານກະສິກຳ, ການບໍລິການ, ການທ່ອງທ່ຽວ ການສ້າງສຳເລັດແລະເປີດການນຳໃຊ້ສະໜາມບິນໜອງຄ້າງຈຶ່ງເປັນເງື່ອນໄຂນຶ່ງທີ່ດຶງດູດໃຫ້ນັກລົງທຶນສົນໃຈເຂົ້າໄປລົງທຶນນັບມື້ຫຼາຍຂຶ້ນແລະມັນກາຍເປັນເງື່ອນໄຂໃນການພັດທະນາແຂວງຫົວພັນໃຫ້ກ້າວຂຶ້ນຢ່າງແຂງແຮງ.

ສຳລັບການບໍລິການບໍລິການຂອງສະໜາມບິນໜອງຄ້າງໃນເບື້ອງຕົ້ນແມ່ນບໍລິການຖ້ຽວບັນສະເພາະຈາກນະຄອນຫຼວງວຽງຈັນ – ແຂວງຫົວພັນເທົ່ານັ້ນ ຖ້າຫາກວ່າມີຜູ້ໂດຍສານເພີ່ມຂຶ້ນ ອາດຈະຂະຫຍາຍການບິນຈາກ ຫົວພັນ – ຫຼວງພະບາງ; ຫົວພັນ – ຈຳປາສັກ ແລະ ຫົວພັນ – ຊຽງຂວາງ ຕາມຄວາມເໝາະສົມ ນອກນີ້ ອາກຈະຂະຫຍາຍເປັນສະໜາມບີນສາກົນທີ່ສາມາດເຊື່ອມໂຍງກັບຕ່າງປະເທດ ຖ້າຫາກມີຈຳນວນນັກທ່ອງທ່ຽວໃຊ້ບໍລິການຈຳນວນຫຼາຍໃນຕໍ່ໜ້າ.

ໂຄງການກໍ່ສ້າງສະໜາມບິນໜອງຄ້າງເປັນໄປຕາມມາດຕະຖານສະໜາມບິນພົນລະເຮືອນ ແລະ ອົງການການບິນພົນລະເຮືອນສາກົນ ວາງອອກ,ຈັດຢູ່ໃນປະເພດ 3C ສາມາດຮອງຮັບເຮືອບິນປະເພດ 70–100ບ່ອນນັ່ງ ເປັນຕົ້ນແມ່ນ ATR 72 MA-60 ຫຼື ທຽບເທົ່າສາມາດຮອງຮັບຜູ້ໂດຍສານປີໜຶ່ງ 100.000 ເທື່ອຄົນ, ບໍລິສັດທີ່ປຶກສາ ADCC ແລະ ບໍລິສັດພັດທະນາກະສິກຳ ຮວ່າງແອັ່ງ ອັດຕະປື ຈຳກັດ ປະເທດວຽດນາມເປັນຜູ້ຮັບເໝົາ ແລະ ກົມການບິນພົນລະເຮືອນ ກະຊວງໂຍທາທິການ ແລະ ຂົນສົ່ງເປັນເຈົ້າຂອງໂຄງການ.