ນາຍົກລັດຖະມົນຕີ ສະເໝີໃຫ້ສອງກະຊວງຍຸຕິທຳ ລາວ-ກູບາ ເອົາໃຈໃສ່ຜັນຂະຫຍາຍວຽກງານຍຸຕິທຳ ດ້ານກົດໝາຍ

ໃນວັນທີ 12 ມິຖຸນາ 2023 ນີ້, ທ່ານ ສອນໄຊ ສີພັນດອນ ກຳມະການກົມກາງເມືອງສູນກາງພັກ, ນາຍົກລັດຖະມົນຕີແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບ ຂອງ ທ່ານ ອົສກາ ມານູແອນ ຊິນເວຣາ ມາຕິເນັດ ລັດຖະມົນຕີກະຊວງຍຸຕິທຳ, ສະມາຊິກພັກກອມມູນິດກູບາ, ສະມາຊິກຄະນະລັດຖະມົນຕີ, ສະມາຊິກສະພາປະຊາຊົນ ແຫ່ງຊາດ ກູບາ ໃນໂອ ກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ.

ໂອກາດນີ້, ທ່ານ ນາຍົກລັດຖະມົນຕີ ໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ການຢ້ຽມຢາມ ສປປ ລາວ ຢ່າງເປັນທາງການຂອງ ທ່ານ ອົສກາ ມານູແອນ ຊິນເວຣາ ມາຕິເນັດ ພ້ອມຄະນະໃນຄັ້ງນີ້, ເປັນປະກອບສ່ວນເຂົ້າໃນການສືບຕໍ່ຮັດແໜ້ນຄວາມສາມັກຄີ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືຖານສະຫາຍອ້າຍນ້ອງ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ ໂດຍສະເພາະສອງກະຊວງຍຸຕິທຳລາວ-ກູບາ ໃຫ້ນັບມື້ແໜ້ນແຟ້ນ ແລະ ຂະຫຍາຍຕົວຍິ່ງໆຂຶ້ນ.

ພ້ອມນີ້, ຍັງສະເໝີໃຫ້ສອງກະຊວງຍຸຕິທຳ ລາວ-ກູບາ ເອົາໃຈໃສ່ໃນການຜັນຂະຫຍາຍບົດບັນທຶກຄວາມເຂົ້າໃຈທີ່ໄດ້ລົງນາມກັນແລ້ວນັ້ນ ໃຫ້ເກີດດອກອອກຜົນເປັນຮູບປະທຳ ເປັນຕົ້ນການແລກປ່ຽນປະສົບການລະຫວ່າງ ຜູ້ຊ່ຽວຊານຂອງສອງກະຊວງ ໃນຂົງເຂດການສ້າງກົດໝາຍ, ການໃຫ້ຄຳປຶກສາທາງດ້ານກົດໝາຍ ແລະ ການປະຕິບັດທາງດ້ານກົດໝາຍ ແລະ ອື່ນໆ.

ທ່ານ ອົສກາ ມານູແອນ ຊິນເວຣາ ມາຕິເນັດ ໄດ້ສະແດງຄວາມຂອບໃຈຕໍ່ ທ່ານ ສອນໄຊ ສີພັນດອນ ທີ່ໄດ້ໃຫ້ການຕ້ອນຮັບໃນຄັ້ງນີ້ ເຊິ່ງການຢ້ຽມຢາມໃນຄັ້ງນີ້ ເປັນມິດໝາຍອັນດີ ເຮັດໃຫ້ການພົວພັນຮ່ວມມືຂອງ ສອງກະຊວງຍຸຕິທຳ ກູບາ-ລາວ ແໜ້ນແຟ້ນຍິ່ງຂຶ້ນ. ພ້ອມທັງໄດ້ແຈ້ງຈຸດປະສົງ ໃນເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຕື່ມອີກ.