ສະເປີ ສົນໃຈດຶງ ແຮຣີ ແມັກໄກວ ຮ່ວມທີມ ສື່ເຜີຍຢູ່ໃນແຜນການທີມຂອງ ອັງເກ້

ທັອດແນມ ຮັອດສະເປີ ສະໂມສອນດັງແຫ່ງພຣີເມຍລີກອັງກິດໃຫ້ຄວາມສົນໃຈທີ່ຈະເຊັນສັນຍາກັບ ແຮຣີ ແມັກໄກວ ກອງຫລັງຄ່າໂຕແພງຂອງ ແມນເຊັສເຕີ ຢູໄນເຕັດ ໃນລະດູຮ້ອນນີ້. ເນື່ອງຈາກວ່ານັກເຕະຢູ່ໃນແຜນການສ້າງທີມຂອງ ອັງເກ້ ປອສເຄໂຄກລູ ຜູ້ຈັດການຄົນໃຫມ່.

ແມັກໄກວ ກາຍເປັນນັກເຕະສ່ວນເກີນຢູ່ໃນ Old Trafford ນັບຕັ້ງແຕ່ ເອຣິກ ເທນຮາກ ເຂົ້າມາຄຸມທີມໃນລະດູຮ້ອນທີ່ຜ່ານມາ. ໂດຍຄູຝຶກສອນຊາວໂຮນລັງ ສະແດງອອກຢ່າງຈະແຈ້ງວ່າພວກເຂົາຕ້ອງການຂາຍກັບຕັນຂອງ “ຜີສາດແດງ” ເພື່ອນຳເອົາເງິນມາເສີມທັບ.

ເຖິງແມ່ນວ່າດາວເຕະທີມຊາດອັງກິດ ຈະບໍ່ຮີບຮ້ອນກັບການຕັດສິນໃຈອອກຈາກ ແມນເຊັສເຕີ ຢູໄນເຕັດ ແຕ່ລາວພ້ອມທີ່ຈະຄິດເຖິງອະນາຄົດຂອງຕົນເອງໃນຊ່ວງຕະຫລາດຊື້-ຂາຍໃນຊ່ວງຊຳເມີນີ້. ເພາະບໍ່ຢາກເປັນພຽງໂຕສຳຮອງອີກຕໍ່ໄປ.