ເອົາໃຈໃສ່ກະກຽມໃຫ້ດີ ແລະ ສອບເສັງໃຫ້ໄດ້ຕາມຄາດໝາຍຈຶ່ງບໍ່ຕົກໃສ່ຄຳວ່າ ເຮັດນາໝົດປີໄຟໄໝ້ເລົ້າເຂົ້າ

ໂດຍ: ຜາຕຸງ
ມາຮອດດຽວນີ້ການສອບເສັງຂອງນັກຮຽນສາຍສາມັນໂດຍສະເພາະແມ່ນການສອບເສັງຈົບຊັ້ນ ປ5 ໃນຂອບເຂດທົ່ວປະເທດປະຈຳສົກຮຽນ 2022 – 2023 ໄດ້ສຳເລັດເປັນທີ່ຮຽບຮ້ອຍແລ້ວ ເຖິງແມ່ນຜົນການສອບເສັງຍັງບໍ່ທັນມີການແຈ້ງເປັນທາງການເທື່ອກໍ່ຕາມ ແຕ່ເຊື່ອວ່າຄົງຈະໄດ້ຮັບຕາມລະດັບຄາດໝາຍແຕ່ 90% ຂຶ້ນໄປ.
ສິ່ງທີ່ຄວນເອົາໃຈໃສ່ໃນເວລານີ້ແມ່ນການກະກຽມທຸກເງື່ອນໄຂໃຫ້ພຽບພ້ອມເພື່ອລົງສູ່ສະໜາມຮົບໃໝ່ ສະໜາມຮົບທາງດ້ານວັດທະນະທຳຂອງນັກຮຽນສາຍສາມັນ ກໍ່ແມ່ນການສອບເສັງເລື່ອນຊັ້ນ ແລະ ຈົບຊັ້ນ ໂດຍສະເພາະແມ່ນການເສັງຈົບຊັ້ນມັດທະຍົມຕອນຕົ້ນ ມ4ເພື່ອກ້າວເຂົ້າສູ່ການຮຽນໃນຊັ້ນມັດທະຍົມຕອນປາຍ ແລະ ຈາກ ມັດທະຍົມຕອນປາຍເພື່ອກ້າວເຂົ້າສູ່ ວິທະຍາໄລ, ມະຫາວິທະຍາໄລ, ໂຮງຮຽນເຕັກນິກວິຊາຊີບຫຼືອື່ນໆໃນຂັ້ນຕໍ່ໄປທີ ຊຶ່ງການສອບເສັງຈົບຊັ້ນມັດທະຍົມຕອນຕົ້ນຈະດຳເນີນໄປໃນວັນທີ14-16 ແລະ ເສັງຈົບຊັ້ນ ມັດທະຍົມຕອນປາຍ ມ7 ຈະດຳເນີນໄປໃນວັນທີ 21-23 ເດືອນມິຖຸນານີ້.
ເພື່ອໃຫ້ການສູ້ຮົບໃນບັ້ນຮົບນີ້ມີໄຊຊະນະ ແລະ ສຳເລັດຕາມຄາດໝາຍນັ້ນ ມັນບໍ່ແມ່ນເລື່ອງງ່າຍດາຍດັ່ງຄຳເວົ້າທີ່ວ່າ: ປອກກ້ວຍເຂົ້າປາກ, ຢາກມີໄຊຊະນະຢາກສຳເລັດຕາມຄາດໝາຍນັ້ນ ມັນໄດ້ເລັ່ງໃຫ້ທຸກພາກສ່ວນທີ່ກ່ຽວຂ້ອງເປັນຕົ້ນແມ່ນ ຄູ – ອາຈານ ຜູ້ສິດ ສອນຖ່າຍທອດຄວາມຮູ້ໃຫ້ນັກຮຽນນັ້ນຕ້ອງເປັນເຈົ້າການໃນການຖ່າຍທອດວິທະຍາຍຸດຄວາມຮູ້ຄວາມສາມາດໃຫ້ສຳເລັດຕາມຫຼັກສູດຕຳລາຮຽນ,ຈັດຕັ້ງການຄົ້ນຄວ້າແລກປ່ຽນບົດຮຽນລະຫວ່າງນັກຮຽນເກັ່ງກັບນັກຮຽນທີ່ຮຽນອ່ອນ, ຫຼື ນັກຮຽນ ກັບຄູ-ອາຈານ,ເລັ່ງການບຳລຸງໃຫ້ນັກຮຽນທີ່ຮຽນອ່ອນ,ສ່ວນພໍ່ແມ່ຜູ້ປົກຄອງກໍຕ້ອງໝັ່ນສຶກສາອົບຮົມແລະເປັນກຳລັງໃຈໃຫ້ລູກຫຼານໃນການສູ້ຊົນຈັດຕັ້ງຄົ້ນຄວ້າບົດຮຽນ, ພ້ອມທັງເຝົ້າຕິດຕາມການປະພຶດປະຕິບັດຂອງລູກຫຼານໃຫ້ປະຕິບັດຕົນໄປໃນທາງທີ່ຖືກຕ້ອງຕາມລະບຽບກົດໝາຍບ້ານເມືອງ.
ແຕ່ວ່າ,ຜູ້ທີ່ຈະມາພິພາກສາຕັດສິນໄຊຊະນະໃນບັ້ນຮົບອັນດຸເດືອດນີ້ກໍແມ່ນຕົວຂອງນັກຮຽນນັກສຶກສານັ້ນລະທີ່ຕ້ອງເປັນເຈົ້າຕົນເອງໃນການສຶກສາຄົ້ນຄວ້າບົດຮຽນທີ່ຮຽນມາຍ້ອນວ່າຕົນເອງຈະເຂົ້າໃຈດີກວ່າຄົນອື່ນ,ບົດຮຽນໃດ,ວິຊາໃດບໍ່ເຂົ້າໃຈຕ້ອງກ້າຖາມກ້າແລກປ່ຽນຄຳຄິດເຫັນນຳໝູ່ຜູ້ຮູ້ແລະຄູອາຈານ, ສ່ວນໝູ່ຜູ້ຮູ້ກໍຄວນຊ່ວຍເຫຼືອກັນດ້ວຍຄວາມຈິງໃຈຢ່າເອົາຕົວລອດເປັນຍອດດີ, ຄວນເປີດຕົວເອງໃຫ້ກວ້າງຂື້ນ,ບໍ່ຄວນເອົາຕົນເອງເຂົ້າໄປເກືອກກົ້ວມົ່ວສຸມກັບສິ່ງອະບາຍຍະມຸກຕ່າງໆເປັນຕົ້ນແມ່ນການຫຼີ້ນກິນຟຸມເຟືອຍ ເຮຮາປາຕີ່ຕາມເທັກຕາມບາ ເຂົ້າຫາໝູ່ເຫຼົ້າ,ເບ້ຍເຈ້ຍໄພ້, ຢາເສບຕິດ,……..ເພາະມັນບໍ່ໄດ້ຊ່ວຍໃຫ້ມີຄວາມສຳເລັດດອກ ມີແຕ່ຈະນຳພາໄປສູ່ຄວາມຫາຍຍານະເທົ່ານັ້ນ.
ຢ່າລືມວ່າສົກຮຽນ2022-2023ນີ້ ເປັນອີກສົກຮຽນໜຶ່ງທີ່ພໍ່ແມ່ຜູ້ປົກຄອງໄດ້ອາບເຫື່ອຕາງນ້ຳ,ຂູດຫົວເລົາເກົາຫົວຫຍ້າຫາວັດຖຸເງິນຄຳບໍ່ຈັກວ່າເທົ່າໃດເປົ້າມາຍກໍ່ເພື່ອສົ່ງເສີມໃຫ້ລູກຫຼານໄດ້ສຶກສາຮ່ຳຮຽນເໜືອນດັ່ງຄົນອື່ນ,ຢາກໃຫ້ລູກຫຼານ ເປັນຄົນດີຂອງຄອບຄົວ,ພົນ ລະເມືອງດີຂອງປະເທດ ກາຍເປັນບຸກຄະລາກອນທີ່ເຕັມໄປດ້ວຍຄວາມຮູ້ຄວາມສາມາດ ເພື່ອພັດທະນາປະເທດຊາດໃຫ້ຈະເລີນກ້າວໜ້າຕໍ່ໄປ ດັ່ງນັ້ນຈົ່ງເອົາໃຈໃສ່ກະກຽມໃຫ້ດີ ແລະ ສອບເສັງໃຫ້ໄດ້ຕາມຄາດໝາຍ ຖ້າບໍ່ດັ່ງ,ນັ້ນມັນຈະຕົກເຂົ້າໃສ່ຄຳເວົ້າທີ່ວ່າ:ເຮັດນາໝົດປີໄຟໄໝ້ເລົ້າເຂົ້າ